| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๕. อรหนฺตสุตฺตวณฺณนา
5. Arahantasuttavaṇṇanā
๒๕. กตาวีติ กตวา, ปริญฺญาทิกิจฺจํ กตฺวา นิฎฺฐเปตฺวา ฐิโตติ อโตฺถฯ เตนาห ‘‘จตูหิ มเคฺคหิ กตกิโจฺจ’’ติฯ สฺวายมโตฺถ อรหนฺติอาทิสทฺทสนฺนิธานโต วิญฺญายติฯ เอวํ ‘‘อหํ วทามี’’ติอาทิอากาเรน ปุจฺฉติฯ
25.Katāvīti katavā, pariññādikiccaṃ katvā niṭṭhapetvā ṭhitoti attho. Tenāha ‘‘catūhi maggehi katakicco’’ti. Svāyamattho arahantiādisaddasannidhānato viññāyati. Evaṃ ‘‘ahaṃ vadāmī’’tiādiākārena pucchati.
ขนฺธาทีสุ กุสโลติ ขนฺธายตนาทีสุ สลกฺขณาทีสุ จ สมูหาทิวเสน ปวตฺติยญฺจ เฉโก ยถาภูตเวทีฯ อุปลทฺธินิสฺสิตกถนฺติ อตฺตุปลทฺธินิสฺสิตกถํ หิตฺวาฯ โวหารเภทํ อกโรโนฺตติ ‘‘อหํ ปรมตฺถํ ชานามี’’ติ โลกโวหารํ ภินฺทโนฺต อวินาเสโนฺต โลเก โลกสมญฺญเมว นิสฺสาย ‘‘อหํ, มมา’’ติ วเทยฺยฯ ขนฺธา ภุญฺชนฺตีติอาทินา โวหารเภทํ, ตตฺถ จ อาทีนวํ ทเสฺสติฯ
Khandhādīsu kusaloti khandhāyatanādīsu salakkhaṇādīsu ca samūhādivasena pavattiyañca cheko yathābhūtavedī. Upaladdhinissitakathanti attupaladdhinissitakathaṃ hitvā. Vohārabhedaṃ akarontoti ‘‘ahaṃ paramatthaṃ jānāmī’’ti lokavohāraṃ bhindanto avināsento loke lokasamaññameva nissāya ‘‘ahaṃ, mamā’’ti vadeyya. Khandhā bhuñjantītiādinā vohārabhedaṃ, tattha ca ādīnavaṃ dasseti.
มาโน นาม ทิฎฺฐิยา สมธุโรฯ ตถา หิ ทุติยมคฺคาทีสุ สมฺมาทิฎฺฐิยา ปหานาภิสมยสฺส ปฎิวิปจฺจนีเก ปฎิปตฺติสิทฺธิฯ เตนาห ‘‘ยทิ ทิฎฺฐิยา วเสน น วทติ, มานวเสน นุ โข วทตีติ จิเนฺตตฺวา’’ติฯ วิธูปิตาติ สนฺตาปิตา ญาณคฺคินา ทฑฺฒาฯ เต ปน วิทฺธํสิตา นาม โหนฺตีติ อาห ‘‘วิธมิตา’’ติฯ มมงฺการาทโย มยนฺติ สตฺตสนฺตาเน สติ ปวตฺตนฺติ เอเตนาติ มโย, มญฺญนาฯ มโย เอว มยตาติ อาห ‘‘มยตนฺติ มญฺญน’’นฺติฯ
Māno nāma diṭṭhiyā samadhuro. Tathā hi dutiyamaggādīsu sammādiṭṭhiyā pahānābhisamayassa paṭivipaccanīke paṭipattisiddhi. Tenāha ‘‘yadi diṭṭhiyā vasena na vadati, mānavasena nu kho vadatīti cintetvā’’ti. Vidhūpitāti santāpitā ñāṇagginā daḍḍhā. Te pana viddhaṃsitā nāma hontīti āha ‘‘vidhamitā’’ti. Mamaṅkārādayo mayanti sattasantāne sati pavattanti etenāti mayo, maññanā. Mayo eva mayatāti āha ‘‘mayatanti maññana’’nti.
อรหนฺตสุตฺตวณฺณนา นิฎฺฐิตาฯ
Arahantasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๕. อรหนฺตสุตฺตํ • 5. Arahantasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๕. อรหนฺตสุตฺตวณฺณนา • 5. Arahantasuttavaṇṇanā
