| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. অরহন্তসুত্তৰণ্ণনা
5. Arahantasuttavaṇṇanā
২৫. পঞ্চমে কতাৰীতি চতূহি মগ্গেহি কতকিচ্চো। অহং ৰদামীতি অযং দেৰতা ৰনসণ্ডৰাসিনী, সা আরঞ্ঞকানং ভিক্খূনং ‘‘অহং ভুঞ্জামি, অহং নিসীদামি, মম পত্তো, মম চীৰর’’ন্তিআদিকথাৰোহারং সুত্ৰা চিন্তেসি – ‘‘অহং ইমে ভিক্খূ ‘খীণাসৰা’তি মঞ্ঞামি, খীণাসৰানঞ্চ নাম এৰরূপা অত্তুপলদ্ধিনিস্সিতকথা হোতি, ন হোতি নু খো’’তি জাননত্থং এৰং পুচ্ছতি।
25. Pañcame katāvīti catūhi maggehi katakicco. Ahaṃ vadāmīti ayaṃ devatā vanasaṇḍavāsinī, sā āraññakānaṃ bhikkhūnaṃ ‘‘ahaṃ bhuñjāmi, ahaṃ nisīdāmi, mama patto, mama cīvara’’ntiādikathāvohāraṃ sutvā cintesi – ‘‘ahaṃ ime bhikkhū ‘khīṇāsavā’ti maññāmi, khīṇāsavānañca nāma evarūpā attupaladdhinissitakathā hoti, na hoti nu kho’’ti jānanatthaṃ evaṃ pucchati.
সামঞ্ঞন্তি লোকনিরুত্তিং লোকৰোহারং। কুসলোতি খন্ধাদীসু কুসলো। ৰোহারমত্তেনাতি উপলদ্ধিনিস্সিতকথং হিত্ৰা ৰোহারভেদং অকরোন্তো ‘‘অহং, মমা’’তি ৰদেয্য। ‘‘খন্ধা ভুঞ্জন্তি, খন্ধা নিসীদন্তি, খন্ধানং পত্তো, খন্ধানং চীৰর’’ন্তি হি ৰুত্তে ৰোহারভেদো হোতি, ন কোচি জানাতি। তস্মা এৰং অৰত্ৰা লোকৰোহারেন ৰোহরতীতি।
Sāmaññanti lokaniruttiṃ lokavohāraṃ. Kusaloti khandhādīsu kusalo. Vohāramattenāti upaladdhinissitakathaṃ hitvā vohārabhedaṃ akaronto ‘‘ahaṃ, mamā’’ti vadeyya. ‘‘Khandhā bhuñjanti, khandhā nisīdanti, khandhānaṃ patto, khandhānaṃ cīvara’’nti hi vutte vohārabhedo hoti, na koci jānāti. Tasmā evaṃ avatvā lokavohārena voharatīti.
অথ দেৰতা – ‘‘যদি দিট্ঠিযা ৰসেন ন ৰদতি, মানৰসেন নু খো ৰদতী’’তি চিন্তেত্ৰা পুন যো হোতীতি পুচ্ছি। তত্থ মানং নু খোতি সো ভিক্খু মানং উপগন্ত্ৰা মানৰসেন ৰদেয্য নু খোতি। অথ ভগৰা – ‘‘অযং দেৰতা খীণাসৰং সমানং ৰিয করোতী’’তি চিন্তেত্ৰা, ‘‘খীণাসৰস্স নৰৰিধোপি মানো পহীনো’’তি দস্সেন্তো পটিগাথং আহ। তত্থ ৰিধূপিতাতি ৰিধমিতা। মানগন্থস্সাতি মানা চ গন্থা চ অস্স। মঞ্ঞতন্তি মঞ্ঞনং। তিৰিধম্পি তণ্হা-দিট্ঠি-মান-মঞ্ঞনং সো ৰীতিৰত্তো, অতিক্কন্তোতি অত্থো। সেসং উত্তানত্থমেৰাতি। পঞ্চমং।
Atha devatā – ‘‘yadi diṭṭhiyā vasena na vadati, mānavasena nu kho vadatī’’ti cintetvā puna yo hotīti pucchi. Tattha mānaṃ nu khoti so bhikkhu mānaṃ upagantvā mānavasena vadeyya nu khoti. Atha bhagavā – ‘‘ayaṃ devatā khīṇāsavaṃ samānaṃ viya karotī’’ti cintetvā, ‘‘khīṇāsavassa navavidhopi māno pahīno’’ti dassento paṭigāthaṃ āha. Tattha vidhūpitāti vidhamitā. Mānaganthassāti mānā ca ganthā ca assa. Maññatanti maññanaṃ. Tividhampi taṇhā-diṭṭhi-māna-maññanaṃ so vītivatto, atikkantoti attho. Sesaṃ uttānatthamevāti. Pañcamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. অরহন্তসুত্তং • 5. Arahantasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. অরহন্তসুত্তৰণ্ণনা • 5. Arahantasuttavaṇṇanā
