| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. অরহন্তসুত্তৰণ্ণনা
4. Arahantasuttavaṇṇanā
৭৬. যত্তকা সত্তাৰাসাতি তস্মিং তস্মিং সত্তনিকাযে আৰসনট্ঠেন সত্তা এৰ সত্তাৰাসা। তেন যত্তকা সত্তাৰাসা, তেহি সব্বেহিপি এতে অগ্গা এতে সেট্ঠা, যে ইমে অরহন্তাতি দস্সেতি। পুরিমনযেনেৰাতি পুরিমস্মিং সত্তট্ঠানকোসল্লসুত্তে ৰুত্তনযেন।
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
তদত্থপরিদীপনাহীতি ‘‘পঞ্চক্খন্ধে পরিঞ্ঞায। তণ্হা তেসং ন ৰিজ্জতি। অস্মিমানো সমুচ্ছিন্নো’’তিআদিনা তস্স যথানিদ্দিট্ঠস্স সুত্তস্স অত্থদীপনাহি চেৰ ‘‘অনেজং তে অনুপ্পত্তা, চিত্তং তেসং অনাৰিল’’ন্তিআদিনা ৰিসেসত্থপরিদীপনাহি চ। ঝানমগ্গফলপরিযাপন্নং অতিসযিতসুখং এতেসমত্থীতি সুখিনোতি আহ ‘‘ঝান…পে॰… সুখিতা’’তি। তণ্হা তেসং ন ৰিজ্জতীতি এত্থ তেসং অপাযদুক্খজনিকা তণ্হা ন ৰিজ্জতীতি ৰুত্তং। ৰট্টমূলিকায তণ্হায অভাৰা ‘‘নন্দী তেসং ন ৰিজ্জতী’’তি এত্থ ৰুচ্চতীতি। ইমস্সপীতি পি-সদ্দেন দুক্খস্সাভাৰেনপীতি দুক্খাভাৰো ৰিয ৰট্টমূলিকতণ্হাভাৰো সম্পিণ্ডীযতীতি দট্ঠব্বং। তেন হি তে অনুপাদিসেসনিব্বানপ্পত্তিযা অচ্চন্তসুখিতা এৰাতি ৰুচ্চন্তীতি। ‘‘সেয্যোহমস্মী’’তিআদিনযপ্পৰত্তিযা নৰৰিধো। ঞাণেনাতি অগ্গমগ্গঞ্ঞাণেন।
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
অরহত্তং অনুপ্পত্তা। অলিত্তাতি অমক্খিতা। ব্রহ্মভূতাতি ব্রহ্মভাৰং পত্তা, ব্রহ্মতো ৰা অরিযমগ্গঞাণতো ভূতা অরিযায জাতিযা জাতা। সত্ত সদ্ধম্মা গোচরো পৰত্তিট্ঠানং এতেসন্তি সত্তসদ্ধম্মগোচরা।
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
নিরাসঙ্কচারো নাম গহিতো কুতোচিপি তেসং আসঙ্কায অভাৰতো। সম্মাদিট্ঠিআদীহি দসহি অঙ্গেহি সম্মাৰিমুত্তি-সম্মাঞাণপরিযোসানেহি। ‘‘আগুং ন করোতী’’তিআদীহি চতূহি কারণেহি। তণ্হা তেসং ন ৰিজ্জতীতি ইদম্পি তণ্হাপহানস্স বহূপকারতাদস্সনং। তেনাহ ‘‘দাসকারিকা তণ্হাপি তেসং নত্থী’’তি।
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
ন ৰিকম্পন্তি ‘‘সেয্যোহমস্মী’’তিআদিনা।
Navikampanti ‘‘seyyohamasmī’’tiādinā.
উদ্ধং তিরিযং অপাচীনন্তি এত্থ ‘‘উদ্ধং ৰুচ্চতী’’তিআদিনা রূপমুখেন অত্তভাৰং গহেত্ৰা পৰত্তো পঠমনযো। কালত্তযৰসেন ধম্মপ্পৰত্তিং গহেত্ৰা পৰত্তো দুতিযনযো। ঠানৰসেন সকললোকধাতুং গহেত্ৰা পৰত্তো ততিযনযো। বুদ্ধাতি চত্তারি সচ্চানি বুদ্ধৰন্তো।
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
সীহনাদসমোধানন্তি সীহনাদানং সংকলনং। লোকে অত্তনো উত্তরিতরস্সাভাৰা অনুত্তরা। উত্তরো তাৰ তিট্ঠতু পুরিসো, সদিসোপি তাৰ নত্থীতি অসদিসা। সকলম্পি ভৰং উত্তরিত্ৰা ভৰপিট্ঠে ঠত্ৰা ৰিমুত্তিসুখেন সুখিতত্তাদিৰসেন একৰীসতিযাকারেহি সীহনাদং নদন্তি।
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
অরহন্তসুত্তৰণ্ণনা নিট্ঠিতা।
Arahantasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. অরহন্তসুত্তং • 4. Arahantasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. অরহন্তসুত্তৰণ্ণনা • 4. Arahantasuttavaṇṇanā
