| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. অরহন্তসুত্তৰণ্ণনা
5. Arahantasuttavaṇṇanā
২৫. কতাৰীতি কতৰা, পরিঞ্ঞাদিকিচ্চং কত্ৰা নিট্ঠপেত্ৰা ঠিতোতি অত্থো। তেনাহ ‘‘চতূহি মগ্গেহি কতকিচ্চো’’তি। স্ৰাযমত্থো অরহন্তিআদিসদ্দসন্নিধানতো ৰিঞ্ঞাযতি। এৰং ‘‘অহং ৰদামী’’তিআদিআকারেন পুচ্ছতি।
25.Katāvīti katavā, pariññādikiccaṃ katvā niṭṭhapetvā ṭhitoti attho. Tenāha ‘‘catūhi maggehi katakicco’’ti. Svāyamattho arahantiādisaddasannidhānato viññāyati. Evaṃ ‘‘ahaṃ vadāmī’’tiādiākārena pucchati.
খন্ধাদীসু কুসলোতি খন্ধাযতনাদীসু সলক্খণাদীসু চ সমূহাদিৰসেন পৰত্তিযঞ্চ ছেকো যথাভূতৰেদী। উপলদ্ধিনিস্সিতকথন্তি অত্তুপলদ্ধিনিস্সিতকথং হিত্ৰা। ৰোহারভেদং অকরোন্তোতি ‘‘অহং পরমত্থং জানামী’’তি লোকৰোহারং ভিন্দন্তো অৰিনাসেন্তো লোকে লোকসমঞ্ঞমেৰ নিস্সায ‘‘অহং, মমা’’তি ৰদেয্য। খন্ধা ভুঞ্জন্তীতিআদিনা ৰোহারভেদং, তত্থ চ আদীনৰং দস্সেতি।
Khandhādīsu kusaloti khandhāyatanādīsu salakkhaṇādīsu ca samūhādivasena pavattiyañca cheko yathābhūtavedī. Upaladdhinissitakathanti attupaladdhinissitakathaṃ hitvā. Vohārabhedaṃ akarontoti ‘‘ahaṃ paramatthaṃ jānāmī’’ti lokavohāraṃ bhindanto avināsento loke lokasamaññameva nissāya ‘‘ahaṃ, mamā’’ti vadeyya. Khandhā bhuñjantītiādinā vohārabhedaṃ, tattha ca ādīnavaṃ dasseti.
মানো নাম দিট্ঠিযা সমধুরো। তথা হি দুতিযমগ্গাদীসু সম্মাদিট্ঠিযা পহানাভিসমযস্স পটিৰিপচ্চনীকে পটিপত্তিসিদ্ধি। তেনাহ ‘‘যদি দিট্ঠিযা ৰসেন ন ৰদতি, মানৰসেন নু খো ৰদতীতি চিন্তেত্ৰা’’তি। ৰিধূপিতাতি সন্তাপিতা ঞাণগ্গিনা দড্ঢা। তে পন ৰিদ্ধংসিতা নাম হোন্তীতি আহ ‘‘ৰিধমিতা’’তি। মমঙ্কারাদযো মযন্তি সত্তসন্তানে সতি পৰত্তন্তি এতেনাতি মযো, মঞ্ঞনা। মযো এৰ মযতাতি আহ ‘‘মযতন্তি মঞ্ঞন’’ন্তি।
Māno nāma diṭṭhiyā samadhuro. Tathā hi dutiyamaggādīsu sammādiṭṭhiyā pahānābhisamayassa paṭivipaccanīke paṭipattisiddhi. Tenāha ‘‘yadi diṭṭhiyā vasena na vadati, mānavasena nu kho vadatīti cintetvā’’ti. Vidhūpitāti santāpitā ñāṇagginā daḍḍhā. Te pana viddhaṃsitā nāma hontīti āha ‘‘vidhamitā’’ti. Mamaṅkārādayo mayanti sattasantāne sati pavattanti etenāti mayo, maññanā. Mayo eva mayatāti āha ‘‘mayatanti maññana’’nti.
অরহন্তসুত্তৰণ্ণনা নিট্ঠিতা।
Arahantasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. অরহন্তসুত্তং • 5. Arahantasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. অরহন্তসুত্তৰণ্ণনা • 5. Arahantasuttavaṇṇanā
