| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៤. អរហន្តសុត្តវណ្ណនា
4. Arahantasuttavaṇṇanā
៧៦. យត្តកា សត្តាវាសាតិ តស្មិំ តស្មិំ សត្តនិកាយេ អាវសនដ្ឋេន សត្តា ឯវ សត្តាវាសា។ តេន យត្តកា សត្តាវាសា, តេហិ សព្ពេហិបិ ឯតេ អគ្គា ឯតេ សេដ្ឋា, យេ ឥមេ អរហន្តាតិ ទស្សេតិ។ បុរិមនយេនេវាតិ បុរិមស្មិំ សត្តដ្ឋានកោសល្លសុត្តេ វុត្តនយេន។
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
តទត្ថបរិទីបនាហីតិ ‘‘បញ្ចក្ខន្ធេ បរិញ្ញាយ។ តណ្ហា តេសំ ន វិជ្ជតិ។ អស្មិមានោ សមុច្ឆិន្នោ’’តិអាទិនា តស្ស យថានិទ្ទិដ្ឋស្ស សុត្តស្ស អត្ថទីបនាហិ ចេវ ‘‘អនេជំ តេ អនុប្បត្តា, ចិត្តំ តេសំ អនាវិល’’ន្តិអាទិនា វិសេសត្ថបរិទីបនាហិ ច។ ឈានមគ្គផលបរិយាបន្នំ អតិសយិតសុខំ ឯតេសមត្ថីតិ សុខិនោតិ អាហ ‘‘ឈាន…បេ.… សុខិតា’’តិ។ តណ្ហា តេសំ ន វិជ្ជតីតិ ឯត្ថ តេសំ អបាយទុក្ខជនិកា តណ្ហា ន វិជ្ជតីតិ វុត្តំ។ វដ្ដមូលិកាយ តណ្ហាយ អភាវា ‘‘នន្ទី តេសំ ន វិជ្ជតី’’តិ ឯត្ថ វុច្ចតីតិ។ ឥមស្សបីតិ បិ-សទ្ទេន ទុក្ខស្សាភាវេនបីតិ ទុក្ខាភាវោ វិយ វដ្ដមូលិកតណ្ហាភាវោ សម្បិណ្ឌីយតីតិ ទដ្ឋព្ពំ។ តេន ហិ តេ អនុបាទិសេសនិព្ពានប្បត្តិយា អច្ចន្តសុខិតា ឯវាតិ វុច្ចន្តីតិ។ ‘‘សេយ្យោហមស្មី’’តិអាទិនយប្បវត្តិយា នវវិធោ។ ញាណេនាតិ អគ្គមគ្គញ្ញាណេន។
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
អរហត្តំ អនុប្បត្តា។ អលិត្តាតិ អមក្ខិតា។ ព្រហ្មភូតាតិ ព្រហ្មភាវំ បត្តា, ព្រហ្មតោ វា អរិយមគ្គញាណតោ ភូតា អរិយាយ ជាតិយា ជាតា។ សត្ត សទ្ធម្មា គោចរោ បវត្តិដ្ឋានំ ឯតេសន្តិ សត្តសទ្ធម្មគោចរា។
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
និរាសង្កចារោ នាម គហិតោ កុតោចិបិ តេសំ អាសង្កាយ អភាវតោ។ សម្មាទិដ្ឋិអាទីហិ ទសហិ អង្គេហិ សម្មាវិមុត្តិ-សម្មាញាណបរិយោសានេហិ។ ‘‘អាគុំ ន ករោតី’’តិអាទីហិ ចតូហិ ការណេហិ។ តណ្ហា តេសំ ន វិជ្ជតីតិ ឥទម្បិ តណ្ហាបហានស្ស ពហូបការតាទស្សនំ។ តេនាហ ‘‘ទាសការិកា តណ្ហាបិ តេសំ នត្ថី’’តិ។
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
ន វិកម្បន្តិ ‘‘សេយ្យោហមស្មី’’តិអាទិនា។
Navikampanti ‘‘seyyohamasmī’’tiādinā.
ឧទ្ធំ តិរិយំ អបាចីនន្តិ ឯត្ថ ‘‘ឧទ្ធំ វុច្ចតី’’តិអាទិនា រូបមុខេន អត្តភាវំ គហេត្វា បវត្តោ បឋមនយោ។ កាលត្តយវសេន ធម្មប្បវត្តិំ គហេត្វា បវត្តោ ទុតិយនយោ។ ឋានវសេន សកលលោកធាតុំ គហេត្វា បវត្តោ តតិយនយោ។ ពុទ្ធាតិ ចត្តារិ សច្ចានិ ពុទ្ធវន្តោ។
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
សីហនាទសមោធានន្តិ សីហនាទានំ សំកលនំ។ លោកេ អត្តនោ ឧត្តរិតរស្សាភាវា អនុត្តរា។ ឧត្តរោ តាវ តិដ្ឋតុ បុរិសោ, សទិសោបិ តាវ នត្ថីតិ អសទិសា។ សកលម្បិ ភវំ ឧត្តរិត្វា ភវបិដ្ឋេ ឋត្វា វិមុត្តិសុខេន សុខិតត្តាទិវសេន ឯកវីសតិយាការេហិ សីហនាទំ នទន្តិ។
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
អរហន្តសុត្តវណ្ណនា និដ្ឋិតា។
Arahantasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. អរហន្តសុត្តំ • 4. Arahantasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៤. អរហន្តសុត្តវណ្ណនា • 4. Arahantasuttavaṇṇanā
