| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. அரஹந்தஸுத்தவண்ணனா
5. Arahantasuttavaṇṇanā
25. பஞ்சமே கதாவீதி சதூஹி மக்³கே³ஹி கதகிச்சோ. அஹங் வதா³மீதி அயங் தே³வதா வனஸண்ட³வாஸினீ, ஸா ஆரஞ்ஞகானங் பி⁴க்கூ²னங் ‘‘அஹங் பு⁴ஞ்ஜாமி, அஹங் நிஸீதா³மி, மம பத்தோ, மம சீவர’’ந்திஆதி³கதா²வோஹாரங் ஸுத்வா சிந்தேஸி – ‘‘அஹங் இமே பி⁴க்கூ² ‘கீ²ணாஸவா’தி மஞ்ஞாமி, கீ²ணாஸவானஞ்ச நாம ஏவரூபா அத்துபலத்³தி⁴னிஸ்ஸிதகதா² ஹோதி, ந ஹோதி நு கோ²’’தி ஜானநத்த²ங் ஏவங் புச்ச²தி.
25. Pañcame katāvīti catūhi maggehi katakicco. Ahaṃ vadāmīti ayaṃ devatā vanasaṇḍavāsinī, sā āraññakānaṃ bhikkhūnaṃ ‘‘ahaṃ bhuñjāmi, ahaṃ nisīdāmi, mama patto, mama cīvara’’ntiādikathāvohāraṃ sutvā cintesi – ‘‘ahaṃ ime bhikkhū ‘khīṇāsavā’ti maññāmi, khīṇāsavānañca nāma evarūpā attupaladdhinissitakathā hoti, na hoti nu kho’’ti jānanatthaṃ evaṃ pucchati.
ஸாமஞ்ஞந்தி லோகனிருத்திங் லோகவோஹாரங். குஸலோதி க²ந்தா⁴தீ³ஸு குஸலோ. வோஹாரமத்தேனாதி உபலத்³தி⁴னிஸ்ஸிதகத²ங் ஹித்வா வோஹாரபே⁴த³ங் அகரொந்தோ ‘‘அஹங், மமா’’தி வதெ³ய்ய. ‘‘க²ந்தா⁴ பு⁴ஞ்ஜந்தி, க²ந்தா⁴ நிஸீத³ந்தி, க²ந்தா⁴னங் பத்தோ, க²ந்தா⁴னங் சீவர’’ந்தி ஹி வுத்தே வோஹாரபே⁴தோ³ ஹோதி, ந கோசி ஜானாதி. தஸ்மா ஏவங் அவத்வா லோகவோஹாரேன வோஹரதீதி.
Sāmaññanti lokaniruttiṃ lokavohāraṃ. Kusaloti khandhādīsu kusalo. Vohāramattenāti upaladdhinissitakathaṃ hitvā vohārabhedaṃ akaronto ‘‘ahaṃ, mamā’’ti vadeyya. ‘‘Khandhā bhuñjanti, khandhā nisīdanti, khandhānaṃ patto, khandhānaṃ cīvara’’nti hi vutte vohārabhedo hoti, na koci jānāti. Tasmā evaṃ avatvā lokavohārena voharatīti.
அத² தே³வதா – ‘‘யதி³ தி³ட்டி²யா வஸேன ந வத³தி, மானவஸேன நு கோ² வத³தீ’’தி சிந்தெத்வா புன யோ ஹோதீதி புச்சி². தத்த² மானங் நு கோ²தி ஸோ பி⁴க்கு² மானங் உபக³ந்த்வா மானவஸேன வதெ³ய்ய நு கோ²தி. அத² ப⁴க³வா – ‘‘அயங் தே³வதா கீ²ணாஸவங் ஸமானங் விய கரோதீ’’தி சிந்தெத்வா, ‘‘கீ²ணாஸவஸ்ஸ நவவிதோ⁴பி மானோ பஹீனோ’’தி த³ஸ்ஸெந்தோ படிகா³த²ங் ஆஹ. தத்த² விதூ⁴பிதாதி வித⁴மிதா. மானக³ந்த²ஸ்ஸாதி மானா ச க³ந்தா² ச அஸ்ஸ. மஞ்ஞதந்தி மஞ்ஞனங். திவித⁴ம்பி தண்ஹா-தி³ட்டி²-மான-மஞ்ஞனங் ஸோ வீதிவத்தோ, அதிக்கந்தோதி அத்தோ². ஸேஸங் உத்தானத்த²மேவாதி. பஞ்சமங்.
Atha devatā – ‘‘yadi diṭṭhiyā vasena na vadati, mānavasena nu kho vadatī’’ti cintetvā puna yo hotīti pucchi. Tattha mānaṃ nu khoti so bhikkhu mānaṃ upagantvā mānavasena vadeyya nu khoti. Atha bhagavā – ‘‘ayaṃ devatā khīṇāsavaṃ samānaṃ viya karotī’’ti cintetvā, ‘‘khīṇāsavassa navavidhopi māno pahīno’’ti dassento paṭigāthaṃ āha. Tattha vidhūpitāti vidhamitā. Mānaganthassāti mānā ca ganthā ca assa. Maññatanti maññanaṃ. Tividhampi taṇhā-diṭṭhi-māna-maññanaṃ so vītivatto, atikkantoti attho. Sesaṃ uttānatthamevāti. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. அரஹந்தஸுத்தங் • 5. Arahantasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. அரஹந்தஸுத்தவண்ணனா • 5. Arahantasuttavaṇṇanā
