| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૨. આરભતિસુત્તવણ્ણના
2. Ārabhatisuttavaṇṇanā
૧૪૨. દુતિયે આરભતિ ચ વિપ્પટિસારી ચ હોતીતિ આપત્તિવીતિક્કમનવસેન આરભતિ ચેવ, તપ્પચ્ચયા ચ વિપ્પટિસારી હોતિ. ચેતોવિમુત્તિં પઞ્ઞાવિમુત્તિન્તિ અરહત્તસમાધિઞ્ચેવ અરહત્તફલઞાણઞ્ચ. નપ્પજાનાતીતિ અનધિગતત્તા ન જાનાતિ. આરભતિ ન વિપ્પટિસારી હોતીતિ આપત્તિં આપજ્જતિ, વુટ્ઠિતત્તા પન ન વિપ્પટિસારી હોતિ. નારભતિ વિપ્પટિસારી હોતીતિ સકિં આપત્તિં આપજ્જિત્વા તતો વુટ્ઠાય પચ્છા કિઞ્ચાપિ નાપજ્જતિ, વિપ્પટિસારં પન વિનોદેતું ન સક્કોતિ. નારભતિ ન વિપ્પટિસારી હોતીતિ ન ચેવ આપત્તિં આપજ્જતિ, ન ચ વિપ્પટિસારી હોતિ. તઞ્ચ ચેતોવિમુત્તિં…પે॰… નિરુજ્ઝન્તીતિ અરહત્તં પન અપ્પત્તો હોતિ. પઞ્ચમનયેન ખીણાસવો કથિતો.
142. Dutiye ārabhati ca vippaṭisārī ca hotīti āpattivītikkamanavasena ārabhati ceva, tappaccayā ca vippaṭisārī hoti. Cetovimuttiṃ paññāvimuttinti arahattasamādhiñceva arahattaphalañāṇañca. Nappajānātīti anadhigatattā na jānāti. Ārabhati na vippaṭisārī hotīti āpattiṃ āpajjati, vuṭṭhitattā pana na vippaṭisārī hoti. Nārabhati vippaṭisārī hotīti sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkoti. Nārabhati na vippaṭisārī hotīti na ceva āpattiṃ āpajjati, na ca vippaṭisārī hoti. Tañca cetovimuttiṃ…pe… nirujjhantīti arahattaṃ pana appatto hoti. Pañcamanayena khīṇāsavo kathito.
આરમ્ભજાતિ આપત્તિવીતિક્કમસમ્ભવા. વિપ્પટિસારજાતિ વિપ્પટિસારતો જાતા. પવડ્ઢન્તીતિ પુનપ્પુનં ઉપ્પજ્જનેન વડ્ઢન્તિ. આરમ્ભજે આસવે પહાયાતિ વીતિક્કમસમ્ભવે આસવે આપત્તિદેસનાય વા આપત્તિવુટ્ઠાનેન વા પજહિત્વા. પટિવિનોદેત્વાતિ સુદ્ધન્તે ઠિતભાવપચ્ચવેક્ખણેન નીહરિત્વા. ચિત્તં પઞ્ઞઞ્ચ ભાવેતૂતિ વિપસ્સનાચિત્તઞ્ચ તંસમ્પયુત્તં પઞ્ઞઞ્ચ ભાવેતુ. સેસં ઇમિના ઉપાયેનેવ વેદિતબ્બન્તિ.
Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Ārambhaje āsave pahāyāti vītikkamasambhave āsave āpattidesanāya vā āpattivuṭṭhānena vā pajahitvā. Paṭivinodetvāti suddhante ṭhitabhāvapaccavekkhaṇena nīharitvā. Cittaṃ paññañca bhāvetūti vipassanācittañca taṃsampayuttaṃ paññañca bhāvetu. Sesaṃ iminā upāyeneva veditabbanti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૨. આરભતિસુત્તં • 2. Ārabhatisuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૨-૩. આરભતિસુત્તાદિવણ્ણના • 2-3. Ārabhatisuttādivaṇṇanā
