| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. අපුඤ්‌ඤපඤ්‌හො
6. Apuññapañho
6. ‘‘භන්‌තෙ නාගසෙන, තුම්‌හෙ භණථ ‘යො අජානන්‌තො පාණාතිපාතං කරොති, සො බලවතරං අපුඤ්‌ඤං පසවතී’ති. පුන ච භගවතා විනයපඤ්‌ඤත්‌තියා භණිතං ‘අනාපත්‌ති අජානන්‌තස්‌සා’ති. යදි, භන්‌තෙ නාගසෙන, අජානිත්‌වා පාණාතිපාතං කරොන්‌තො බලවතරං අපුඤ්‌ඤං පසවති, තෙන හි ‘අනාපත්‌ති අජානන්‌තස්‌සා’ති යං වචනං, තං මිච්‌ඡා. යදි අනාපත්‌ති අජානන්‌තස්‌ස, තෙන හි ‘අජානිත්‌වා පාණාතිපාතං කරොන්‌තො බලවතරං අපුඤ්‌ඤං පසවතී’ති තම්‌පි වචනං මිච්‌ඡා. අයම්‌පි උභතො කොටිකො පඤ්‌හො දුරුත්‌තරො දුරතික්‌කමො තවානුප්‌පත්‌තො, සො තයා නිබ්‌බාහිතබ්‌බො’’ති.
6. ‘‘Bhante nāgasena, tumhe bhaṇatha ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca bhagavatā vinayapaññattiyā bhaṇitaṃ ‘anāpatti ajānantassā’ti. Yadi, bhante nāgasena, ajānitvā pāṇātipātaṃ karonto balavataraṃ apuññaṃ pasavati, tena hi ‘anāpatti ajānantassā’ti yaṃ vacanaṃ, taṃ micchā. Yadi anāpatti ajānantassa, tena hi ‘ajānitvā pāṇātipātaṃ karonto balavataraṃ apuññaṃ pasavatī’ti tampi vacanaṃ micchā. Ayampi ubhato koṭiko pañho duruttaro duratikkamo tavānuppatto, so tayā nibbāhitabbo’’ti.
‘‘භාසිතම්‌පෙතං, මහාරාජ, භගවතා ‘යො අජානන්‌තො පාණාතිපාතං කරොති, සො බලවතරං අපුඤ්‌ඤං පසවතී’ති. පුන ච විනයපඤ්‌ඤත්‌තියා භගවතා භණිතං ‘අනාපත්‌ති අජානන්‌තස්‌සා’ති. තත්‌ථ අත්‌ථන්‌තරං අත්‌ථි. කතමං අත්‌ථන්‌තරං ? අත්‌ථි, මහාරාජ, ආපත්‌ති සඤ්‌ඤාවිමොක්‌ඛා, අත්‌ථි ආපත්‌ති නොසඤ්‌ඤාවිමොක්‌ඛා. යායං, මහාරාජ, ආපත්‌ති සඤ්‌ඤාවිමොක්‌ඛා, තං ආපත්‌තිං ආරබ්‌භ භගවතා භණිතං ‘අනාපත්‌ති අජානන්‌තස්‌සා’’ති. ‘‘සාධු, භන්‌තෙ නාගසෙන, එවමෙතං තථා සම්‌පටිච්‌ඡාමී’’ති.
‘‘Bhāsitampetaṃ, mahārāja, bhagavatā ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca vinayapaññattiyā bhagavatā bhaṇitaṃ ‘anāpatti ajānantassā’ti. Tattha atthantaraṃ atthi. Katamaṃ atthantaraṃ ? Atthi, mahārāja, āpatti saññāvimokkhā, atthi āpatti nosaññāvimokkhā. Yāyaṃ, mahārāja, āpatti saññāvimokkhā, taṃ āpattiṃ ārabbha bhagavatā bhaṇitaṃ ‘anāpatti ajānantassā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
අපුඤ්‌ඤපඤ්‌හො ඡට්‌ඨො.
Apuññapañho chaṭṭho.
