| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. அரஹந்தஅபா⁴யனபஞ்ஹோ
9. Arahantaabhāyanapañho
9. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘விக³தப⁴யஸந்தாஸா அரஹந்தோ’தி. புன ச நக³ரே ராஜக³ஹே த⁴னபாலகங் ஹத்தி²ங் ப⁴க³வதி ஓபதந்தங் தி³ஸ்வா பஞ்ச கீ²ணாஸவஸதானி பரிச்சஜித்வா ஜினவரங் பக்கந்தானி தி³ஸாவிதி³ஸங் ஏகங் ட²பெத்வா தே²ரங் ஆனந்த³ங். கிங் நு கோ², ப⁴ந்தே நாக³ஸேன, தே அரஹந்தோ ப⁴யா பக்கந்தா, பஞ்ஞாயிஸ்ஸதி ஸகேன கம்மேனாதி த³ஸப³லங் பாதேதுகாமா பக்கந்தா , உதா³ஹு ததா²க³தஸ்ஸ அதுலங் விபுலமஸமங் பாடிஹாரியங் த³ட்டு²காமா பக்கந்தா? யதி³, ப⁴ந்தே நாக³ஸேன, ப⁴க³வதா ப⁴ணிதங் ‘விக³தப⁴யஸந்தாஸா அரஹந்தோ’தி, தேன ஹி ‘நக³ரே…பே॰… ஆனந்த³’ந்தி யங் வசனங் தங் மிச்சா². யதி³ நக³ரே ராஜக³ஹே த⁴னபாலகங் ஹத்தி²ங் ப⁴க³வதி ஓபதந்தங் தி³ஸ்வா பஞ்ச கீ²ணாஸவஸதானி பரிச்சஜித்வா ஜினவரங் பக்கந்தானி தி³ஸாவிதி³ஸங் ஏகங் ட²பெத்வா தே²ரங் ஆனந்த³ங், தேன ஹி ‘விக³தப⁴யஸந்தாஸா அரஹந்தோ’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
9. ‘‘Bhante nāgasena, bhāsitampetaṃ bhagavatā ‘vigatabhayasantāsā arahanto’ti. Puna ca nagare rājagahe dhanapālakaṃ hatthiṃ bhagavati opatantaṃ disvā pañca khīṇāsavasatāni pariccajitvā jinavaraṃ pakkantāni disāvidisaṃ ekaṃ ṭhapetvā theraṃ ānandaṃ. Kiṃ nu kho, bhante nāgasena, te arahanto bhayā pakkantā, paññāyissati sakena kammenāti dasabalaṃ pātetukāmā pakkantā , udāhu tathāgatassa atulaṃ vipulamasamaṃ pāṭihāriyaṃ daṭṭhukāmā pakkantā? Yadi, bhante nāgasena, bhagavatā bhaṇitaṃ ‘vigatabhayasantāsā arahanto’ti, tena hi ‘nagare…pe… ānanda’nti yaṃ vacanaṃ taṃ micchā. Yadi nagare rājagahe dhanapālakaṃ hatthiṃ bhagavati opatantaṃ disvā pañca khīṇāsavasatāni pariccajitvā jinavaraṃ pakkantāni disāvidisaṃ ekaṃ ṭhapetvā theraṃ ānandaṃ, tena hi ‘vigatabhayasantāsā arahanto’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘விக³தப⁴யஸந்தாஸா அரஹந்தோ’தி, நக³ரே ராஜக³ஹே த⁴னபாலகங் ஹத்தி²ங் ப⁴க³வதி ஓபதந்தங் தி³ஸ்வா பஞ்ச கீ²ணாஸவஸதானி பரிச்சஜித்வா ஜினவரங் பக்கந்தானி தி³ஸாவிதி³ஸங் ஏகங் ட²பெத்வா தே²ரங் ஆனந்த³ங், தஞ்ச பன ந ப⁴யா, நாபி ப⁴க³வந்தங் பாதேதுகாமதாய.
‘‘Bhāsitampetaṃ, mahārāja, bhagavatā ‘vigatabhayasantāsā arahanto’ti, nagare rājagahe dhanapālakaṃ hatthiṃ bhagavati opatantaṃ disvā pañca khīṇāsavasatāni pariccajitvā jinavaraṃ pakkantāni disāvidisaṃ ekaṃ ṭhapetvā theraṃ ānandaṃ, tañca pana na bhayā, nāpi bhagavantaṃ pātetukāmatāya.
‘‘யேன பன, மஹாராஜ, ஹேதுனா அரஹந்தோ பா⁴யெய்யுங் வா தாஸெய்யுங் வா, ஸோ ஹேது அரஹந்தானங் ஸமுச்சி²ன்னோ, தஸ்மா விக³தப⁴யஸந்தாஸா அரஹந்தோ, பா⁴யதி நு, மஹாராஜ, மஹாபத²வீ க²ணந்தேபி பி⁴ந்த³ந்தேபி தா⁴ரெந்தேபி ஸமுத்³த³பப்³ப³தகி³ரிஸிக²ரேதி? ‘‘ந ஹி, ப⁴ந்தே’’தி. ‘‘கேன காரணேன மஹாராஜா’’தி? ‘‘நத்தி², ப⁴ந்தே, மஹாபத²வியா ஸோ ஹேது, யேன ஹேதுனா மஹாபத²வீ பா⁴யெய்ய வா தாஸெய்ய வா’’தி. ‘‘ஏவமேவ கோ², மஹாராஜ, நத்தி² அரஹந்தானங் ஸோ ஹேது, யேன ஹேதுனா அரஹந்தோ பா⁴யெய்யுங் வா தாஸெய்யுங் வா.
‘‘Yena pana, mahārāja, hetunā arahanto bhāyeyyuṃ vā tāseyyuṃ vā, so hetu arahantānaṃ samucchinno, tasmā vigatabhayasantāsā arahanto, bhāyati nu, mahārāja, mahāpathavī khaṇantepi bhindantepi dhārentepi samuddapabbatagirisikhareti? ‘‘Na hi, bhante’’ti. ‘‘Kena kāraṇena mahārājā’’ti? ‘‘Natthi, bhante, mahāpathaviyā so hetu, yena hetunā mahāpathavī bhāyeyya vā tāseyya vā’’ti. ‘‘Evameva kho, mahārāja, natthi arahantānaṃ so hetu, yena hetunā arahanto bhāyeyyuṃ vā tāseyyuṃ vā.
‘‘பா⁴யதி நு, மஹாராஜ, கி³ரிஸிக²ரங் சி²ந்த³ந்தே வா பி⁴ந்த³ந்தே வா பதந்தே வா அக்³கி³னா த³ஹந்தே வா’’தி? ‘‘ந ஹி, ப⁴ந்தே’’தி. ‘‘கேன காரணேன மஹாராஜா’’தி? ‘‘நத்தி², ப⁴ந்தே, கி³ரிஸிக²ரஸ்ஸ ஸோ ஹேது, யேன ஹேதுனா கி³ரிஸிக²ரங் பா⁴யெய்ய வா தாஸெய்ய வா’’தி. ‘‘ஏவமேவ கோ², மஹாராஜ, நத்தி² அரஹந்தானங் ஸோ ஹேது, யேன ஹேதுனா அரஹந்தோ பா⁴யெய்யுங் வா தாஸெய்யுங் வா.
‘‘Bhāyati nu, mahārāja, girisikharaṃ chindante vā bhindante vā patante vā agginā dahante vā’’ti? ‘‘Na hi, bhante’’ti. ‘‘Kena kāraṇena mahārājā’’ti? ‘‘Natthi, bhante, girisikharassa so hetu, yena hetunā girisikharaṃ bhāyeyya vā tāseyya vā’’ti. ‘‘Evameva kho, mahārāja, natthi arahantānaṃ so hetu, yena hetunā arahanto bhāyeyyuṃ vā tāseyyuṃ vā.
‘‘யதி³பி , மஹாராஜ, லோகதா⁴துஸதஸஹஸ்ஸேஸு யே கேசி ஸத்தனிகாயபரியாபன்னா ஸப்³பே³பி தே ஸத்திஹத்தா² ஏகங் அரஹந்தங் உபதா⁴வித்வா தாஸெய்யுங், ந ப⁴வெய்ய அரஹதோ சித்தஸ்ஸ கிஞ்சி அஞ்ஞத²த்தங். கிங் காரணங்? அட்டா²னமனவகாஸதாய.
‘‘Yadipi , mahārāja, lokadhātusatasahassesu ye keci sattanikāyapariyāpannā sabbepi te sattihatthā ekaṃ arahantaṃ upadhāvitvā tāseyyuṃ, na bhaveyya arahato cittassa kiñci aññathattaṃ. Kiṃ kāraṇaṃ? Aṭṭhānamanavakāsatāya.
‘‘அபி ச, மஹாராஜ, தேஸங் கீ²ணாஸவானங் ஏவங் சேதோபரிவிதக்கோ அஹோஸி ‘அஜ்ஜ நரவரபவரே ஜினவரவஸபே⁴ நக³ரவரமனுப்பவிட்டே² வீதி²யா த⁴னபாலகோ ஹத்தீ² ஆபதிஸ்ஸதி, அஸங்ஸயமதிதே³வதே³வங் உபட்டா²கோ ந பரிச்சஜிஸ்ஸதி, யதி³ மயங் ஸப்³பே³பி ப⁴க³வந்தங் ந பரிச்சஜிஸ்ஸாம, ஆனந்த³ஸ்ஸ கு³ணோ பாகடோ ந ப⁴விஸ்ஸதி, ந ஹேவ ச ததா²க³தங் ஸமுபக³மிஸ்ஸதி ஹத்தி²னாகோ³, ஹந்த³ மயங் அபக³ச்சா²ம, ஏவமித³ங் மஹதோ ஜனகாயஸ்ஸ கிலேஸப³ந்த⁴னமொக்கோ² ப⁴விஸ்ஸதி, ஆனந்த³ஸ்ஸ ச கு³ணோ பாகடோ ப⁴விஸ்ஸதீ’தி. ஏவங் தே அரஹந்தோ ஆனிஸங்ஸங் தி³ஸ்வா தி³ஸாவிதி³ஸங் பக்கந்தா’’தி. ‘‘ஸுவிப⁴த்தோ, ப⁴ந்தே நாக³ஸேன, பஞ்ஹோ, ஏவமேதங் நத்தி² அரஹந்தானங் ப⁴யங் வா ஸந்தாஸோ வா, ஆனிஸங்ஸங் தி³ஸ்வா அரஹந்தோ பக்கந்தா தி³ஸாவிதி³ஸ’’ந்தி.
‘‘Api ca, mahārāja, tesaṃ khīṇāsavānaṃ evaṃ cetoparivitakko ahosi ‘ajja naravarapavare jinavaravasabhe nagaravaramanuppaviṭṭhe vīthiyā dhanapālako hatthī āpatissati, asaṃsayamatidevadevaṃ upaṭṭhāko na pariccajissati, yadi mayaṃ sabbepi bhagavantaṃ na pariccajissāma, ānandassa guṇo pākaṭo na bhavissati, na heva ca tathāgataṃ samupagamissati hatthināgo, handa mayaṃ apagacchāma, evamidaṃ mahato janakāyassa kilesabandhanamokkho bhavissati, ānandassa ca guṇo pākaṭo bhavissatī’ti. Evaṃ te arahanto ānisaṃsaṃ disvā disāvidisaṃ pakkantā’’ti. ‘‘Suvibhatto, bhante nāgasena, pañho, evametaṃ natthi arahantānaṃ bhayaṃ vā santāso vā, ānisaṃsaṃ disvā arahanto pakkantā disāvidisa’’nti.
அரஹந்தஅபா⁴யனபஞ்ஹோ நவமோ.
Arahantaabhāyanapañho navamo.
