| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. அரஹந்தஸுத்தவண்ணனா
4. Arahantasuttavaṇṇanā
76. சதுத்தே² யாவதா, பி⁴க்க²வே, ஸத்தாவாஸாதி, பி⁴க்க²வே, யத்தகா ஸத்தாவாஸா நாம அத்தி². யாவதா ப⁴வக்³க³ந்தி யத்தகங் ப⁴வக்³க³ங் நாம அத்தி². ஏதே அக்³கா³ ஏதே ஸெட்டா²தி ஏதே அக்³க³பூ⁴தா சேவ ஸெட்ட²பூ⁴தா ச. யதி³த³ங் அரஹந்தோதி யே இமே அரஹந்தோ நாம. இத³ம்பி ஸுத்தங் புரிமனயேனேவ உஸ்ஸத³னந்தி³யஞ்ச பலோப⁴னீயஞ்சாதி வேதி³தப்³ப³ங்.
76. Catutthe yāvatā, bhikkhave, sattāvāsāti, bhikkhave, yattakā sattāvāsā nāma atthi. Yāvatā bhavagganti yattakaṃ bhavaggaṃ nāma atthi. Ete aggā ete seṭṭhāti ete aggabhūtā ceva seṭṭhabhūtā ca. Yadidaṃ arahantoti ye ime arahanto nāma. Idampi suttaṃ purimanayeneva ussadanandiyañca palobhanīyañcāti veditabbaṃ.
அதா²பரங் ஏதத³வோசாதி தத³த்த²பரிதீ³பனாஹி சேவ விஸேஸத்த²பரிதீ³பனாஹி ச கா³தா²ஹி ஏதங் ‘‘ஸுகி²னோ வத அரஹந்தோ’’திஆதி³வசனங் அவோச. தத்த² ஸுகி²னோதி ஜா²னஸுகே²ன மக்³க³ஸுகே²ன ப²லஸுகே²ன ச ஸுகி²தா. தண்ஹா தேஸங் ந விஜ்ஜதீதி தேஸங் அபாயது³க்க²ஜனிகா தண்ஹா ந வஜ்ஜதி. ஏவங் தே இமஸ்ஸபி தண்ஹாமூலகஸ்ஸ அபா⁴வேன ஸுகி²தாவ. அஸ்மிமானோ ஸமுச்சி²ன்னோதி நவவிதோ⁴ அஸ்மிமானோ அரஹத்தமக்³கே³ன ஸமுச்சி²ன்னோ. மோஹஜாலங் பதா³லிதந்தி ஞாணேன அவிஜ்ஜாஜாலங் பா²லிதங்.
Athāparaṃ etadavocāti tadatthaparidīpanāhi ceva visesatthaparidīpanāhi ca gāthāhi etaṃ ‘‘sukhino vata arahanto’’tiādivacanaṃ avoca. Tattha sukhinoti jhānasukhena maggasukhena phalasukhena ca sukhitā. Taṇhā tesaṃ na vijjatīti tesaṃ apāyadukkhajanikā taṇhā na vajjati. Evaṃ te imassapi taṇhāmūlakassa abhāvena sukhitāva. Asmimāno samucchinnoti navavidho asmimāno arahattamaggena samucchinno. Mohajālaṃ padālitanti ñāṇena avijjājālaṃ phālitaṃ.
அனேஜந்தி ஏஜாஸங்கா²தாய தண்ஹாய பஹானபூ⁴தங் அரஹத்தங். அனுபலித்தாதி தண்ஹாதி³ட்டி²லேபேஹி அலித்தா. ப்³ரஹ்மபூ⁴தாதி ஸெட்ட²பூ⁴தா. பரிஞ்ஞாயாதி தீஹி பரிஞ்ஞாஹி பரிஜானித்வா. ஸத்தஸத்³த⁴ம்மகோ³சராதி ஸத்³தா⁴ ஹிரீ ஒத்தப்பங் பா³ஹுஸச்சங் ஆரத்³த⁴வீரியதா உபட்டி²தஸ்ஸதிதா பஞ்ஞாதி இமே ஸத்த ஸத்³த⁴ம்மா கோ³சரோ ஏதேஸந்தி ஸத்தஸத்³த⁴ம்மகோ³சரா.
Anejanti ejāsaṅkhātāya taṇhāya pahānabhūtaṃ arahattaṃ. Anupalittāti taṇhādiṭṭhilepehi alittā. Brahmabhūtāti seṭṭhabhūtā. Pariññāyāti tīhi pariññāhi parijānitvā. Sattasaddhammagocarāti saddhā hirī ottappaṃ bāhusaccaṃ āraddhavīriyatā upaṭṭhitassatitā paññāti ime satta saddhammā gocaro etesanti sattasaddhammagocarā.
ஸத்தரதனஸம்பன்னாதி ஸத்தஹி பொ³ஜ்ஜ²ங்க³ரதனேஹி ஸமன்னாக³தா. அனுவிசரந்தீதி லோகியமஹாஜனாபி அனுவிசரந்தியேவ. இத⁴ பன கீ²ணாஸவானங் நிராஸங்கசாரோ நாம க³ஹிதோ. தேனேவாஹ ‘‘பஹீனப⁴யபே⁴ரவா’’தி. தத்த² ப⁴யங் ப⁴யமேவ, பே⁴ரவங் ப³லவப⁴யங். த³ஸஹங்கே³ஹி ஸம்பன்னாதி அஸெக்கே²ஹி த³ஸஹி அங்கே³ஹி ஸமன்னாக³தா. மஹானாகா³தி சதூஹி காரணேஹி மஹானாகா³. ஸமாஹிதாதி உபசாரப்பனாஹி ஸமாஹிதா. தண்ஹா தேஸங் ந விஜ்ஜதீதி ‘‘ஊனோ லோகோ அதித்தோ தண்ஹாதா³ஸோதி கோ², மஹாராஜ, தேன ப⁴க³வதா’’தி (ம॰ நி॰ 2.305) ஏவங் வுத்தா தா³ஸகாரிகா தண்ஹாபி தேஸங் நத்தி². இமினா கீ²ணாஸவானங் பு⁴ஜிஸ்ஸபா⁴வங் த³ஸ்ஸேதி.
Sattaratanasampannāti sattahi bojjhaṅgaratanehi samannāgatā. Anuvicarantīti lokiyamahājanāpi anuvicarantiyeva. Idha pana khīṇāsavānaṃ nirāsaṅkacāro nāma gahito. Tenevāha ‘‘pahīnabhayabheravā’’ti. Tattha bhayaṃ bhayameva, bheravaṃ balavabhayaṃ. Dasahaṅgehi sampannāti asekkhehi dasahi aṅgehi samannāgatā. Mahānāgāti catūhi kāraṇehi mahānāgā. Samāhitāti upacārappanāhi samāhitā. Taṇhā tesaṃ na vijjatīti ‘‘ūno loko atitto taṇhādāsoti kho, mahārāja, tena bhagavatā’’ti (ma. ni. 2.305) evaṃ vuttā dāsakārikā taṇhāpi tesaṃ natthi. Iminā khīṇāsavānaṃ bhujissabhāvaṃ dasseti.
அஸேக²ஞாணந்தி அரஹத்தப²லஞாணங். அந்திமோயங் ஸமுஸ்ஸயோதி பச்சி²மோ அயங் அத்தபா⁴வோ. யோ ஸாரோ ப்³ரஹ்மசரியஸ்ஸாதி ஸாரோ நாம ப²லங். தஸ்மிங் அபரபச்சயாதி தஸ்மிங் அரியப²லே, ந அஞ்ஞங் பத்தியாயந்தி, பச்சக்க²தோவ படிவிஜ்ஜி²த்வா டி²தா. விதா⁴ஸு ந விகம்பந்தீதி தீஸு மானகொட்டா²ஸேஸு ந விகம்பந்தி. த³ந்தபூ⁴மிந்தி அரஹத்தங். விஜிதாவினோதி ராகா³த³யோ விஜெத்வா டி²தா.
Asekhañāṇanti arahattaphalañāṇaṃ. Antimoyaṃ samussayoti pacchimo ayaṃ attabhāvo. Yo sāro brahmacariyassāti sāro nāma phalaṃ. Tasmiṃ aparapaccayāti tasmiṃ ariyaphale, na aññaṃ pattiyāyanti, paccakkhatova paṭivijjhitvā ṭhitā. Vidhāsu na vikampantīti tīsu mānakoṭṭhāsesu na vikampanti. Dantabhūminti arahattaṃ. Vijitāvinoti rāgādayo vijetvā ṭhitā.
உத்³த⁴ந்திஆதீ³ஸு உத்³த⁴ங் வுச்சதி கேஸமத்த²கோ, அபாசீனங் பாத³தலங், திரியங் வேமஜ்ஜ²ங். உத்³த⁴ங் வா அதீதங், அபாசீனங் அனாக³தங், திரியங் பச்சுப்பன்னங். உத்³த⁴ங் வா வுச்சதி தே³வலோகோ, அபாசீனங் அபாயலோகோ, திரியங் மனுஸ்ஸலோகோ. நந்தீ³ தேஸங் ந விஜ்ஜதீதி ஏதேஸு டா²னேஸு ஸங்கே²பதோ வா அதீதானாக³தபச்சுப்பன்னேஸு க²ந்தே⁴ஸு தேஸங் தண்ஹா நத்தி². இத⁴ வட்டமூலகதண்ஹாய அபா⁴வோ த³ஸ்ஸிதோ. பு³த்³தா⁴தி சதுன்னங் ஸச்சானங் பு³த்³த⁴த்தா பு³த்³தா⁴.
Uddhantiādīsu uddhaṃ vuccati kesamatthako, apācīnaṃ pādatalaṃ, tiriyaṃ vemajjhaṃ. Uddhaṃ vā atītaṃ, apācīnaṃ anāgataṃ, tiriyaṃ paccuppannaṃ. Uddhaṃ vā vuccati devaloko, apācīnaṃ apāyaloko, tiriyaṃ manussaloko. Nandī tesaṃ na vijjatīti etesu ṭhānesu saṅkhepato vā atītānāgatapaccuppannesu khandhesu tesaṃ taṇhā natthi. Idha vaṭṭamūlakataṇhāya abhāvo dassito. Buddhāti catunnaṃ saccānaṃ buddhattā buddhā.
இத³ங் பனெத்த² ஸீஹனாத³ஸமோதா⁴னங் – ‘‘விமுத்திஸுகே²னம்ஹா ஸுகி²தா, து³க்க²ஜனிகா நோ தண்ஹா பஹீனா, பஞ்சக்க²ந்தா⁴ பரிஞ்ஞாதா, தா³ஸகாரிகதண்ஹா சேவ வட்டமூலிகதண்ஹா ச பஹீனா, அனுத்தரம்ஹா அஸதி³ஸா, சதுன்னங் ஸச்சானங் பு³த்³த⁴த்தா பு³த்³தா⁴’’தி ப⁴வபிட்டே² ட²த்வா அபீ⁴தனாத³ஸங்கா²தங் ஸீஹனாத³ங் நத³ந்தி கீ²ணாஸவாதி. சதுத்த²ங்.
Idaṃ panettha sīhanādasamodhānaṃ – ‘‘vimuttisukhenamhā sukhitā, dukkhajanikā no taṇhā pahīnā, pañcakkhandhā pariññātā, dāsakārikataṇhā ceva vaṭṭamūlikataṇhā ca pahīnā, anuttaramhā asadisā, catunnaṃ saccānaṃ buddhattā buddhā’’ti bhavapiṭṭhe ṭhatvā abhītanādasaṅkhātaṃ sīhanādaṃ nadanti khīṇāsavāti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அரஹந்தஸுத்தங் • 4. Arahantasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அரஹந்தஸுத்தவண்ணனா • 4. Arahantasuttavaṇṇanā
