| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
17. ஆபுச்ச²கரணனித்³தே³ஸவண்ணனா
17. Āpucchakaraṇaniddesavaṇṇanā
161. ஆபுச்ச²கரணந்தி ஆபுச்சா²ய கரணங். அனஜ்ஜி²ட்டோ²வாதி அனாணத்தோவ, அயாசிதோ ஏவ வா. ந ச விஸ்ஸஜேதி புச்சி²தபஞ்ஹங் ந விஸ்ஸஜ்ஜெய்ய ச, ஆபுச்சி²த்வா வா யாசிதோ வா யதா²வுத்தமேதங் காதுங் லப⁴தீதி அதி⁴ப்பாயோ.
161.Āpucchakaraṇanti āpucchāya karaṇaṃ. Anajjhiṭṭhovāti anāṇattova, ayācito eva vā. Na ca vissajeti pucchitapañhaṃ na vissajjeyya ca, āpucchitvā vā yācito vā yathāvuttametaṃ kātuṃ labhatīti adhippāyo.
162. ஆபுச்சி²த்வா கதெ²ந்தஸ்ஸாதி அத்தனோ வுட்³ட⁴ங் ஆபுச்சி²த்வா த⁴ம்மாதி³கங் பா⁴ஸந்தஸ்ஸ. புன வுட்³ட⁴தராக³மேதி புன அஞ்ஞஸ்ஸ வுட்³ட⁴தரஸ்ஸ ஆக³மனே ஸதீதி அத்தோ². புனஆபுச்ச²னங் நத்தீ²தி பா⁴ஸிதப்³ப³ங் ட²பெத்வா புன ஆபுச்ச²னகிச்சங் நத்தீ²தி அத்தோ². ஸங்க⁴த்தே²ரே அஸதி ஆரத்³த⁴ம்பி அட்ட²பெத்வா கதெ²ந்தஸ்ஸாபி ஏஸேவ நயோ. ப⁴த்தக்³கே³ அனுமோத³தோ ச ஆபுச்ச²னங் நத்தீ²தி ஸம்ப³ந்தோ⁴. அனுமோத³தோதி தா³யகேஹி யாசிதஸ்ஸ தங்தங்புஞ்ஞானுமோத³னவஸேன த⁴ம்மகத²ங் கரோதோ ச. அனுமோத³னஞ்ச தே²ராதெ⁴ய்யங். ‘‘அனுஜானாமி, பி⁴க்க²வே தே²ரேன பி⁴க்கு²னா ப⁴த்தக்³கே³ அனுமோதி³து’’ந்தி (சூளவ॰ 362) ஹி வுத்தங். ‘‘ஸசே மனுஸ்ஸா அத்தனோ அபி⁴ருசிகேன ஏகேன அனுமோத³னங் காரெந்தி, நேவ தஸ்ஸ அனுமோத³தோ ஆபத்தி, ந மஹாதே²ரஸ்ஸ பா⁴ரோ ஹோதி. உபனிஸின்னகதா²யமேவ ஹி மனுஸ்ஸேஸு கதா²பெந்தேஸு மஹாதே²ரோ ஆபுச்சி²தப்³போ³’’தி அட்ட²கதா²யங் (சுளவ॰ அட்ட²॰ 362) வுத்தங்.
162.Āpucchitvākathentassāti attano vuḍḍhaṃ āpucchitvā dhammādikaṃ bhāsantassa. Puna vuḍḍhatarāgameti puna aññassa vuḍḍhatarassa āgamane satīti attho. Punaāpucchanaṃ natthīti bhāsitabbaṃ ṭhapetvā puna āpucchanakiccaṃ natthīti attho. Saṅghatthere asati āraddhampi aṭṭhapetvā kathentassāpi eseva nayo. Bhattagge anumodato ca āpucchanaṃ natthīti sambandho. Anumodatoti dāyakehi yācitassa taṃtaṃpuññānumodanavasena dhammakathaṃ karoto ca. Anumodanañca therādheyyaṃ. ‘‘Anujānāmi, bhikkhave therena bhikkhunā bhattagge anumoditu’’nti (cūḷava. 362) hi vuttaṃ. ‘‘Sace manussā attano abhirucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo’’ti aṭṭhakathāyaṃ (cuḷava. aṭṭha. 362) vuttaṃ.
163. வுட்³டே⁴ன ஏகவிஹாரகே வஸந்தோ சாதி ஸம்ப³ந்தோ⁴. வுட்³டே⁴னாதி வுட்³டே⁴ன ஸத்³தி⁴ங். ஏகவிஹாரகேதி ஸவனூபசாரே கு²த்³த³கவிஹாரே, ந மஹாவிஹாரே. குச்சி²தத்தே² ஹி கப்பச்சயோ. ந ஸஜ்ஜா²யெய்யாதி ஸஜ்ஜா²யனங் ந கரெய்ய.
163. Vuḍḍhena ekavihārake vasanto cāti sambandho. Vuḍḍhenāti vuḍḍhena saddhiṃ. Ekavihāraketi savanūpacāre khuddakavihāre, na mahāvihāre. Kucchitatthe hi kappaccayo. Na sajjhāyeyyāti sajjhāyanaṃ na kareyya.
164. ‘‘த⁴ம்மங் ந பா⁴ஸயே’’திஆதீ³ஸு அனாபுச்சா²தி ஸம்ப³ந்தி⁴தப்³ப³ங். ந ச விஜ்ஜ²பேதி ந ச நிப்³பா³யெய்ய. வாதபானஞ்ச ஆலோகஸந்தி⁴ப²லகங் கவாடஞ்ச த்³வாரப²லகங் வாதபானகவாடங் வா ந விவரெய்ய ந த²கெய்ய சாதி ந-காரோ ஸப்³ப³த்த² யோஜேதப்³போ³.
164.‘‘Dhammaṃ na bhāsaye’’tiādīsu anāpucchāti sambandhitabbaṃ. Na ca vijjhapeti na ca nibbāyeyya. Vātapānañca ālokasandhiphalakaṃ kavāṭañca dvāraphalakaṃ vātapānakavāṭaṃ vā na vivareyya na thakeyya cāti na-kāro sabbattha yojetabbo.
165. ஏகசங்கமே வுட்³டே⁴ன சங்கமந்தோபி யேன வுட்³டோ⁴, தேன பரிவத்தயேதி யோஜனா. யேன தேனாதி பு⁴ம்மத்தே² கரணவசனங், யத்த² வுட்³டோ⁴, தத்தா²தி அத்தோ², வுட்³ட⁴ங் ஓஹாய அஞ்ஞதோ ந க³ந்தப்³ப³ந்தி அதி⁴ப்பாயோ. ஸோதி நவகோ. ஏனந்தி வுட்³ட⁴ங். ஸப்³ப³த்த² து³க்கடங். அயஞ்ஹி க²ந்த⁴கத⁴ம்மதா யத்த² ந-காரேன படிஸேதோ⁴, தத்த² து³க்கடந்தி.
165. Ekacaṅkame vuḍḍhena caṅkamantopi yena vuḍḍho, tena parivattayeti yojanā. Yena tenāti bhummatthe karaṇavacanaṃ, yattha vuḍḍho, tatthāti attho, vuḍḍhaṃ ohāya aññato na gantabbanti adhippāyo. Soti navako. Enanti vuḍḍhaṃ. Sabbattha dukkaṭaṃ. Ayañhi khandhakadhammatā yattha na-kārena paṭisedho, tattha dukkaṭanti.
ஆபுச்ச²கரணனித்³தே³ஸவண்ணனா நிட்டி²தா.
Āpucchakaraṇaniddesavaṇṇanā niṭṭhitā.
