| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. අරහන්‌තසුත්‌තවණ්‌ණනා
5. Arahantasuttavaṇṇanā
25. කතාවීති කතවා, පරිඤ්‌ඤාදිකිච්‌චං කත්‌වා නිට්‌ඨපෙත්‌වා ඨිතොති අත්‌ථො. තෙනාහ ‘‘චතූහි මග්‌ගෙහි කතකිච්‌චො’’ති. ස්‌වායමත්‌ථො අරහන්‌තිආදිසද්‌දසන්‌නිධානතො විඤ්‌ඤායති. එවං ‘‘අහං වදාමී’’තිආදිආකාරෙන පුච්‌ඡති.
25.Katāvīti katavā, pariññādikiccaṃ katvā niṭṭhapetvā ṭhitoti attho. Tenāha ‘‘catūhi maggehi katakicco’’ti. Svāyamattho arahantiādisaddasannidhānato viññāyati. Evaṃ ‘‘ahaṃ vadāmī’’tiādiākārena pucchati.
ඛන්‌ධාදීසු කුසලොති ඛන්‌ධායතනාදීසු සලක්‌ඛණාදීසු ච සමූහාදිවසෙන පවත්‌තියඤ්‌ච ඡෙකො යථාභූතවෙදී. උපලද්‌ධිනිස්‌සිතකථන්‌ති අත්‌තුපලද්‌ධිනිස්‌සිතකථං හිත්‌වා. වොහාරභෙදං අකරොන්‌තොති ‘‘අහං පරමත්‌ථං ජානාමී’’ති ලොකවොහාරං භින්‌දන්‌තො අවිනාසෙන්‌තො ලොකෙ ලොකසමඤ්‌ඤමෙව නිස්‌සාය ‘‘අහං, මමා’’ති වදෙය්‍ය. ඛන්‌ධා භුඤ්‌ජන්‌තීතිආදිනා වොහාරභෙදං, තත්‌ථ ච ආදීනවං දස්‌සෙති.
Khandhādīsu kusaloti khandhāyatanādīsu salakkhaṇādīsu ca samūhādivasena pavattiyañca cheko yathābhūtavedī. Upaladdhinissitakathanti attupaladdhinissitakathaṃ hitvā. Vohārabhedaṃ akarontoti ‘‘ahaṃ paramatthaṃ jānāmī’’ti lokavohāraṃ bhindanto avināsento loke lokasamaññameva nissāya ‘‘ahaṃ, mamā’’ti vadeyya. Khandhā bhuñjantītiādinā vohārabhedaṃ, tattha ca ādīnavaṃ dasseti.
මානො නාම දිට්‌ඨියා සමධුරො. තථා හි දුතියමග්‌ගාදීසු සම්‌මාදිට්‌ඨියා පහානාභිසමයස්‌ස පටිවිපච්‌චනීකෙ පටිපත්‌තිසිද්‌ධි. තෙනාහ ‘‘යදි දිට්‌ඨියා වසෙන න වදති, මානවසෙන නු ඛො වදතීති චින්‌තෙත්‌වා’’ති. විධූපිතාති සන්‌තාපිතා ඤාණග්‌ගිනා දඩ්‌ඪා. තෙ පන විද්‌ධංසිතා නාම හොන්‌තීති ආහ ‘‘විධමිතා’’ති. මමඞ්‌කාරාදයො මයන්‌ති සත්‌තසන්‌තානෙ සති පවත්‌තන්‌ති එතෙනාති මයො, මඤ්‌ඤනා. මයො එව මයතාති ආහ ‘‘මයතන්‌ති මඤ්‌ඤන’’න්‌ති.
Māno nāma diṭṭhiyā samadhuro. Tathā hi dutiyamaggādīsu sammādiṭṭhiyā pahānābhisamayassa paṭivipaccanīke paṭipattisiddhi. Tenāha ‘‘yadi diṭṭhiyā vasena na vadati, mānavasena nu kho vadatīti cintetvā’’ti. Vidhūpitāti santāpitā ñāṇagginā daḍḍhā. Te pana viddhaṃsitā nāma hontīti āha ‘‘vidhamitā’’ti. Mamaṅkārādayo mayanti sattasantāne sati pavattanti etenāti mayo, maññanā. Mayo eva mayatāti āha ‘‘mayatanti maññana’’nti.
අරහන්‌තසුත්‌තවණ්‌ණනා නිට්‌ඨිතා.
Arahantasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. අරහන්‌තසුත්‌තං • 5. Arahantasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. අරහන්‌තසුත්‌තවණ්‌ණනා • 5. Arahantasuttavaṇṇanā
