| Library / Tipiṭaka / തിപിടക • Tipiṭaka / ഖുദ്ദസിക്ഖാ-മൂലസിക്ഖാ • Khuddasikkhā-mūlasikkhā |
൧൭. ആപുച്ഛകരണനിദ്ദേസവണ്ണനാ
17. Āpucchakaraṇaniddesavaṇṇanā
൧൬൧. ആപുച്ഛകരണന്തി ആപുച്ഛായ കരണം. അനജ്ഝിട്ഠോവാതി അനാണത്തോവ, അയാചിതോ ഏവ വാ. ന ച വിസ്സജേതി പുച്ഛിതപഞ്ഹം ന വിസ്സജ്ജേയ്യ ച, ആപുച്ഛിത്വാ വാ യാചിതോ വാ യഥാവുത്തമേതം കാതും ലഭതീതി അധിപ്പായോ.
161.Āpucchakaraṇanti āpucchāya karaṇaṃ. Anajjhiṭṭhovāti anāṇattova, ayācito eva vā. Na ca vissajeti pucchitapañhaṃ na vissajjeyya ca, āpucchitvā vā yācito vā yathāvuttametaṃ kātuṃ labhatīti adhippāyo.
൧൬൨. ആപുച്ഛിത്വാ കഥേന്തസ്സാതി അത്തനോ വുഡ്ഢം ആപുച്ഛിത്വാ ധമ്മാദികം ഭാസന്തസ്സ. പുന വുഡ്ഢതരാഗമേതി പുന അഞ്ഞസ്സ വുഡ്ഢതരസ്സ ആഗമനേ സതീതി അത്ഥോ. പുനആപുച്ഛനം നത്ഥീതി ഭാസിതബ്ബം ഠപേത്വാ പുന ആപുച്ഛനകിച്ചം നത്ഥീതി അത്ഥോ. സങ്ഘത്ഥേരേ അസതി ആരദ്ധമ്പി അട്ഠപേത്വാ കഥേന്തസ്സാപി ഏസേവ നയോ. ഭത്തഗ്ഗേ അനുമോദതോ ച ആപുച്ഛനം നത്ഥീതി സമ്ബന്ധോ. അനുമോദതോതി ദായകേഹി യാചിതസ്സ തംതംപുഞ്ഞാനുമോദനവസേന ധമ്മകഥം കരോതോ ച. അനുമോദനഞ്ച ഥേരാധേയ്യം. ‘‘അനുജാനാമി, ഭിക്ഖവേ ഥേരേന ഭിക്ഖുനാ ഭത്തഗ്ഗേ അനുമോദിതു’’ന്തി (ചൂളവ॰ ൩൬൨) ഹി വുത്തം. ‘‘സചേ മനുസ്സാ അത്തനോ അഭിരുചികേന ഏകേന അനുമോദനം കാരേന്തി, നേവ തസ്സ അനുമോദതോ ആപത്തി, ന മഹാഥേരസ്സ ഭാരോ ഹോതി. ഉപനിസിന്നകഥായമേവ ഹി മനുസ്സേസു കഥാപേന്തേസു മഹാഥേരോ ആപുച്ഛിതബ്ബോ’’തി അട്ഠകഥായം (ചുളവ॰ അട്ഠ॰ ൩൬൨) വുത്തം.
162.Āpucchitvākathentassāti attano vuḍḍhaṃ āpucchitvā dhammādikaṃ bhāsantassa. Puna vuḍḍhatarāgameti puna aññassa vuḍḍhatarassa āgamane satīti attho. Punaāpucchanaṃ natthīti bhāsitabbaṃ ṭhapetvā puna āpucchanakiccaṃ natthīti attho. Saṅghatthere asati āraddhampi aṭṭhapetvā kathentassāpi eseva nayo. Bhattagge anumodato ca āpucchanaṃ natthīti sambandho. Anumodatoti dāyakehi yācitassa taṃtaṃpuññānumodanavasena dhammakathaṃ karoto ca. Anumodanañca therādheyyaṃ. ‘‘Anujānāmi, bhikkhave therena bhikkhunā bhattagge anumoditu’’nti (cūḷava. 362) hi vuttaṃ. ‘‘Sace manussā attano abhirucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo’’ti aṭṭhakathāyaṃ (cuḷava. aṭṭha. 362) vuttaṃ.
൧൬൩. വുഡ്ഢേന ഏകവിഹാരകേ വസന്തോ ചാതി സമ്ബന്ധോ. വുഡ്ഢേനാതി വുഡ്ഢേന സദ്ധിം. ഏകവിഹാരകേതി സവനൂപചാരേ ഖുദ്ദകവിഹാരേ, ന മഹാവിഹാരേ. കുച്ഛിതത്ഥേ ഹി കപ്പച്ചയോ. ന സജ്ഝായേയ്യാതി സജ്ഝായനം ന കരേയ്യ.
163. Vuḍḍhena ekavihārake vasanto cāti sambandho. Vuḍḍhenāti vuḍḍhena saddhiṃ. Ekavihāraketi savanūpacāre khuddakavihāre, na mahāvihāre. Kucchitatthe hi kappaccayo. Na sajjhāyeyyāti sajjhāyanaṃ na kareyya.
൧൬൪. ‘‘ധമ്മം ന ഭാസയേ’’തിആദീസു അനാപുച്ഛാതി സമ്ബന്ധിതബ്ബം. ന ച വിജ്ഝപേതി ന ച നിബ്ബായേയ്യ. വാതപാനഞ്ച ആലോകസന്ധിഫലകം കവാടഞ്ച ദ്വാരഫലകം വാതപാനകവാടം വാ ന വിവരേയ്യ ന ഥകേയ്യ ചാതി ന-കാരോ സബ്ബത്ഥ യോജേതബ്ബോ.
164.‘‘Dhammaṃ na bhāsaye’’tiādīsu anāpucchāti sambandhitabbaṃ. Na ca vijjhapeti na ca nibbāyeyya. Vātapānañca ālokasandhiphalakaṃ kavāṭañca dvāraphalakaṃ vātapānakavāṭaṃ vā na vivareyya na thakeyya cāti na-kāro sabbattha yojetabbo.
൧൬൫. ഏകചങ്കമേ വുഡ്ഢേന ചങ്കമന്തോപി യേന വുഡ്ഢോ, തേന പരിവത്തയേതി യോജനാ. യേന തേനാതി ഭുമ്മത്ഥേ കരണവചനം, യത്ഥ വുഡ്ഢോ, തത്ഥാതി അത്ഥോ, വുഡ്ഢം ഓഹായ അഞ്ഞതോ ന ഗന്തബ്ബന്തി അധിപ്പായോ. സോതി നവകോ. ഏനന്തി വുഡ്ഢം. സബ്ബത്ഥ ദുക്കടം. അയഞ്ഹി ഖന്ധകധമ്മതാ യത്ഥ ന-കാരേന പടിസേധോ, തത്ഥ ദുക്കടന്തി.
165. Ekacaṅkame vuḍḍhena caṅkamantopi yena vuḍḍho, tena parivattayeti yojanā. Yena tenāti bhummatthe karaṇavacanaṃ, yattha vuḍḍho, tatthāti attho, vuḍḍhaṃ ohāya aññato na gantabbanti adhippāyo. Soti navako. Enanti vuḍḍhaṃ. Sabbattha dukkaṭaṃ. Ayañhi khandhakadhammatā yattha na-kārena paṭisedho, tattha dukkaṭanti.
ആപുച്ഛകരണനിദ്ദേസവണ്ണനാ നിട്ഠിതാ.
Āpucchakaraṇaniddesavaṇṇanā niṭṭhitā.
