| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. ཨརཧནྟཝེདནཱཝེདིཡནཔཉྷོ
6. Arahantavedanāvediyanapañho
༦. ‘‘བྷནྟེ ནཱགསེན, ཏུམྷེ བྷཎཐ ‘ཨརཧཱ ཨེཀཾ ཝེདནཾ ཝེདཡཏི ཀཱཡིཀཾ, ན ཙེཏསིཀ’ནྟི། ཀིཾ ནུ ཁོ, བྷནྟེ ནཱགསེན, ཨརཧཏོ ཙིཏྟཾ ཡཾ ཀཱཡཾ ནིསྶཱཡ པཝཏྟཏི, ཏཏྠ ཨརཧཱ ཨནིསྶརོ ཨསྶཱམཱི ཨཝསཝཏྟཱི’’ཏི ? ‘‘ཨཱམ, མཧཱརཱཛཱ’’ཏི། ‘‘ན ཁོ, བྷནྟེ ནཱགསེན, ཡུཏྟམེཏཾ, ཡཾ སོ སཀཙིཏྟསྶ པཝཏྟམཱནེ ཀཱཡེ ཨནིསྶརོ ཧོཏི ཨསྶཱམཱི ཨཝསཝཏྟཱི; སཀུཎོཔི ཏཱཝ, བྷནྟེ, ཡསྨིཾ ཀུལཱཝཀེ པཊིཝསཏི, ཏཏྠ སོ ཨིསྶརོ ཧོཏི སཱམཱི ཝསཝཏྟཱི’’ཏི།
6. ‘‘Bhante nāgasena, tumhe bhaṇatha ‘arahā ekaṃ vedanaṃ vedayati kāyikaṃ, na cetasika’nti. Kiṃ nu kho, bhante nāgasena, arahato cittaṃ yaṃ kāyaṃ nissāya pavattati, tattha arahā anissaro assāmī avasavattī’’ti ? ‘‘Āma, mahārājā’’ti. ‘‘Na kho, bhante nāgasena, yuttametaṃ, yaṃ so sakacittassa pavattamāne kāye anissaro hoti assāmī avasavattī; sakuṇopi tāva, bhante, yasmiṃ kulāvake paṭivasati, tattha so issaro hoti sāmī vasavattī’’ti.
‘‘དསཡིམེ, མཧཱརཱཛ, ཀཱཡཱནུགཏཱ དྷམྨཱ བྷཝེ བྷཝེ ཀཱཡཾ ཨནུདྷཱཝནྟི ཨནུཔརིཝཏྟནྟི། ཀཏམེ དས? སཱིཏཾ ཨུཎྷཾ ཛིགྷཙྪཱ པིཔཱསཱ ཨུཙྩཱརོ པསྶཱཝོ མིདྡྷཾ ཛརཱ བྱཱདྷི མརཎཾ། ཨིམེ ཁོ, མཧཱརཱཛ, དས ཀཱཡཱནུགཏཱ དྷམྨཱ བྷཝེ བྷཝེ ཀཱཡཾ ཨནུདྷཱཝནྟི ཨནུཔརིཝཏྟནྟི, ཏཏྠ ཨརཧཱ ཨནིསྶརོ ཨསྶཱམཱི ཨཝསཝཏྟཱི’’ཏི།
‘‘Dasayime, mahārāja, kāyānugatā dhammā bhave bhave kāyaṃ anudhāvanti anuparivattanti. Katame dasa? Sītaṃ uṇhaṃ jighacchā pipāsā uccāro passāvo middhaṃ jarā byādhi maraṇaṃ. Ime kho, mahārāja, dasa kāyānugatā dhammā bhave bhave kāyaṃ anudhāvanti anuparivattanti, tattha arahā anissaro assāmī avasavattī’’ti.
‘‘བྷནྟེ ནཱགསེན, ཀེན ཀཱརཎེན ཨརཧཏོ ཀཱཡེ ཨཱཎཱ ནཔྤཝཏྟཏི ཨིསྶརིཡཾ ཝཱ, ཏཏྠ མེ ཀཱརཎཾ བྲཱུཧཱི’’ཏི? ‘‘ཡཐཱ, མཧཱརཱཛ, ཡེ ཀེཙི པཐཝིནིསྶིཏཱ སཏྟཱ, སབྦེ ཏེ པཐཝིཾ ནིསྶཱཡ ཙརནྟི ཝིཧརནྟི ཝུཏྟིཾ ཀཔྤེནྟི, ཨཔི ནུ ཁོ, མཧཱརཱཛ, ཏེསཾ པཐཝིཡཱ ཨཱཎཱ པཝཏྟཏི ཨིསྶརིཡཾ ཝཱ’’ཏི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨརཧཏོ ཙིཏྟཾ ཀཱཡཾ ནིསྶཱཡ པཝཏྟཏི, ན ཙ ཨརཧཏོ ཀཱཡེ ཨཱཎཱ པཝཏྟཏི ཨིསྶརིཡཾ ཝཱ’’ཏི།
‘‘Bhante nāgasena, kena kāraṇena arahato kāye āṇā nappavattati issariyaṃ vā, tattha me kāraṇaṃ brūhī’’ti? ‘‘Yathā, mahārāja, ye keci pathavinissitā sattā, sabbe te pathaviṃ nissāya caranti viharanti vuttiṃ kappenti, api nu kho, mahārāja, tesaṃ pathaviyā āṇā pavattati issariyaṃ vā’’ti? ‘‘Na hi, bhante’’ti. ‘‘Evameva kho, mahārāja, arahato cittaṃ kāyaṃ nissāya pavattati, na ca arahato kāye āṇā pavattati issariyaṃ vā’’ti.
‘‘བྷནྟེ ནཱགསེན, ཀེན ཀཱརཎེན པུཐུཛྫནོ ཀཱཡིཀམྤི ཙེཏསིཀམྤི ཝེདནཾ ཝེདཡཏཱི’’ཏི? ‘‘ཨབྷཱཝིཏཏྟཱ, མཧཱརཱཛ, ཙིཏྟསྶ པུཐུཛྫནོ ཀཱཡིཀམྤི ཙེཏསིཀམྤི ཝེདནཾ ཝེདཡཏི། ཡཐཱ, མཧཱརཱཛ, གོཎོ ཚཱཏོ པརིཏསིཏོ ཨབལདུབྦལཔརིཏྟཀཏིཎེསུ ཝཱ ལཏཱཡ ཝཱ ཨུཔནིབདྡྷོ ཨསྶ, ཡདཱ སོ གོཎོ པརིཀུཔིཏོ ཧོཏི, ཏདཱ སཧ ཨུཔནིབནྡྷནེན པཀྐམཏི། ཨེཝམེཝ ཁོ, མཧཱརཱཛ, ཨབྷཱཝིཏཙིཏྟསྶ ཝེདནཱ ཨུཔྤཛྫིཏྭཱ ཙིཏྟཾ པརིཀོཔེཏི, ཙིཏྟཾ པརིཀུཔིཏཾ ཀཱཡཾ ཨཱབྷུཛཏི ནིབྦྷུཛཏི སམྤརིཝཏྟཀཾ ཀརོཏི། ཨཐ ཁོ སོ ཨབྷཱཝིཏཙིཏྟོ ཏསཏི རཝཏི བྷེརཝརཱཝམབྷིརཝཏི, ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན པུཐུཛྫནོ ཀཱཡིཀམྤི ཙེཏསིཀམྤི ཝེདནཾ ཝེདཡཏཱི’’ཏི།
‘‘Bhante nāgasena, kena kāraṇena puthujjano kāyikampi cetasikampi vedanaṃ vedayatī’’ti? ‘‘Abhāvitattā, mahārāja, cittassa puthujjano kāyikampi cetasikampi vedanaṃ vedayati. Yathā, mahārāja, goṇo chāto paritasito abaladubbalaparittakatiṇesu vā latāya vā upanibaddho assa, yadā so goṇo parikupito hoti, tadā saha upanibandhanena pakkamati. Evameva kho, mahārāja, abhāvitacittassa vedanā uppajjitvā cittaṃ parikopeti, cittaṃ parikupitaṃ kāyaṃ ābhujati nibbhujati samparivattakaṃ karoti. Atha kho so abhāvitacitto tasati ravati bheravarāvamabhiravati, idamettha, mahārāja, kāraṇaṃ, yena kāraṇena puthujjano kāyikampi cetasikampi vedanaṃ vedayatī’’ti.
‘‘ཀིཾ པན ཏཾ ཀཱརཎཾ, ཡེན ཀཱརཎེན ཨརཧཱ ཨེཀཾ ཝེདནཾ ཝེདཡཏི ཀཱཡིཀཾ, ན ཙེཏསིཀ’’ནྟི? ‘‘ཨརཧཏོ, མཧཱརཱཛ, ཙིཏྟཾ བྷཱཝིཏཾ ཧོཏི སུབྷཱཝིཏཾ དནྟཾ སུདནྟཾ ཨསྶཝཾ ཝཙནཀརཾ, སོ དུཀྑཱཡ ཝེདནཱཡ ཕུཊྛོ སམཱནོ ‘ཨནིཙྩ’ནྟི དལ༹ྷཾ གཎྷཱཏི, སམཱདྷིཐམྦྷེ ཙིཏྟཾ ཨུཔནིབནྡྷཏི, ཏསྶ ཏཾ ཙིཏྟཾ སམཱདྷིཐམྦྷེ ཨུཔནིབནྡྷནཾ ན ཝེདྷཏི ན ཙལཏི, ཋིཏཾ ཧོཏི ཨཝིཀྑིཏྟཾ, ཏསྶ ཝེདནཱཝིཀཱརཝིཔྥཱརེན ཀཱཡོ ཨཱབྷུཛཏི ནིབྦྷུཛཏི སམྤརིཝཏྟཏི, ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན ཨརཧཱ ཨེཀཾ ཝེདནཾ ཝེདཡཏི ཀཱཡིཀཾ, ན ཙེཏསིཀ’’ནྟི།
‘‘Kiṃ pana taṃ kāraṇaṃ, yena kāraṇena arahā ekaṃ vedanaṃ vedayati kāyikaṃ, na cetasika’’nti? ‘‘Arahato, mahārāja, cittaṃ bhāvitaṃ hoti subhāvitaṃ dantaṃ sudantaṃ assavaṃ vacanakaraṃ, so dukkhāya vedanāya phuṭṭho samāno ‘anicca’nti daḷhaṃ gaṇhāti, samādhithambhe cittaṃ upanibandhati, tassa taṃ cittaṃ samādhithambhe upanibandhanaṃ na vedhati na calati, ṭhitaṃ hoti avikkhittaṃ, tassa vedanāvikāravipphārena kāyo ābhujati nibbhujati samparivattati, idamettha, mahārāja, kāraṇaṃ, yena kāraṇena arahā ekaṃ vedanaṃ vedayati kāyikaṃ, na cetasika’’nti.
‘‘བྷནྟེ ནཱགསེན, ཏཾ ནཱམ ལོཀེ ཨཙྪརིཡཾ ཡཾ ཀཱཡེ ཙལམཱནེ ཙིཏྟཾ ན ཙལཏི, ཏཏྠ མེ ཀཱརཎཾ བྲཱུཧཱི’’ཏི། ‘‘ཡཐཱ, མཧཱརཱཛ, མཧཏིམཧཱརུཀྑེ ཁནྡྷསཱཁཱཔལཱསསམྤནྣེ ཨནིལབལསམཱཧཏེ སཱཁཱ ཙལཏི, ཨཔི ནུ ཏསྶ ཁནྡྷོཔི ཙལཏཱི’’ཏི? ‘‘ན ཧི, བྷནྟེ’’ཏི ། ‘‘ཨེཝམེཝ ཁོ, མཧཱརཱཛ, ཨརཧཱ དུཀྑཱཡ ཝེདནཱཡ ཕུཊྛོ སམཱནོ ‘ཨནིཙྩ’ནྟི དལ༹ྷཾ གཎྷཱཏི, སམཱདྷིཐམྦྷེ ཙིཏྟཾ ཨུཔནིབནྡྷཏི, ཏསྶ ཏཾ ཙིཏྟཾ སམཱདྷིཐམྦྷེ ཨུཔནིབནྡྷནཾ ན ཝེདྷཏི ན ཙལཏི, ཋིཏཾ ཧོཏི ཨཝིཀྑིཏྟཾ, ཏསྶ ཝེདནཱཝིཀཱརཝིཔྥཱརེན ཀཱཡོ ཨཱབྷུཛཏི ནིབྦྷུཛཏི སམྤརིཝཏྟཏི, ཙིཏྟཾ པན ཏསྶ ན ཝེདྷཏི ན ཙལཏི ཁནྡྷོ ཝིཡ མཧཱརུཀྑསྶཱ’’ཏི། ‘‘ཨཙྪརིཡཾ, བྷནྟེ ནཱགསེན, ཨབྦྷུཏཾ, བྷནྟེ ནཱགསེན, ན མེ ཨེཝརཱུཔོ སབྦཀཱལིཀོ དྷམྨཔདཱིཔོ དིཊྛཔུབྦོ’’ཏི།
‘‘Bhante nāgasena, taṃ nāma loke acchariyaṃ yaṃ kāye calamāne cittaṃ na calati, tattha me kāraṇaṃ brūhī’’ti. ‘‘Yathā, mahārāja, mahatimahārukkhe khandhasākhāpalāsasampanne anilabalasamāhate sākhā calati, api nu tassa khandhopi calatī’’ti? ‘‘Na hi, bhante’’ti . ‘‘Evameva kho, mahārāja, arahā dukkhāya vedanāya phuṭṭho samāno ‘anicca’nti daḷhaṃ gaṇhāti, samādhithambhe cittaṃ upanibandhati, tassa taṃ cittaṃ samādhithambhe upanibandhanaṃ na vedhati na calati, ṭhitaṃ hoti avikkhittaṃ, tassa vedanāvikāravipphārena kāyo ābhujati nibbhujati samparivattati, cittaṃ pana tassa na vedhati na calati khandho viya mahārukkhassā’’ti. ‘‘Acchariyaṃ, bhante nāgasena, abbhutaṃ, bhante nāgasena, na me evarūpo sabbakāliko dhammapadīpo diṭṭhapubbo’’ti.
ཨརཧནྟཝེདནཱཝེདིཡནཔཉྷོ ཚཊྛོ།
Arahantavedanāvediyanapañho chaṭṭho.
