| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. අරහන්‌තසුත්‌තං
4. Arahantasuttaṃ
1094. සාවත්‌ථිනිදානං. යෙ හි කෙචි, භික්‌ඛවෙ, අතීතමද්‌ධානං අරහන්‌තො සම්‌මාසම්‌බුද්‌ධා යථාභූතං අභිසම්‌බුජ්‌ඣිංසු, සබ්‌බෙ තෙ චත්‌තාරි අරියසච්‌චානි යථාභූතං අභිසම්‌බුජ්‌ඣිංසු. යෙ හි 1 කෙචි, භික්‌ඛවෙ, අනාගතමද්‌ධානං අරහන්‌තො සම්‌මාසම්‌බුද්‌ධා යථාභූතං අභිසම්‌බුජ්‌ඣිස්‌සන්‌ති, සබ්‌බෙ තෙ චත්‌තාරි අරියසච්‌චානි යථාභූතං අභිසම්‌බුජ්‌ඣිස්‌සන්‌ති. යෙ හි කෙචි, භික්‌ඛවෙ, එතරහි අරහන්‌තො සම්‌මාසම්‌බුද්‌ධා යථාභූතං අභිසම්‌බුජ්‌ඣන්‌ති, සබ්‌බෙ තෙ චත්‌තාරි අරියසච්‌චානි යථාභූතං අභිසම්‌බුජ්‌ඣන්‌ති.
1094. Sāvatthinidānaṃ. Ye hi keci, bhikkhave, atītamaddhānaṃ arahanto sammāsambuddhā yathābhūtaṃ abhisambujjhiṃsu, sabbe te cattāri ariyasaccāni yathābhūtaṃ abhisambujjhiṃsu. Ye hi 2 keci, bhikkhave, anāgatamaddhānaṃ arahanto sammāsambuddhā yathābhūtaṃ abhisambujjhissanti, sabbe te cattāri ariyasaccāni yathābhūtaṃ abhisambujjhissanti. Ye hi keci, bhikkhave, etarahi arahanto sammāsambuddhā yathābhūtaṃ abhisambujjhanti, sabbe te cattāri ariyasaccāni yathābhūtaṃ abhisambujjhanti.
‘‘කතමානි චත්‌තාරි? දුක්‌ඛං අරියසච්‌චං, දුක්‌ඛසමුදයං අරියසච්‌චං, දුක්‌ඛනිරොධං අරියසච්‌චං, දුක්‌ඛනිරොධගාමිනී පටිපදා අරියසච්‌චං. යෙ හි, කෙචි, භික්‌ඛවෙ, අතීතමද්‌ධානං අරහන්‌තො සම්‌මාසම්‌බුද්‌ධා යථාභූතං අභිසම්‌බුජ්‌ඣිංසු…පෙ.… අභිසම්‌බුජ්‌ඣිස්‌සන්‌ති…පෙ.… අභිසම්‌බුජ්‌ඣන්‌ති, සබ්‌බෙ තෙ ඉමානි චත්‌තාරි අරියසච්‌චානි යථාභූතං අභිසම්‌බුජ්‌ඣන්‌ති.
‘‘Katamāni cattāri? Dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ. Ye hi, keci, bhikkhave, atītamaddhānaṃ arahanto sammāsambuddhā yathābhūtaṃ abhisambujjhiṃsu…pe… abhisambujjhissanti…pe… abhisambujjhanti, sabbe te imāni cattāri ariyasaccāni yathābhūtaṃ abhisambujjhanti.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. චතුත්‌ථං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Catutthaṃ.
Footnotes:
