| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๒. อารภติสุตฺตวณฺณนา
2. Ārabhatisuttavaṇṇanā
๑๔๒. ทุติเย อารภติ จ วิปฺปฎิสารี จ โหตีติ อาปตฺติวีติกฺกมนวเสน อารภติ เจว, ตปฺปจฺจยา จ วิปฺปฎิสารี โหติฯ เจโตวิมุตฺติํ ปญฺญาวิมุตฺตินฺติ อรหตฺตสมาธิเญฺจว อรหตฺตผลญาณญฺจฯ นปฺปชานาตีติ อนธิคตตฺตา น ชานาติฯ อารภติ น วิปฺปฎิสารี โหตีติ อาปตฺติํ อาปชฺชติ, วุฎฺฐิตตฺตา ปน น วิปฺปฎิสารี โหติฯ นารภติ วิปฺปฎิสารี โหตีติ สกิํ อาปตฺติํ อาปชฺชิตฺวา ตโต วุฎฺฐาย ปจฺฉา กิญฺจาปิ นาปชฺชติ, วิปฺปฎิสารํ ปน วิโนเทตุํ น สโกฺกติฯ นารภติ น วิปฺปฎิสารี โหตีติ น เจว อาปตฺติํ อาปชฺชติ, น จ วิปฺปฎิสารี โหติฯ ตญฺจ เจโตวิมุตฺติํ…เป.… นิรุชฺฌนฺตีติ อรหตฺตํ ปน อปฺปโตฺต โหติฯ ปญฺจมนเยน ขีณาสโว กถิโตฯ
142. Dutiye ārabhati ca vippaṭisārī ca hotīti āpattivītikkamanavasena ārabhati ceva, tappaccayā ca vippaṭisārī hoti. Cetovimuttiṃ paññāvimuttinti arahattasamādhiñceva arahattaphalañāṇañca. Nappajānātīti anadhigatattā na jānāti. Ārabhati na vippaṭisārī hotīti āpattiṃ āpajjati, vuṭṭhitattā pana na vippaṭisārī hoti. Nārabhati vippaṭisārī hotīti sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkoti. Nārabhati na vippaṭisārī hotīti na ceva āpattiṃ āpajjati, na ca vippaṭisārī hoti. Tañca cetovimuttiṃ…pe… nirujjhantīti arahattaṃ pana appatto hoti. Pañcamanayena khīṇāsavo kathito.
อารมฺภชาติ อาปตฺติวีติกฺกมสมฺภวาฯ วิปฺปฎิสารชาติ วิปฺปฎิสารโต ชาตาฯ ปวฑฺฒนฺตีติ ปุนปฺปุนํ อุปฺปชฺชเนน วฑฺฒนฺติฯ อารมฺภเช อาสเว ปหายาติ วีติกฺกมสมฺภเว อาสเว อาปตฺติเทสนาย วา อาปตฺติวุฎฺฐาเนน วา ปชหิตฺวาฯ ปฎิวิโนเทตฺวาติ สุทฺธเนฺต ฐิตภาวปจฺจเวกฺขเณน นีหริตฺวาฯ จิตฺตํ ปญฺญญฺจ ภาเวตูติ วิปสฺสนาจิตฺตญฺจ ตํสมฺปยุตฺตํ ปญฺญญฺจ ภาเวตุฯ เสสํ อิมินา อุปาเยเนว เวทิตพฺพนฺติฯ
Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Ārambhaje āsave pahāyāti vītikkamasambhave āsave āpattidesanāya vā āpattivuṭṭhānena vā pajahitvā. Paṭivinodetvāti suddhante ṭhitabhāvapaccavekkhaṇena nīharitvā. Cittaṃ paññañca bhāvetūti vipassanācittañca taṃsampayuttaṃ paññañca bhāvetu. Sesaṃ iminā upāyeneva veditabbanti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. อารภติสุตฺตํ • 2. Ārabhatisuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๒-๓. อารภติสุตฺตาทิวณฺณนา • 2-3. Ārabhatisuttādivaṇṇanā
