| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. அபுஞ்ஞபஞ்ஹோ
6. Apuññapañho
6. ‘‘ப⁴ந்தே நாக³ஸேன, தும்ஹே ப⁴ணத² ‘யோ அஜானந்தோ பாணாதிபாதங் கரோதி, ஸோ ப³லவதரங் அபுஞ்ஞங் பஸவதீ’தி. புன ச ப⁴க³வதா வினயபஞ்ஞத்தியா ப⁴ணிதங் ‘அனாபத்தி அஜானந்தஸ்ஸா’தி. யதி³, ப⁴ந்தே நாக³ஸேன, அஜானித்வா பாணாதிபாதங் கரொந்தோ ப³லவதரங் அபுஞ்ஞங் பஸவதி, தேன ஹி ‘அனாபத்தி அஜானந்தஸ்ஸா’தி யங் வசனங், தங் மிச்சா². யதி³ அனாபத்தி அஜானந்தஸ்ஸ, தேன ஹி ‘அஜானித்வா பாணாதிபாதங் கரொந்தோ ப³லவதரங் அபுஞ்ஞங் பஸவதீ’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ து³ருத்தரோ து³ரதிக்கமோ தவானுப்பத்தோ, ஸோ தயா நிப்³பா³ஹிதப்³போ³’’தி.
6. ‘‘Bhante nāgasena, tumhe bhaṇatha ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca bhagavatā vinayapaññattiyā bhaṇitaṃ ‘anāpatti ajānantassā’ti. Yadi, bhante nāgasena, ajānitvā pāṇātipātaṃ karonto balavataraṃ apuññaṃ pasavati, tena hi ‘anāpatti ajānantassā’ti yaṃ vacanaṃ, taṃ micchā. Yadi anāpatti ajānantassa, tena hi ‘ajānitvā pāṇātipātaṃ karonto balavataraṃ apuññaṃ pasavatī’ti tampi vacanaṃ micchā. Ayampi ubhato koṭiko pañho duruttaro duratikkamo tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘யோ அஜானந்தோ பாணாதிபாதங் கரோதி, ஸோ ப³லவதரங் அபுஞ்ஞங் பஸவதீ’தி. புன ச வினயபஞ்ஞத்தியா ப⁴க³வதா ப⁴ணிதங் ‘அனாபத்தி அஜானந்தஸ்ஸா’தி. தத்த² அத்த²ந்தரங் அத்தி². கதமங் அத்த²ந்தரங் ? அத்தி², மஹாராஜ, ஆபத்தி ஸஞ்ஞாவிமொக்கா², அத்தி² ஆபத்தி நோஸஞ்ஞாவிமொக்கா². யாயங், மஹாராஜ, ஆபத்தி ஸஞ்ஞாவிமொக்கா², தங் ஆபத்திங் ஆரப்³ப⁴ ப⁴க³வதா ப⁴ணிதங் ‘அனாபத்தி அஜானந்தஸ்ஸா’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Bhāsitampetaṃ, mahārāja, bhagavatā ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca vinayapaññattiyā bhagavatā bhaṇitaṃ ‘anāpatti ajānantassā’ti. Tattha atthantaraṃ atthi. Katamaṃ atthantaraṃ ? Atthi, mahārāja, āpatti saññāvimokkhā, atthi āpatti nosaññāvimokkhā. Yāyaṃ, mahārāja, āpatti saññāvimokkhā, taṃ āpattiṃ ārabbha bhagavatā bhaṇitaṃ ‘anāpatti ajānantassā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
அபுஞ்ஞபஞ்ஹோ ச²ட்டோ².
Apuññapañho chaṭṭho.
