| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༤. ཨརཧནྟསུཏྟཝཎྞནཱ
4. Arahantasuttavaṇṇanā
༧༦. ཡཏྟཀཱ སཏྟཱཝཱསཱཏི ཏསྨིཾ ཏསྨིཾ སཏྟནིཀཱཡེ ཨཱཝསནཊྛེན སཏྟཱ ཨེཝ སཏྟཱཝཱསཱ། ཏེན ཡཏྟཀཱ སཏྟཱཝཱསཱ, ཏེཧི སབྦེཧིཔི ཨེཏེ ཨགྒཱ ཨེཏེ སེཊྛཱ, ཡེ ཨིམེ ཨརཧནྟཱཏི དསྶེཏི། པུརིམནཡེནེཝཱཏི པུརིམསྨིཾ སཏྟཊྛཱནཀོསལླསུཏྟེ ཝུཏྟནཡེན།
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
ཏདཏྠཔརིདཱིཔནཱཧཱིཏི ‘‘པཉྩཀྑནྡྷེ པརིཉྙཱཡ། ཏཎྷཱ ཏེསཾ ན ཝིཛྫཏི། ཨསྨིམཱནོ སམུཙྪིནྣོ’’ཏིཨཱདིནཱ ཏསྶ ཡཐཱནིདྡིཊྛསྶ སུཏྟསྶ ཨཏྠདཱིཔནཱཧི ཙེཝ ‘‘ཨནེཛཾ ཏེ ཨནུཔྤཏྟཱ, ཙིཏྟཾ ཏེསཾ ཨནཱཝིལ’’ནྟིཨཱདིནཱ ཝིསེསཏྠཔརིདཱིཔནཱཧི ཙ། ཛྷཱནམགྒཕལཔརིཡཱཔནྣཾ ཨཏིསཡིཏསུཁཾ ཨེཏེསམཏྠཱིཏི སུཁིནོཏི ཨཱཧ ‘‘ཛྷཱན…པེ॰… སུཁིཏཱ’’ཏི། ཏཎྷཱ ཏེསཾ ན ཝིཛྫཏཱིཏི ཨེཏྠ ཏེསཾ ཨཔཱཡདུཀྑཛནིཀཱ ཏཎྷཱ ན ཝིཛྫཏཱིཏི ཝུཏྟཾ། ཝཊྚམཱུལིཀཱཡ ཏཎྷཱཡ ཨབྷཱཝཱ ‘‘ནནྡཱི ཏེསཾ ན ཝིཛྫཏཱི’’ཏི ཨེཏྠ ཝུཙྩཏཱིཏི། ཨིམསྶཔཱིཏི པི-སདྡེན དུཀྑསྶཱབྷཱཝེནཔཱིཏི དུཀྑཱབྷཱཝོ ཝིཡ ཝཊྚམཱུལིཀཏཎྷཱབྷཱཝོ སམྤིཎྜཱིཡཏཱིཏི དཊྛབྦཾ། ཏེན ཧི ཏེ ཨནུཔཱདིསེསནིབྦཱནཔྤཏྟིཡཱ ཨཙྩནྟསུཁིཏཱ ཨེཝཱཏི ཝུཙྩནྟཱིཏི། ‘‘སེཡྻོཧམསྨཱི’’ཏིཨཱདིནཡཔྤཝཏྟིཡཱ ནཝཝིདྷོ། ཉཱཎེནཱཏི ཨགྒམགྒཉྙཱཎེན།
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
ཨརཧཏྟཾ ཨནུཔྤཏྟཱ། ཨལིཏྟཱཏི ཨམཀྑིཏཱ། བྲཧྨབྷཱུཏཱཏི བྲཧྨབྷཱཝཾ པཏྟཱ, བྲཧྨཏོ ཝཱ ཨརིཡམགྒཉཱཎཏོ བྷཱུཏཱ ཨརིཡཱཡ ཛཱཏིཡཱ ཛཱཏཱ། སཏྟ སདྡྷམྨཱ གོཙརོ པཝཏྟིཊྛཱནཾ ཨེཏེསནྟི སཏྟསདྡྷམྨགོཙརཱ།
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
ནིརཱསངྐཙཱརོ ནཱམ གཧིཏོ ཀུཏོཙིཔི ཏེསཾ ཨཱསངྐཱཡ ཨབྷཱཝཏོ། སམྨཱདིཊྛིཨཱདཱིཧི དསཧི ཨངྒེཧི སམྨཱཝིམུཏྟི-སམྨཱཉཱཎཔརིཡོསཱནེཧི། ‘‘ཨཱགུཾ ན ཀརོཏཱི’’ཏིཨཱདཱིཧི ཙཏཱུཧི ཀཱརཎེཧི། ཏཎྷཱ ཏེསཾ ན ཝིཛྫཏཱིཏི ཨིདམྤི ཏཎྷཱཔཧཱནསྶ བཧཱུཔཀཱརཏཱདསྶནཾ། ཏེནཱཧ ‘‘དཱསཀཱརིཀཱ ཏཎྷཱཔི ཏེསཾ ནཏྠཱི’’ཏི།
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
ན ཝིཀམྤནྟི ‘‘སེཡྻོཧམསྨཱི’’ཏིཨཱདིནཱ།
Navikampanti ‘‘seyyohamasmī’’tiādinā.
ཨུདྡྷཾ ཏིརིཡཾ ཨཔཱཙཱིནནྟི ཨེཏྠ ‘‘ཨུདྡྷཾ ཝུཙྩཏཱི’’ཏིཨཱདིནཱ རཱུཔམུཁེན ཨཏྟབྷཱཝཾ གཧེཏྭཱ པཝཏྟོ པཋམནཡོ། ཀཱལཏྟཡཝསེན དྷམྨཔྤཝཏྟིཾ གཧེཏྭཱ པཝཏྟོ དུཏིཡནཡོ། ཋཱནཝསེན སཀལལོཀདྷཱཏུཾ གཧེཏྭཱ པཝཏྟོ ཏཏིཡནཡོ། བུདྡྷཱཏི ཙཏྟཱརི སཙྩཱནི བུདྡྷཝནྟོ།
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
སཱིཧནཱདསམོདྷཱནནྟི སཱིཧནཱདཱནཾ སཾཀལནཾ། ལོཀེ ཨཏྟནོ ཨུཏྟརིཏརསྶཱབྷཱཝཱ ཨནུཏྟརཱ། ཨུཏྟརོ ཏཱཝ ཏིཊྛཏུ པུརིསོ, སདིསོཔི ཏཱཝ ནཏྠཱིཏི ཨསདིསཱ། སཀལམྤི བྷཝཾ ཨུཏྟརིཏྭཱ བྷཝཔིཊྛེ ཋཏྭཱ ཝིམུཏྟིསུཁེན སུཁིཏཏྟཱདིཝསེན ཨེཀཝཱིསཏིཡཱཀཱརེཧི སཱིཧནཱདཾ ནདནྟི།
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
ཨརཧནྟསུཏྟཝཎྞནཱ ནིཊྛིཏཱ།
Arahantasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༤. ཨརཧནྟསུཏྟཾ • 4. Arahantasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. ཨརཧནྟསུཏྟཝཎྞནཱ • 4. Arahantasuttavaṇṇanā
