| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၁၇. အာပုစ္ဆကရဏနိဒ္ဒေသဝဏ္ဏနာ
17. Āpucchakaraṇaniddesavaṇṇanā
၁၆၁. ထေရေနာတိ သင္ဃတ္ထေရေန။
161.Therenāti saṅghattherena.
၁၆၂. တတ္ထ တတ္ထ သန္နိပတိတာနံ သဗ္ဗေသံ ဝုဍ္ဎော ဝုဍ္ဎတရော, တသ္မိံ ဝုဍ္ဎတရာဂမေ ပုန အာပုစ္ဆနံ နတ္ထိ။ ဘတ္တဂ္ဂေ စာနုမောဒတောတိ ဧတ္ထ ဒာနပတိနာ ယာစိတေန ဒဟရေန ဝုဍ္ဎေန အနာပုစ္ဆိတ္ဝာ ကထေတုံ ဝဋ္ဋတီတိ ဝဒန္တိ။
162. Tattha tattha sannipatitānaṃ sabbesaṃ vuḍḍho vuḍḍhataro, tasmiṃ vuḍḍhatarāgame puna āpucchanaṃ natthi. Bhattagge cānumodatoti ettha dānapatinā yācitena daharena vuḍḍhena anāpucchitvā kathetuṃ vaṭṭatīti vadanti.
၁၆၃. ဧကဝိဟာရကေတိ ဧကောဝရကေ ဝုဍ္ဎေန ဝသန္တော အနာပုစ္ဆာ န သဇ္ဈာယေယ္ယာတိ အတ္ထော။ ဥဒ္ဒေသံ ပရိပုစ္ဆဉ္စ နော ဒဒေတိ ဥဒ္ဒေသံ ဝာ ပရိပုစ္ဆံ ဝာ နော ဒဒေယ္ယ။
163.Ekavihāraketi ekovarake vuḍḍhena vasanto anāpucchā na sajjhāyeyyāti attho. Uddesaṃ paripucchañca no dadeti uddesaṃ vā paripucchaṃ vā no dadeyya.
၁၆၄. န ဝိဝရေယ္ယ န ထကေယ္ယ စာတိ သမ္ဗန္ဓော။ ဒ္ဝာရံ နာမ မဟာဝဠဉ္ဇံ, တတ္ထ အာပုစ္ဆနကိစ္စံ နတ္ထိ။
164. Na vivareyya na thakeyya cāti sambandho. Dvāraṃ nāma mahāvaḷañjaṃ, tattha āpucchanakiccaṃ natthi.
၁၆၅. ဝုဍ္ဎေန စင္ကမေ စင္ကမန္တောပိ ယေန ဝုဍ္ဎော, တေန ပရိဝတ္တယေတိ သမ္ဗန္ဓော။ အာပုစ္ဆကရဏဝိနိစ္ဆယော။
165. Vuḍḍhena caṅkame caṅkamantopi yena vuḍḍho, tena parivattayeti sambandho. Āpucchakaraṇavinicchayo.
အာပုစ္ဆကရဏနိဒ္ဒေသဝဏ္ဏနာ နိဋ္ဌိတာ။
Āpucchakaraṇaniddesavaṇṇanā niṭṭhitā.
