| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2-3. ஆரப⁴திஸுத்தாதி³வண்ணனா
2-3. Ārabhatisuttādivaṇṇanā
142-3. து³தியே ஆரப⁴தீதி எத்த² ஆரம்ப⁴-ஸத்³தோ³ கம்மகிரியஹிங்ஸனவீரியகோபனாபத்திவீதிக்கமேஸு வத்ததி. ததா² ஹேஸ ‘‘யங் கிஞ்சி து³க்க²ங் ஸம்போ⁴தி, ஸப்³ப³ங் ஆரம்ப⁴பச்சயா’’தி (ஸு॰ நி॰ 749) கம்மே ஆக³தோ. ‘‘மஹாரம்பா⁴ மஹாயஞ்ஞா, ந தே ஹொந்தி மஹப்ப²லா’’தி (ஸங்॰ நி॰ 1.120; அ॰ நி॰ 4.39) கிரியாய. ‘‘ஸமணங் கோ³தமங் உத்³தி³ஸ்ஸ பாணங் ஆரப⁴ந்தீ’’தி (ம॰ நி॰ 2.51) ஹிங்ஸனே. ‘‘ஆரம்ப⁴த² நிக்க²மத², யுஞ்ஜத² பு³த்³த⁴ஸாஸனே’’தி (ஸங்॰ நி॰ 1.185; நெத்தி॰ 29; பேடகோ॰ 38; மி॰ ப॰ 5.1.4) வீரியே. ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³॰ நி॰ 1.10, 195; ம॰ நி॰ 1.293) கோபனே. ‘‘ஆரப⁴தி ச விப்படிஸாரீ ச ஹோதீ’’தி (அ॰ நி॰ 5.142; பு॰ ப॰ 191) அயங் பன ஆபத்திவீதிக்கமே ஆக³தோ, தஸ்மா ஆபத்திவீதிக்கமவஸேன ஆரப⁴தி சேவ, தப்பச்சயா ச விப்படிஸாரீ ஹோதீதி அயமெத்த² அத்தோ². யதா²பூ⁴தங் நப்பஜானாதீதி அனதி⁴க³தத்தா யதா²ஸபா⁴வதோ ந ஜானாதி. யத்த²ஸ்ஸாதி யஸ்மிங் அஸ்ஸ, யங் டா²னங் பத்வா ஏதஸ்ஸ புக்³க³லஸ்ஸ உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தீதி அத்தோ². கிங் பன பத்வா தே நிருஜ்ஜ²ந்தீதி? அரஹத்தமக்³க³ங், ப²லப்பத்தஸ்ஸ பன நிருத்³தா⁴ நாம ஹொந்தி. ஏவங் ஸந்தேபி இத⁴ மக்³க³கிச்சவஸேன பன ப²லமேவ வுத்தந்தி வேதி³தப்³ப³ங்.
142-3. Dutiye ārabhatīti ettha ārambha-saddo kammakiriyahiṃsanavīriyakopanāpattivītikkamesu vattati. Tathā hesa ‘‘yaṃ kiñci dukkhaṃ sambhoti, sabbaṃ ārambhapaccayā’’ti (su. ni. 749) kamme āgato. ‘‘Mahārambhā mahāyaññā, na te honti mahapphalā’’ti (saṃ. ni. 1.120; a. ni. 4.39) kiriyāya. ‘‘Samaṇaṃ gotamaṃ uddissa pāṇaṃ ārabhantī’’ti (ma. ni. 2.51) hiṃsane. ‘‘Ārambhatha nikkhamatha, yuñjatha buddhasāsane’’ti (saṃ. ni. 1.185; netti. 29; peṭako. 38; mi. pa. 5.1.4) vīriye. ‘‘Bījagāmabhūtagāmasamārambhā paṭivirato hotī’’ti (dī. ni. 1.10, 195; ma. ni. 1.293) kopane. ‘‘Ārabhati ca vippaṭisārī ca hotī’’ti (a. ni. 5.142; pu. pa. 191) ayaṃ pana āpattivītikkame āgato, tasmā āpattivītikkamavasena ārabhati ceva, tappaccayā ca vippaṭisārī hotīti ayamettha attho. Yathābhūtaṃ nappajānātīti anadhigatattā yathāsabhāvato na jānāti. Yatthassāti yasmiṃ assa, yaṃ ṭhānaṃ patvā etassa puggalassa uppannā pāpakā akusalā dhammā aparisesā nirujjhantīti attho. Kiṃ pana patvā te nirujjhantīti? Arahattamaggaṃ, phalappattassa pana niruddhā nāma honti. Evaṃ santepi idha maggakiccavasena pana phalameva vuttanti veditabbaṃ.
ஆரப⁴தீ ந விப்படிஸாரீ ஹோதீதி ஆபத்திங் ஆபஜ்ஜதி, தங் பனேஸ தே³ஸேதுங் ஸபா⁴க³புக்³க³லங் பரியேஸதி, தஸ்மா ந விப்படிஸாரீ ஹோதி. ந ஆரப⁴தி விப்படிஸாரீ ஹோதீதி ஆபத்திங் ந ஆபஜ்ஜதி, வினயபஞ்ஞத்தியங் பன அகோவித³த்தா அனாபத்தியா ஆபத்திஸஞ்ஞீ ஹுத்வா விப்படிஸாரீ ஹோதீதி ஏவமெத்த² அத்தோ² த³ட்ட²ப்³போ³. ‘‘ந ஆரப⁴தி ந விப்படிஸாரீ ஹோதீ’’தி யோ வுத்தோ, கதரோ ஸோ புக்³க³லோ? ஒஸ்ஸட்ட²வீரியபுக்³க³லோ. ஸோ ஹி ‘‘கிங் மே இமஸ்மிங் காலே பரினிப்³பா³னேன, அனாக³தே மெத்தெய்யஸம்மாஸம்பு³த்³த⁴காலே பரினிப்³பா³யிஸ்ஸாமீ’’தி விஸுத்³த⁴ஸீலோபி படிபத்திங் ந பூரேதி. ஸோ ஹி ‘‘கிமத்த²ங் ஆயஸ்மா பமத்தோ விஹரதி, புது²ஜ்ஜனஸ்ஸ நாம க³தி அனிப³த்³தா⁴, தஸ்மா ஹி மெத்தெய்யஸம்மாஸம்பு³த்³த⁴ஸ்ஸ ஸம்முகீ²பா⁴வங் லபெ⁴ய்யாஸி, அரஹத்தத்தா²ய விபஸ்ஸனங் பா⁴வேஹீ’’தி ஓவதி³தப்³போ³வ.
Ārabhatī na vippaṭisārī hotīti āpattiṃ āpajjati, taṃ panesa desetuṃ sabhāgapuggalaṃ pariyesati, tasmā na vippaṭisārī hoti. Na ārabhati vippaṭisārī hotīti āpattiṃ na āpajjati, vinayapaññattiyaṃ pana akovidattā anāpattiyā āpattisaññī hutvā vippaṭisārī hotīti evamettha attho daṭṭhabbo. ‘‘Na ārabhati na vippaṭisārī hotī’’ti yo vutto, kataro so puggalo? Ossaṭṭhavīriyapuggalo. So hi ‘‘kiṃ me imasmiṃ kāle parinibbānena, anāgate metteyyasammāsambuddhakāle parinibbāyissāmī’’ti visuddhasīlopi paṭipattiṃ na pūreti. So hi ‘‘kimatthaṃ āyasmā pamatto viharati, puthujjanassa nāma gati anibaddhā, tasmā hi metteyyasammāsambuddhassa sammukhībhāvaṃ labheyyāsi, arahattatthāya vipassanaṃ bhāvehī’’ti ovaditabbova.
ஸாதூ⁴தி ஆயாசனத்தே² நிபாதோ. இத³ங் வுத்தங் ஹோதி – யாவ அபரத்³த⁴ங் வத ஆயஸ்மதா, ஏவங் ஸந்தேபி மயங் ஆயஸ்மந்தங் யாசாம, தே³ஸேதப்³ப³யுத்தகஸ்ஸ தே³ஸனாய, வுட்டா²தப்³ப³யுத்தகஸ்ஸ வுட்டா²னேன, ஆவிகாதப்³ப³யுத்தகஸ்ஸ ஆவிகிரியாய ஆரம்ப⁴ஜே ஆஸவே பஹாய ஸுத்³த⁴ந்தே டி²தபா⁴வபச்சவெக்க²ணேன விப்படிஸாரஜே ஆஸவே படிவினோதெ³த்வா நீஹரித்வா விபஸ்ஸனாசித்தஞ்சேவ விபஸ்ஸனாபஞ்ஞஞ்ச வட்³டே⁴தூதி. அமுனா பஞ்சமேன புக்³க³லேனாதி ஏதேன பஞ்சமேன கீ²ணாஸவபுக்³க³லேன. ஸமஸமோ ப⁴விஸ்ஸதீதி லோகுத்தரகு³ணேஹி ஸமபா⁴வேனேவ ஸமோ ப⁴விஸ்ஸதீதி ஏவங் கீ²ணாஸவேன ஓவதி³தப்³போ³தி அத்தோ². ததியங் உத்தானமேவ.
Sādhūti āyācanatthe nipāto. Idaṃ vuttaṃ hoti – yāva aparaddhaṃ vata āyasmatā, evaṃ santepi mayaṃ āyasmantaṃ yācāma, desetabbayuttakassa desanāya, vuṭṭhātabbayuttakassa vuṭṭhānena, āvikātabbayuttakassa āvikiriyāya ārambhaje āsave pahāya suddhante ṭhitabhāvapaccavekkhaṇena vippaṭisāraje āsave paṭivinodetvā nīharitvā vipassanācittañceva vipassanāpaññañca vaḍḍhetūti. Amunā pañcamena puggalenāti etena pañcamena khīṇāsavapuggalena. Samasamo bhavissatīti lokuttaraguṇehi samabhāveneva samo bhavissatīti evaṃ khīṇāsavena ovaditabboti attho. Tatiyaṃ uttānameva.
ஆரப⁴திஸுத்தாதி³வண்ணனா நிட்டி²தா.
Ārabhatisuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
2. ஆரப⁴திஸுத்தங் • 2. Ārabhatisuttaṃ
3. ஸாரந்த³த³ஸுத்தங் • 3. Sārandadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
2. ஆரப⁴திஸுத்தவண்ணனா • 2. Ārabhatisuttavaṇṇanā
3. ஸாரந்த³த³ஸுத்தவண்ணனா • 3. Sārandadasuttavaṇṇanā
