| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. အရဟန္တသုတ္တဝဏ္ဏနာ
5. Arahantasuttavaṇṇanā
၂၅. ကတာဝီတိ ကတဝာ, ပရိညာဒိကိစ္စံ ကတ္ဝာ နိဋ္ဌပေတ္ဝာ ဌိတောတိ အတ္ထော။ တေနာဟ ‘‘စတူဟိ မဂ္ဂေဟိ ကတကိစ္စော’’တိ။ သ္ဝာယမတ္ထော အရဟန္တိအာဒိသဒ္ဒသန္နိဓာနတော ဝိညာယတိ။ ဧဝံ ‘‘အဟံ ဝဒာမီ’’တိအာဒိအာကာရေန ပုစ္ဆတိ။
25.Katāvīti katavā, pariññādikiccaṃ katvā niṭṭhapetvā ṭhitoti attho. Tenāha ‘‘catūhi maggehi katakicco’’ti. Svāyamattho arahantiādisaddasannidhānato viññāyati. Evaṃ ‘‘ahaṃ vadāmī’’tiādiākārena pucchati.
ခန္ဓာဒီသု ကုသလောတိ ခန္ဓာယတနာဒီသု သလက္ခဏာဒီသု စ သမူဟာဒိဝသေန ပဝတ္တိယဉ္စ ဆေကော ယထာဘူတဝေဒီ။ ဥပလဒ္ဓိနိသ္သိတကထန္တိ အတ္တုပလဒ္ဓိနိသ္သိတကထံ ဟိတ္ဝာ။ ဝောဟာရဘေဒံ အကရောန္တောတိ ‘‘အဟံ ပရမတ္ထံ ဇာနာမီ’’တိ လောကဝောဟာရံ ဘိန္ဒန္တော အဝိနာသေန္တော လောကေ လောကသမညမေဝ နိသ္သာယ ‘‘အဟံ, မမာ’’တိ ဝဒေယ္ယ။ ခန္ဓာ ဘုဉ္ဇန္တီတိအာဒိနာ ဝောဟာရဘေဒံ, တတ္ထ စ အာဒီနဝံ ဒသ္သေတိ။
Khandhādīsu kusaloti khandhāyatanādīsu salakkhaṇādīsu ca samūhādivasena pavattiyañca cheko yathābhūtavedī. Upaladdhinissitakathanti attupaladdhinissitakathaṃ hitvā. Vohārabhedaṃ akarontoti ‘‘ahaṃ paramatthaṃ jānāmī’’ti lokavohāraṃ bhindanto avināsento loke lokasamaññameva nissāya ‘‘ahaṃ, mamā’’ti vadeyya. Khandhā bhuñjantītiādinā vohārabhedaṃ, tattha ca ādīnavaṃ dasseti.
မာနော နာမ ဒိဋ္ဌိယာ သမဓုရော။ တထာ ဟိ ဒုတိယမဂ္ဂာဒီသု သမ္မာဒိဋ္ဌိယာ ပဟာနာဘိသမယသ္သ ပဋိဝိပစ္စနီကေ ပဋိပတ္တိသိဒ္ဓိ။ တေနာဟ ‘‘ယဒိ ဒိဋ္ဌိယာ ဝသေန န ဝဒတိ, မာနဝသေန နု ခော ဝဒတီတိ စိန္တေတ္ဝာ’’တိ။ ဝိဓူပိတာတိ သန္တာပိတာ ဉာဏဂ္ဂိနာ ဒဍ္ဎာ။ တေ ပန ဝိဒ္ဓံသိတာ နာမ ဟောန္တီတိ အာဟ ‘‘ဝိဓမိတာ’’တိ။ မမင္ကာရာဒယော မယန္တိ သတ္တသန္တာနေ သတိ ပဝတ္တန္တိ ဧတေနာတိ မယော, မညနာ။ မယော ဧဝ မယတာတိ အာဟ ‘‘မယတန္တိ မညန’’န္တိ။
Māno nāma diṭṭhiyā samadhuro. Tathā hi dutiyamaggādīsu sammādiṭṭhiyā pahānābhisamayassa paṭivipaccanīke paṭipattisiddhi. Tenāha ‘‘yadi diṭṭhiyā vasena na vadati, mānavasena nu kho vadatīti cintetvā’’ti. Vidhūpitāti santāpitā ñāṇagginā daḍḍhā. Te pana viddhaṃsitā nāma hontīti āha ‘‘vidhamitā’’ti. Mamaṅkārādayo mayanti sattasantāne sati pavattanti etenāti mayo, maññanā. Mayo eva mayatāti āha ‘‘mayatanti maññana’’nti.
အရဟန္တသုတ္တဝဏ္ဏနာ နိဋ္ဌိတာ။
Arahantasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. အရဟန္တသုတ္တံ • 5. Arahantasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အရဟန္တသုတ္တဝဏ္ဏနာ • 5. Arahantasuttavaṇṇanā
