| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
២. អារភតិសុត្តវណ្ណនា
2. Ārabhatisuttavaṇṇanā
១៤២. ទុតិយេ អារភតិ ច វិប្បដិសារី ច ហោតីតិ អាបត្តិវីតិក្កមនវសេន អារភតិ ចេវ, តប្បច្ចយា ច វិប្បដិសារី ហោតិ។ ចេតោវិមុត្តិំ បញ្ញាវិមុត្តិន្តិ អរហត្តសមាធិញ្ចេវ អរហត្តផលញាណញ្ច។ នប្បជានាតីតិ អនធិគតត្តា ន ជានាតិ។ អារភតិ ន វិប្បដិសារី ហោតីតិ អាបត្តិំ អាបជ្ជតិ, វុដ្ឋិតត្តា បន ន វិប្បដិសារី ហោតិ។ នារភតិ វិប្បដិសារី ហោតីតិ សកិំ អាបត្តិំ អាបជ្ជិត្វា តតោ វុដ្ឋាយ បច្ឆា កិញ្ចាបិ នាបជ្ជតិ, វិប្បដិសារំ បន វិនោទេតុំ ន សក្កោតិ។ នារភតិ ន វិប្បដិសារី ហោតីតិ ន ចេវ អាបត្តិំ អាបជ្ជតិ, ន ច វិប្បដិសារី ហោតិ។ តញ្ច ចេតោវិមុត្តិំ…បេ.… និរុជ្ឈន្តីតិ អរហត្តំ បន អប្បត្តោ ហោតិ។ បញ្ចមនយេន ខីណាសវោ កថិតោ។
142. Dutiye ārabhati ca vippaṭisārī ca hotīti āpattivītikkamanavasena ārabhati ceva, tappaccayā ca vippaṭisārī hoti. Cetovimuttiṃ paññāvimuttinti arahattasamādhiñceva arahattaphalañāṇañca. Nappajānātīti anadhigatattā na jānāti. Ārabhati na vippaṭisārī hotīti āpattiṃ āpajjati, vuṭṭhitattā pana na vippaṭisārī hoti. Nārabhati vippaṭisārī hotīti sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkoti. Nārabhati na vippaṭisārī hotīti na ceva āpattiṃ āpajjati, na ca vippaṭisārī hoti. Tañca cetovimuttiṃ…pe… nirujjhantīti arahattaṃ pana appatto hoti. Pañcamanayena khīṇāsavo kathito.
អារម្ភជាតិ អាបត្តិវីតិក្កមសម្ភវា។ វិប្បដិសារជាតិ វិប្បដិសារតោ ជាតា។ បវឌ្ឍន្តីតិ បុនប្បុនំ ឧប្បជ្ជនេន វឌ្ឍន្តិ។ អារម្ភជេ អាសវេ បហាយាតិ វីតិក្កមសម្ភវេ អាសវេ អាបត្តិទេសនាយ វា អាបត្តិវុដ្ឋានេន វា បជហិត្វា។ បដិវិនោទេត្វាតិ សុទ្ធន្តេ ឋិតភាវបច្ចវេក្ខណេន នីហរិត្វា។ ចិត្តំ បញ្ញញ្ច ភាវេតូតិ វិបស្សនាចិត្តញ្ច តំសម្បយុត្តំ បញ្ញញ្ច ភាវេតុ។ សេសំ ឥមិនា ឧបាយេនេវ វេទិតព្ពន្តិ។
Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Ārambhaje āsave pahāyāti vītikkamasambhave āsave āpattidesanāya vā āpattivuṭṭhānena vā pajahitvā. Paṭivinodetvāti suddhante ṭhitabhāvapaccavekkhaṇena nīharitvā. Cittaṃ paññañca bhāvetūti vipassanācittañca taṃsampayuttaṃ paññañca bhāvetu. Sesaṃ iminā upāyeneva veditabbanti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ២. អារភតិសុត្តំ • 2. Ārabhatisuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ២-៣. អារភតិសុត្តាទិវណ្ណនា • 2-3. Ārabhatisuttādivaṇṇanā
