| Library / Tipiṭaka / තිපිටක • Tipiṭaka / උදානපාළි • Udānapāḷi |
2. අප්‌පායුකසුත්‌තං
2. Appāyukasuttaṃ
42. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො ආයස්‌මා ආනන්‌දො සායන්‌හසමයං පටිසල්‌ලානා 1 වුට්‌ඨිතො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘අච්‌ඡරියං, භන්‌තෙ, අබ්‌භුතං, භන්‌තෙ! යාව අප්‌පායුකා හි, භන්‌තෙ, භගවතො මාතා අහොසි, සත්‌තාහජාතෙ භගවති භගවතො මාතා කාලමකාසි, තුසිතං කායං උපපජ්‌ජී’’ති.
42. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā ānando sāyanhasamayaṃ paṭisallānā 2 vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘acchariyaṃ, bhante, abbhutaṃ, bhante! Yāva appāyukā hi, bhante, bhagavato mātā ahosi, sattāhajāte bhagavati bhagavato mātā kālamakāsi, tusitaṃ kāyaṃ upapajjī’’ti.
‘‘එවමෙතං, ආනන්‌ද 3, අප්‌පායුකා හි, ආනන්‌ද, බොධිසත්‌තමාතරො හොන්‌ති. සත්‌තාහජාතෙසු බොධිසත්‌තෙසු බොධිසත්‌තමාතරො කාලං කරොන්‌ති, තුසිතං කායං උපපජ්‌ජන්‌තී’’ති.
‘‘Evametaṃ, ānanda 4, appāyukā hi, ānanda, bodhisattamātaro honti. Sattāhajātesu bodhisattesu bodhisattamātaro kālaṃ karonti, tusitaṃ kāyaṃ upapajjantī’’ti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘යෙ කෙචි භූතා භවිස්‌සන්‌ති යෙ වාපි,
‘‘Ye keci bhūtā bhavissanti ye vāpi,
සබ්‌බෙ ගමිස්‌සන්‌ති පහාය දෙහං;
Sabbe gamissanti pahāya dehaṃ;
තං සබ්‌බජානිං කුසලො විදිත්‌වා,
Taṃ sabbajāniṃ kusalo viditvā,
ආතාපියො බ්‍රහ්‌මචරියං චරෙය්‍යා’’ති. දුතියං;
Ātāpiyo brahmacariyaṃ careyyā’’ti. dutiyaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 2. අප්‌පායුකසුත්‌තවණ්‌ණනා • 2. Appāyukasuttavaṇṇanā
