| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪. ಅರಹನ್ತಸುತ್ತವಣ್ಣನಾ
4. Arahantasuttavaṇṇanā
೭೬. ಯತ್ತಕಾ ಸತ್ತಾವಾಸಾತಿ ತಸ್ಮಿಂ ತಸ್ಮಿಂ ಸತ್ತನಿಕಾಯೇ ಆವಸನಟ್ಠೇನ ಸತ್ತಾ ಏವ ಸತ್ತಾವಾಸಾ। ತೇನ ಯತ್ತಕಾ ಸತ್ತಾವಾಸಾ, ತೇಹಿ ಸಬ್ಬೇಹಿಪಿ ಏತೇ ಅಗ್ಗಾ ಏತೇ ಸೇಟ್ಠಾ, ಯೇ ಇಮೇ ಅರಹನ್ತಾತಿ ದಸ್ಸೇತಿ। ಪುರಿಮನಯೇನೇವಾತಿ ಪುರಿಮಸ್ಮಿಂ ಸತ್ತಟ್ಠಾನಕೋಸಲ್ಲಸುತ್ತೇ ವುತ್ತನಯೇನ।
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
ತದತ್ಥಪರಿದೀಪನಾಹೀತಿ ‘‘ಪಞ್ಚಕ್ಖನ್ಧೇ ಪರಿಞ್ಞಾಯ। ತಣ್ಹಾ ತೇಸಂ ನ ವಿಜ್ಜತಿ। ಅಸ್ಮಿಮಾನೋ ಸಮುಚ್ಛಿನ್ನೋ’’ತಿಆದಿನಾ ತಸ್ಸ ಯಥಾನಿದ್ದಿಟ್ಠಸ್ಸ ಸುತ್ತಸ್ಸ ಅತ್ಥದೀಪನಾಹಿ ಚೇವ ‘‘ಅನೇಜಂ ತೇ ಅನುಪ್ಪತ್ತಾ, ಚಿತ್ತಂ ತೇಸಂ ಅನಾವಿಲ’’ನ್ತಿಆದಿನಾ ವಿಸೇಸತ್ಥಪರಿದೀಪನಾಹಿ ಚ। ಝಾನಮಗ್ಗಫಲಪರಿಯಾಪನ್ನಂ ಅತಿಸಯಿತಸುಖಂ ಏತೇಸಮತ್ಥೀತಿ ಸುಖಿನೋತಿ ಆಹ ‘‘ಝಾನ…ಪೇ॰… ಸುಖಿತಾ’’ತಿ। ತಣ್ಹಾ ತೇಸಂ ನ ವಿಜ್ಜತೀತಿ ಏತ್ಥ ತೇಸಂ ಅಪಾಯದುಕ್ಖಜನಿಕಾ ತಣ್ಹಾ ನ ವಿಜ್ಜತೀತಿ ವುತ್ತಂ। ವಟ್ಟಮೂಲಿಕಾಯ ತಣ್ಹಾಯ ಅಭಾವಾ ‘‘ನನ್ದೀ ತೇಸಂ ನ ವಿಜ್ಜತೀ’’ತಿ ಏತ್ಥ ವುಚ್ಚತೀತಿ। ಇಮಸ್ಸಪೀತಿ ಪಿ-ಸದ್ದೇನ ದುಕ್ಖಸ್ಸಾಭಾವೇನಪೀತಿ ದುಕ್ಖಾಭಾವೋ ವಿಯ ವಟ್ಟಮೂಲಿಕತಣ್ಹಾಭಾವೋ ಸಮ್ಪಿಣ್ಡೀಯತೀತಿ ದಟ್ಠಬ್ಬಂ। ತೇನ ಹಿ ತೇ ಅನುಪಾದಿಸೇಸನಿಬ್ಬಾನಪ್ಪತ್ತಿಯಾ ಅಚ್ಚನ್ತಸುಖಿತಾ ಏವಾತಿ ವುಚ್ಚನ್ತೀತಿ। ‘‘ಸೇಯ್ಯೋಹಮಸ್ಮೀ’’ತಿಆದಿನಯಪ್ಪವತ್ತಿಯಾ ನವವಿಧೋ। ಞಾಣೇನಾತಿ ಅಗ್ಗಮಗ್ಗಞ್ಞಾಣೇನ।
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
ಅರಹತ್ತಂ ಅನುಪ್ಪತ್ತಾ। ಅಲಿತ್ತಾತಿ ಅಮಕ್ಖಿತಾ। ಬ್ರಹ್ಮಭೂತಾತಿ ಬ್ರಹ್ಮಭಾವಂ ಪತ್ತಾ, ಬ್ರಹ್ಮತೋ ವಾ ಅರಿಯಮಗ್ಗಞಾಣತೋ ಭೂತಾ ಅರಿಯಾಯ ಜಾತಿಯಾ ಜಾತಾ। ಸತ್ತ ಸದ್ಧಮ್ಮಾ ಗೋಚರೋ ಪವತ್ತಿಟ್ಠಾನಂ ಏತೇಸನ್ತಿ ಸತ್ತಸದ್ಧಮ್ಮಗೋಚರಾ।
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
ನಿರಾಸಙ್ಕಚಾರೋ ನಾಮ ಗಹಿತೋ ಕುತೋಚಿಪಿ ತೇಸಂ ಆಸಙ್ಕಾಯ ಅಭಾವತೋ। ಸಮ್ಮಾದಿಟ್ಠಿಆದೀಹಿ ದಸಹಿ ಅಙ್ಗೇಹಿ ಸಮ್ಮಾವಿಮುತ್ತಿ-ಸಮ್ಮಾಞಾಣಪರಿಯೋಸಾನೇಹಿ। ‘‘ಆಗುಂ ನ ಕರೋತೀ’’ತಿಆದೀಹಿ ಚತೂಹಿ ಕಾರಣೇಹಿ। ತಣ್ಹಾ ತೇಸಂ ನ ವಿಜ್ಜತೀತಿ ಇದಮ್ಪಿ ತಣ್ಹಾಪಹಾನಸ್ಸ ಬಹೂಪಕಾರತಾದಸ್ಸನಂ। ತೇನಾಹ ‘‘ದಾಸಕಾರಿಕಾ ತಣ್ಹಾಪಿ ತೇಸಂ ನತ್ಥೀ’’ತಿ।
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
ನ ವಿಕಮ್ಪನ್ತಿ ‘‘ಸೇಯ್ಯೋಹಮಸ್ಮೀ’’ತಿಆದಿನಾ।
Navikampanti ‘‘seyyohamasmī’’tiādinā.
ಉದ್ಧಂ ತಿರಿಯಂ ಅಪಾಚೀನನ್ತಿ ಏತ್ಥ ‘‘ಉದ್ಧಂ ವುಚ್ಚತೀ’’ತಿಆದಿನಾ ರೂಪಮುಖೇನ ಅತ್ತಭಾವಂ ಗಹೇತ್ವಾ ಪವತ್ತೋ ಪಠಮನಯೋ। ಕಾಲತ್ತಯವಸೇನ ಧಮ್ಮಪ್ಪವತ್ತಿಂ ಗಹೇತ್ವಾ ಪವತ್ತೋ ದುತಿಯನಯೋ। ಠಾನವಸೇನ ಸಕಲಲೋಕಧಾತುಂ ಗಹೇತ್ವಾ ಪವತ್ತೋ ತತಿಯನಯೋ। ಬುದ್ಧಾತಿ ಚತ್ತಾರಿ ಸಚ್ಚಾನಿ ಬುದ್ಧವನ್ತೋ।
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
ಸೀಹನಾದಸಮೋಧಾನನ್ತಿ ಸೀಹನಾದಾನಂ ಸಂಕಲನಂ। ಲೋಕೇ ಅತ್ತನೋ ಉತ್ತರಿತರಸ್ಸಾಭಾವಾ ಅನುತ್ತರಾ। ಉತ್ತರೋ ತಾವ ತಿಟ್ಠತು ಪುರಿಸೋ, ಸದಿಸೋಪಿ ತಾವ ನತ್ಥೀತಿ ಅಸದಿಸಾ। ಸಕಲಮ್ಪಿ ಭವಂ ಉತ್ತರಿತ್ವಾ ಭವಪಿಟ್ಠೇ ಠತ್ವಾ ವಿಮುತ್ತಿಸುಖೇನ ಸುಖಿತತ್ತಾದಿವಸೇನ ಏಕವೀಸತಿಯಾಕಾರೇಹಿ ಸೀಹನಾದಂ ನದನ್ತಿ।
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
ಅರಹನ್ತಸುತ್ತವಣ್ಣನಾ ನಿಟ್ಠಿತಾ।
Arahantasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೪. ಅರಹನ್ತಸುತ್ತಂ • 4. Arahantasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಅರಹನ್ತಸುತ್ತವಣ್ಣನಾ • 4. Arahantasuttavaṇṇanā
