| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. အပုညပဉ္ဟော
6. Apuññapañho
၆. ‘‘ဘန္တေ နာဂသေန, တုမ္ဟေ ဘဏထ ‘ယော အဇာနန္တော ပာဏာတိပာတံ ကရောတိ, သော ဗလဝတရံ အပုညံ ပသဝတီ’တိ။ ပုန စ ဘဂဝတာ ဝိနယပညတ္တိယာ ဘဏိတံ ‘အနာပတ္တိ အဇာနန္တသ္သာ’တိ။ ယဒိ, ဘန္တေ နာဂသေန, အဇာနိတ္ဝာ ပာဏာတိပာတံ ကရောန္တော ဗလဝတရံ အပုညံ ပသဝတိ, တေန ဟိ ‘အနာပတ္တိ အဇာနန္တသ္သာ’တိ ယံ ဝစနံ, တံ မိစ္ဆာ။ ယဒိ အနာပတ္တိ အဇာနန္တသ္သ, တေန ဟိ ‘အဇာနိတ္ဝာ ပာဏာတိပာတံ ကရောန္တော ဗလဝတရံ အပုညံ ပသဝတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော ဒုရုတ္တရော ဒုရတိက္ကမော တဝာနုပ္ပတ္တော, သော တယာ နိဗ္ဗာဟိတဗ္ဗော’’တိ။
6. ‘‘Bhante nāgasena, tumhe bhaṇatha ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca bhagavatā vinayapaññattiyā bhaṇitaṃ ‘anāpatti ajānantassā’ti. Yadi, bhante nāgasena, ajānitvā pāṇātipātaṃ karonto balavataraṃ apuññaṃ pasavati, tena hi ‘anāpatti ajānantassā’ti yaṃ vacanaṃ, taṃ micchā. Yadi anāpatti ajānantassa, tena hi ‘ajānitvā pāṇātipātaṃ karonto balavataraṃ apuññaṃ pasavatī’ti tampi vacanaṃ micchā. Ayampi ubhato koṭiko pañho duruttaro duratikkamo tavānuppatto, so tayā nibbāhitabbo’’ti.
‘‘ဘာသိတမ္ပေတံ, မဟာရာဇ, ဘဂဝတာ ‘ယော အဇာနန္တော ပာဏာတိပာတံ ကရောတိ, သော ဗလဝတရံ အပုညံ ပသဝတီ’တိ။ ပုန စ ဝိနယပညတ္တိယာ ဘဂဝတာ ဘဏိတံ ‘အနာပတ္တိ အဇာနန္တသ္သာ’တိ။ တတ္ထ အတ္ထန္တရံ အတ္ထိ။ ကတမံ အတ္ထန္တရံ ? အတ္ထိ, မဟာရာဇ, အာပတ္တိ သညာဝိမောက္ခာ, အတ္ထိ အာပတ္တိ နောသညာဝိမောက္ခာ။ ယာယံ, မဟာရာဇ, အာပတ္တိ သညာဝိမောက္ခာ, တံ အာပတ္တိံ အာရဗ္ဘ ဘဂဝတာ ဘဏိတံ ‘အနာပတ္တိ အဇာနန္တသ္သာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။
‘‘Bhāsitampetaṃ, mahārāja, bhagavatā ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca vinayapaññattiyā bhagavatā bhaṇitaṃ ‘anāpatti ajānantassā’ti. Tattha atthantaraṃ atthi. Katamaṃ atthantaraṃ ? Atthi, mahārāja, āpatti saññāvimokkhā, atthi āpatti nosaññāvimokkhā. Yāyaṃ, mahārāja, āpatti saññāvimokkhā, taṃ āpattiṃ ārabbha bhagavatā bhaṇitaṃ ‘anāpatti ajānantassā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
အပုညပဉ္ဟော ဆဋ္ဌော။
Apuññapañho chaṭṭho.
