| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೧೭. ಆಪುಚ್ಛಕರಣನಿದ್ದೇಸವಣ್ಣನಾ
17. Āpucchakaraṇaniddesavaṇṇanā
೧೬೧. ಆಪುಚ್ಛಕರಣನ್ತಿ ಆಪುಚ್ಛಾಯ ಕರಣಂ। ಅನಜ್ಝಿಟ್ಠೋವಾತಿ ಅನಾಣತ್ತೋವ, ಅಯಾಚಿತೋ ಏವ ವಾ। ನ ಚ ವಿಸ್ಸಜೇತಿ ಪುಚ್ಛಿತಪಞ್ಹಂ ನ ವಿಸ್ಸಜ್ಜೇಯ್ಯ ಚ, ಆಪುಚ್ಛಿತ್ವಾ ವಾ ಯಾಚಿತೋ ವಾ ಯಥಾವುತ್ತಮೇತಂ ಕಾತುಂ ಲಭತೀತಿ ಅಧಿಪ್ಪಾಯೋ।
161.Āpucchakaraṇanti āpucchāya karaṇaṃ. Anajjhiṭṭhovāti anāṇattova, ayācito eva vā. Na ca vissajeti pucchitapañhaṃ na vissajjeyya ca, āpucchitvā vā yācito vā yathāvuttametaṃ kātuṃ labhatīti adhippāyo.
೧೬೨. ಆಪುಚ್ಛಿತ್ವಾ ಕಥೇನ್ತಸ್ಸಾತಿ ಅತ್ತನೋ ವುಡ್ಢಂ ಆಪುಚ್ಛಿತ್ವಾ ಧಮ್ಮಾದಿಕಂ ಭಾಸನ್ತಸ್ಸ। ಪುನ ವುಡ್ಢತರಾಗಮೇತಿ ಪುನ ಅಞ್ಞಸ್ಸ ವುಡ್ಢತರಸ್ಸ ಆಗಮನೇ ಸತೀತಿ ಅತ್ಥೋ। ಪುನಆಪುಚ್ಛನಂ ನತ್ಥೀತಿ ಭಾಸಿತಬ್ಬಂ ಠಪೇತ್ವಾ ಪುನ ಆಪುಚ್ಛನಕಿಚ್ಚಂ ನತ್ಥೀತಿ ಅತ್ಥೋ। ಸಙ್ಘತ್ಥೇರೇ ಅಸತಿ ಆರದ್ಧಮ್ಪಿ ಅಟ್ಠಪೇತ್ವಾ ಕಥೇನ್ತಸ್ಸಾಪಿ ಏಸೇವ ನಯೋ। ಭತ್ತಗ್ಗೇ ಅನುಮೋದತೋ ಚ ಆಪುಚ್ಛನಂ ನತ್ಥೀತಿ ಸಮ್ಬನ್ಧೋ। ಅನುಮೋದತೋತಿ ದಾಯಕೇಹಿ ಯಾಚಿತಸ್ಸ ತಂತಂಪುಞ್ಞಾನುಮೋದನವಸೇನ ಧಮ್ಮಕಥಂ ಕರೋತೋ ಚ। ಅನುಮೋದನಞ್ಚ ಥೇರಾಧೇಯ್ಯಂ। ‘‘ಅನುಜಾನಾಮಿ, ಭಿಕ್ಖವೇ ಥೇರೇನ ಭಿಕ್ಖುನಾ ಭತ್ತಗ್ಗೇ ಅನುಮೋದಿತು’’ನ್ತಿ (ಚೂಳವ॰ ೩೬೨) ಹಿ ವುತ್ತಂ। ‘‘ಸಚೇ ಮನುಸ್ಸಾ ಅತ್ತನೋ ಅಭಿರುಚಿಕೇನ ಏಕೇನ ಅನುಮೋದನಂ ಕಾರೇನ್ತಿ, ನೇವ ತಸ್ಸ ಅನುಮೋದತೋ ಆಪತ್ತಿ, ನ ಮಹಾಥೇರಸ್ಸ ಭಾರೋ ಹೋತಿ। ಉಪನಿಸಿನ್ನಕಥಾಯಮೇವ ಹಿ ಮನುಸ್ಸೇಸು ಕಥಾಪೇನ್ತೇಸು ಮಹಾಥೇರೋ ಆಪುಚ್ಛಿತಬ್ಬೋ’’ತಿ ಅಟ್ಠಕಥಾಯಂ (ಚುಳವ॰ ಅಟ್ಠ॰ ೩೬೨) ವುತ್ತಂ।
162.Āpucchitvākathentassāti attano vuḍḍhaṃ āpucchitvā dhammādikaṃ bhāsantassa. Puna vuḍḍhatarāgameti puna aññassa vuḍḍhatarassa āgamane satīti attho. Punaāpucchanaṃ natthīti bhāsitabbaṃ ṭhapetvā puna āpucchanakiccaṃ natthīti attho. Saṅghatthere asati āraddhampi aṭṭhapetvā kathentassāpi eseva nayo. Bhattagge anumodato ca āpucchanaṃ natthīti sambandho. Anumodatoti dāyakehi yācitassa taṃtaṃpuññānumodanavasena dhammakathaṃ karoto ca. Anumodanañca therādheyyaṃ. ‘‘Anujānāmi, bhikkhave therena bhikkhunā bhattagge anumoditu’’nti (cūḷava. 362) hi vuttaṃ. ‘‘Sace manussā attano abhirucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo’’ti aṭṭhakathāyaṃ (cuḷava. aṭṭha. 362) vuttaṃ.
೧೬೩. ವುಡ್ಢೇನ ಏಕವಿಹಾರಕೇ ವಸನ್ತೋ ಚಾತಿ ಸಮ್ಬನ್ಧೋ। ವುಡ್ಢೇನಾತಿ ವುಡ್ಢೇನ ಸದ್ಧಿಂ। ಏಕವಿಹಾರಕೇತಿ ಸವನೂಪಚಾರೇ ಖುದ್ದಕವಿಹಾರೇ, ನ ಮಹಾವಿಹಾರೇ। ಕುಚ್ಛಿತತ್ಥೇ ಹಿ ಕಪ್ಪಚ್ಚಯೋ। ನ ಸಜ್ಝಾಯೇಯ್ಯಾತಿ ಸಜ್ಝಾಯನಂ ನ ಕರೇಯ್ಯ।
163. Vuḍḍhena ekavihārake vasanto cāti sambandho. Vuḍḍhenāti vuḍḍhena saddhiṃ. Ekavihāraketi savanūpacāre khuddakavihāre, na mahāvihāre. Kucchitatthe hi kappaccayo. Na sajjhāyeyyāti sajjhāyanaṃ na kareyya.
೧೬೪. ‘‘ಧಮ್ಮಂ ನ ಭಾಸಯೇ’’ತಿಆದೀಸು ಅನಾಪುಚ್ಛಾತಿ ಸಮ್ಬನ್ಧಿತಬ್ಬಂ। ನ ಚ ವಿಜ್ಝಪೇತಿ ನ ಚ ನಿಬ್ಬಾಯೇಯ್ಯ। ವಾತಪಾನಞ್ಚ ಆಲೋಕಸನ್ಧಿಫಲಕಂ ಕವಾಟಞ್ಚ ದ್ವಾರಫಲಕಂ ವಾತಪಾನಕವಾಟಂ ವಾ ನ ವಿವರೇಯ್ಯ ನ ಥಕೇಯ್ಯ ಚಾತಿ ನ-ಕಾರೋ ಸಬ್ಬತ್ಥ ಯೋಜೇತಬ್ಬೋ।
164.‘‘Dhammaṃ na bhāsaye’’tiādīsu anāpucchāti sambandhitabbaṃ. Na ca vijjhapeti na ca nibbāyeyya. Vātapānañca ālokasandhiphalakaṃ kavāṭañca dvāraphalakaṃ vātapānakavāṭaṃ vā na vivareyya na thakeyya cāti na-kāro sabbattha yojetabbo.
೧೬೫. ಏಕಚಙ್ಕಮೇ ವುಡ್ಢೇನ ಚಙ್ಕಮನ್ತೋಪಿ ಯೇನ ವುಡ್ಢೋ, ತೇನ ಪರಿವತ್ತಯೇತಿ ಯೋಜನಾ। ಯೇನ ತೇನಾತಿ ಭುಮ್ಮತ್ಥೇ ಕರಣವಚನಂ, ಯತ್ಥ ವುಡ್ಢೋ, ತತ್ಥಾತಿ ಅತ್ಥೋ, ವುಡ್ಢಂ ಓಹಾಯ ಅಞ್ಞತೋ ನ ಗನ್ತಬ್ಬನ್ತಿ ಅಧಿಪ್ಪಾಯೋ। ಸೋತಿ ನವಕೋ। ಏನನ್ತಿ ವುಡ್ಢಂ। ಸಬ್ಬತ್ಥ ದುಕ್ಕಟಂ। ಅಯಞ್ಹಿ ಖನ್ಧಕಧಮ್ಮತಾ ಯತ್ಥ ನ-ಕಾರೇನ ಪಟಿಸೇಧೋ, ತತ್ಥ ದುಕ್ಕಟನ್ತಿ।
165. Ekacaṅkame vuḍḍhena caṅkamantopi yena vuḍḍho, tena parivattayeti yojanā. Yena tenāti bhummatthe karaṇavacanaṃ, yattha vuḍḍho, tatthāti attho, vuḍḍhaṃ ohāya aññato na gantabbanti adhippāyo. Soti navako. Enanti vuḍḍhaṃ. Sabbattha dukkaṭaṃ. Ayañhi khandhakadhammatā yattha na-kārena paṭisedho, tattha dukkaṭanti.
ಆಪುಚ್ಛಕರಣನಿದ್ದೇಸವಣ್ಣನಾ ನಿಟ್ಠಿತಾ।
Āpucchakaraṇaniddesavaṇṇanā niṭṭhitā.
