| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༤. ཨརཧནྟསུཏྟཾ
4. Arahantasuttaṃ
༡༠༩༤. སཱཝཏྠིནིདཱནཾ། ཡེ ཧི ཀེཙི, བྷིཀྑཝེ, ཨཏཱིཏམདྡྷཱནཾ ཨརཧནྟོ སམྨཱསམྦུདྡྷཱ ཡཐཱབྷཱུཏཾ ཨབྷིསམྦུཛ྄ཛྷིཾསུ, སབྦེ ཏེ ཙཏྟཱརི ཨརིཡསཙྩཱནི ཡཐཱབྷཱུཏཾ ཨབྷིསམྦུཛ྄ཛྷིཾསུ། ཡེ ཧི 1 ཀེཙི, བྷིཀྑཝེ, ཨནཱགཏམདྡྷཱནཾ ཨརཧནྟོ སམྨཱསམྦུདྡྷཱ ཡཐཱབྷཱུཏཾ ཨབྷིསམྦུཛ྄ཛྷིསྶནྟི, སབྦེ ཏེ ཙཏྟཱརི ཨརིཡསཙྩཱནི ཡཐཱབྷཱུཏཾ ཨབྷིསམྦུཛ྄ཛྷིསྶནྟི། ཡེ ཧི ཀེཙི, བྷིཀྑཝེ, ཨེཏརཧི ཨརཧནྟོ སམྨཱསམྦུདྡྷཱ ཡཐཱབྷཱུཏཾ ཨབྷིསམྦུཛ྄ཛྷནྟི, སབྦེ ཏེ ཙཏྟཱརི ཨརིཡསཙྩཱནི ཡཐཱབྷཱུཏཾ ཨབྷིསམྦུཛ྄ཛྷནྟི།
1094. Sāvatthinidānaṃ. Ye hi keci, bhikkhave, atītamaddhānaṃ arahanto sammāsambuddhā yathābhūtaṃ abhisambujjhiṃsu, sabbe te cattāri ariyasaccāni yathābhūtaṃ abhisambujjhiṃsu. Ye hi 2 keci, bhikkhave, anāgatamaddhānaṃ arahanto sammāsambuddhā yathābhūtaṃ abhisambujjhissanti, sabbe te cattāri ariyasaccāni yathābhūtaṃ abhisambujjhissanti. Ye hi keci, bhikkhave, etarahi arahanto sammāsambuddhā yathābhūtaṃ abhisambujjhanti, sabbe te cattāri ariyasaccāni yathābhūtaṃ abhisambujjhanti.
‘‘ཀཏམཱནི ཙཏྟཱརི? དུཀྑཾ ཨརིཡསཙྩཾ, དུཀྑསམུདཡཾ ཨརིཡསཙྩཾ, དུཀྑནིརོདྷཾ ཨརིཡསཙྩཾ, དུཀྑནིརོདྷགཱམིནཱི པཊིཔདཱ ཨརིཡསཙྩཾ། ཡེ ཧི, ཀེཙི, བྷིཀྑཝེ, ཨཏཱིཏམདྡྷཱནཾ ཨརཧནྟོ སམྨཱསམྦུདྡྷཱ ཡཐཱབྷཱུཏཾ ཨབྷིསམྦུཛ྄ཛྷིཾསུ…པེ॰… ཨབྷིསམྦུཛ྄ཛྷིསྶནྟི…པེ॰… ཨབྷིསམྦུཛ྄ཛྷནྟི, སབྦེ ཏེ ཨིམཱནི ཙཏྟཱརི ཨརིཡསཙྩཱནི ཡཐཱབྷཱུཏཾ ཨབྷིསམྦུཛ྄ཛྷནྟི།
‘‘Katamāni cattāri? Dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ. Ye hi, keci, bhikkhave, atītamaddhānaṃ arahanto sammāsambuddhā yathābhūtaṃ abhisambujjhiṃsu…pe… abhisambujjhissanti…pe… abhisambujjhanti, sabbe te imāni cattāri ariyasaccāni yathābhūtaṃ abhisambujjhanti.
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། ཙཏུཏྠཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Catutthaṃ.
Footnotes:
