| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. අප්‌පටිවිදිතසුත්‌තවණ්‌ණනා
7. Appaṭividitasuttavaṇṇanā
7. පවත්‌තිනිවත්‌තිතදුභයහෙතුවිභාගස්‌ස ධම්‌මස්‌සපි චතුසච්‌චන්‌තොගධත්‌තා ආහ ‘‘ධම්‌මාති චතුසච්‌චධම්‌මා’’ති. චත්‌තාරිපි හි අරියසච්‌චානි චතුසච්‌චන්‌තොගධානි. අප්‌පටිවිද්‌ධාති පරිඤ්‌ඤාභිසමයාදිවසෙන අනභිසමිතා. දිට්‌ඨිගතවාදෙසූති දිට්‌ඨිගතසඤ්‌ඤිතෙසු වාදෙසු. දිට්‌ඨිගතෙහි තෙ පවත්‌තිතා. ඉතො පරෙසන්‌ති ඉතො සාසනිකෙහි පරෙසං අඤ්‌ඤෙසං. ධම්‌මතායාති සභාවෙන, සයමෙවාති අත්‌ථො. ගච්‌ඡන්‌තීති පවත්‌තන්‌ති දිට්‌ඨිවාදං පග්‌ගය්‌හ තිට්‌ඨන්‌ති. පරෙනාති දිට්‌ඨිගතිකෙන. නීයන්‌තීති දිට්‌ඨිවාදසඞ්‌ගණ්‌හනෙ උය්‍යොජීයන්‌ති. තෙනාහ ‘‘තත්‌ථා’’තිආදි. පබුජ්‌ඣිතුන්‌ති පමාදනිද්‌දාය පටිබුජ්‌ඣිතුං. පටිපදා යථාදෙසිතස්‌ස ධම්‌මස්‌ස කථිතතාය, පටිබුජ්‌ඣිතුං යොනිසො පවත්‌තියමානත්‌තා භද්‌දිකා.
7. Pavattinivattitadubhayahetuvibhāgassa dhammassapi catusaccantogadhattā āha ‘‘dhammāti catusaccadhammā’’ti. Cattāripi hi ariyasaccāni catusaccantogadhāni. Appaṭividdhāti pariññābhisamayādivasena anabhisamitā. Diṭṭhigatavādesūti diṭṭhigatasaññitesu vādesu. Diṭṭhigatehi te pavattitā. Ito paresanti ito sāsanikehi paresaṃ aññesaṃ. Dhammatāyāti sabhāvena, sayamevāti attho. Gacchantīti pavattanti diṭṭhivādaṃ paggayha tiṭṭhanti. Parenāti diṭṭhigatikena. Nīyantīti diṭṭhivādasaṅgaṇhane uyyojīyanti. Tenāha ‘‘tatthā’’tiādi. Pabujjhitunti pamādaniddāya paṭibujjhituṃ. Paṭipadā yathādesitassa dhammassa kathitatāya, paṭibujjhituṃ yoniso pavattiyamānattā bhaddikā.
හෙතුනාති ඤායෙන. කාරණෙනාති චතුසච්‌චානං සම්‌බොධයුත්‌තියා. හත්‌ථතලෙ ආමලකං විය සබ්‌බං ඤෙය්‍යං ජානාතීති සබ්‌බඤ්‌ඤූ, තෙනෙව සබ්‌බඤ්‌ඤුතාභිසම්‌බොධෙන බුද්‌ධොති සබ්‌බඤ්‌ඤුබුද්‌ධො. පච්‌චෙකං පරෙහි අසාධාරණතාය විසුං සයම්‌භුඤාණෙන සච්‌චානි බුද්‌ධවාති පච්‌චෙකබුද්‌ධො. පරොපදෙසෙන චතුසච්‌චං බුජ්‌ඣතීති චතුසච්‌චබුද්‌ධො. තථා හි සො සයම්‌භුතාය අභාවතො කෙවලං චතුසච්‌චබුද්‌ධොති වුච්‌චති. සුතෙන සුතමයඤාණෙන ඛන්‌ධාදිභෙදං ඤෙය්‍යං බුද්‌ධවාති සුතබුද්‌ධො. සබ්‌බඤ්‌ඤුබුද්‌ධපච්‌චෙකබුද්‌ධෙ ඨපෙත්‌වා අවසෙසා අග්‌ගසාවකමහාසාවකාපි පකතිසාවකාපි වීතරාගා අවසෙසා ඛීණාසවා. තයොපි පුරිමා වට්‌ටන්‌ති සම්‌බුද්‌ධාතිආදිවචනතො. සන්‌නිවසති එතෙනාති සන්‌නිවාසො, චරිතං. ලොකස්‌ස සන්‌නිවාසො ලොකසන්‌නිවාසො, තස්‌මිං. කායදුච්‌චරිතාදිභෙදෙ විසමෙ. සතිසම්‌මොසෙන විසමෙ වා සත්‌තනිකායෙ. සො හි විසමයොගතො විසමො. රාගවිසමාදිකෙ විසමෙ වා කිලෙසජාතෙ. තං විසමං පහාය තං විසමං අජ්‌ඣුපෙක්‌ඛිත්‌වා සමං සදිසං යුත්‌තරූපං, පුරිමකෙහි වා සම්‌බුද්‌ධෙහි සමං සදිසං චරන්‌ති වත්‌තන්‌ති.
Hetunāti ñāyena. Kāraṇenāti catusaccānaṃ sambodhayuttiyā. Hatthatale āmalakaṃ viya sabbaṃ ñeyyaṃ jānātīti sabbaññū, teneva sabbaññutābhisambodhena buddhoti sabbaññubuddho. Paccekaṃ parehi asādhāraṇatāya visuṃ sayambhuñāṇena saccāni buddhavāti paccekabuddho. Paropadesena catusaccaṃ bujjhatīti catusaccabuddho. Tathā hi so sayambhutāya abhāvato kevalaṃ catusaccabuddhoti vuccati. Sutena sutamayañāṇena khandhādibhedaṃ ñeyyaṃ buddhavāti sutabuddho. Sabbaññubuddhapaccekabuddhe ṭhapetvā avasesā aggasāvakamahāsāvakāpi pakatisāvakāpi vītarāgā avasesā khīṇāsavā. Tayopi purimā vaṭṭanti sambuddhātiādivacanato. Sannivasati etenāti sannivāso, caritaṃ. Lokassa sannivāso lokasannivāso, tasmiṃ. Kāyaduccaritādibhede visame. Satisammosena visame vā sattanikāye. So hi visamayogato visamo. Rāgavisamādike visame vā kilesajāte. Taṃ visamaṃ pahāya taṃ visamaṃ ajjhupekkhitvā samaṃ sadisaṃ yuttarūpaṃ, purimakehi vā sambuddhehi samaṃ sadisaṃ caranti vattanti.
අප්‌පටිවිදිතසුත්‌තවණ්‌ණනා නිට්‌ඨිතා.
Appaṭividitasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. අප්‌පටිවිදිතසුත්‌තං • 7. Appaṭividitasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. අප්‌පටිවිදිතසුත්‌තවණ්‌ණනා • 7. Appaṭividitasuttavaṇṇanā
