| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৭. সত্তরসমৰগ্গো
17. Sattarasamavaggo
(১৬৬) ১. অরহতো পুঞ্ঞূপচযকথা
(166) 1. Arahato puññūpacayakathā
৭৭৬. অত্থি অরহতো পুঞ্ঞূপচযোতি? আমন্তা। অত্থি অরহতো অপুঞ্ঞূপচযোতি? ন হেৰং ৰত্তব্বে…পে॰… নত্থি অরহতো অপুঞ্ঞূপচযোতি? আমন্তা। নত্থি অরহতো পুঞ্ঞূপচযোতি? ন হেৰং ৰত্তব্বে…পে॰…।
776. Atthi arahato puññūpacayoti? Āmantā. Atthi arahato apuññūpacayoti? Na hevaṃ vattabbe…pe… natthi arahato apuññūpacayoti? Āmantā. Natthi arahato puññūpacayoti? Na hevaṃ vattabbe…pe….
৭৭৭. অত্থি অরহতো পুঞ্ঞূপচযোতি? আমন্তা। অরহা পুঞ্ঞাভিসঙ্খারং অভিসঙ্খরোতি, আনেঞ্জাভিসঙ্খারং অভিসঙ্খরোতি, গতিসংৰত্তনিযং কম্মং করোতি, ভৰসংৰত্তনিযং কম্মং করোতি, ইস্সরিযসংৰত্তনিযং কম্মং করোতি, অধিপচ্চসংৰত্তনিযং 1 কম্মং করোতি, মহাভোগসংৰত্তনিযং কম্মং করোতি, মহাপরিৰারসংৰত্তনিযং কম্মং করোতি, দেৰসোভগ্যসংৰত্তনিযং কম্মং করোতি, মনুস্সসোভগ্যসংৰত্তনিযং কম্মং করোতীতি? ন হেৰং ৰত্তব্বে…পে॰…।
777. Atthi arahato puññūpacayoti? Āmantā. Arahā puññābhisaṅkhāraṃ abhisaṅkharoti, āneñjābhisaṅkhāraṃ abhisaṅkharoti, gatisaṃvattaniyaṃ kammaṃ karoti, bhavasaṃvattaniyaṃ kammaṃ karoti, issariyasaṃvattaniyaṃ kammaṃ karoti, adhipaccasaṃvattaniyaṃ 2 kammaṃ karoti, mahābhogasaṃvattaniyaṃ kammaṃ karoti, mahāparivārasaṃvattaniyaṃ kammaṃ karoti, devasobhagyasaṃvattaniyaṃ kammaṃ karoti, manussasobhagyasaṃvattaniyaṃ kammaṃ karotīti? Na hevaṃ vattabbe…pe….
৭৭৮. অত্থি অরহতো পুঞ্ঞূপচযোতি? আমন্তা। অরহা আচিনাতীতি? ন হেৰং ৰত্তব্বে…পে॰… অরহা অপচিনাতীতি? ন হেৰং ৰত্তব্বে …পে॰… অরহা পজহতীতি…পে॰… অরহা উপাদিযতীতি…পে॰… অরহা ৰিসিনেতীতি…পে॰… অরহা উস্সিনেতীতি…পে॰… অরহা ৰিধূপেতীতি …পে॰… অরহা সন্ধূপেতীতি? ন হেৰং ৰত্তব্বে…পে॰… ননু অরহা নেৰাচিনাতি ন অপচিনাতি অপচিনিত্ৰা ঠিতোতি? আমন্তা। হঞ্চি অরহা নেৰাচিনাতি নাপচিনাতি অপচিনিত্ৰা ঠিতো, নো চ ৰত রে ৰত্তব্বে – ‘‘অত্থি অরহতো পুঞ্ঞূপচযো’’তি।
778. Atthi arahato puññūpacayoti? Āmantā. Arahā ācinātīti? Na hevaṃ vattabbe…pe… arahā apacinātīti? Na hevaṃ vattabbe …pe… arahā pajahatīti…pe… arahā upādiyatīti…pe… arahā visinetīti…pe… arahā ussinetīti…pe… arahā vidhūpetīti …pe… arahā sandhūpetīti? Na hevaṃ vattabbe…pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti nāpacināti apacinitvā ṭhito, no ca vata re vattabbe – ‘‘atthi arahato puññūpacayo’’ti.
ননু অরহা নেৰ পজহতি ন উপাদিযতি পজহিত্ৰা ঠিতো, নেৰ ৰিসিনেতি ন উস্সিনেতি ৰিসিনেত্ৰা ঠিতো, নেৰ ৰিধূপেতি ন সন্ধূপেতি ৰিধূপেত্ৰা ঠিতোতি? আমন্তা। হঞ্চি অরহা নেৰ ৰিধূপেতি ন সন্ধূপেতি ৰিধূপেত্ৰা ঠিতো, নো চ ৰত রে ৰত্তব্বে – ‘‘অত্থি অরহতো পুঞ্ঞূপচযো’’তি।
Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito, neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘atthi arahato puññūpacayo’’ti.
৭৭৯. নত্থি অরহতো পুঞ্ঞূপচযোতি? আমন্তা। অরহা দানং দদেয্যাতি? আমন্তা । হঞ্চি অরহা দানং দদেয্য, নো চ ৰত রে ৰত্তব্বে – ‘‘নত্থি অরহতো পুঞ্ঞূপচযো’’তি।
779. Natthi arahato puññūpacayoti? Āmantā. Arahā dānaṃ dadeyyāti? Āmantā . Hañci arahā dānaṃ dadeyya, no ca vata re vattabbe – ‘‘natthi arahato puññūpacayo’’ti.
অরহা চীৰরং দদেয্য…পে॰… পিণ্ডপাতং দদেয্য… সেনাসনং দদেয্য… গিলানপচ্চযভেসজ্জপরিক্খারং দদেয্য… খাদনীযং দদেয্য… ভোজনীযং দদেয্য… পানীযং দদেয্য… চেতিযং ৰন্দেয্য… চেতিযে মালং আরোপেয্য… গন্ধং আরোপেয্য… ৰিলেপনং আরোপেয্য…পে॰… চেতিযং অভিদক্খিণং 3 করেয্যাতি? আমন্তা। হঞ্চি অরহা চেতিযং অভিদক্খিণং করেয্য, নো চ ৰত রে ৰত্তব্বে – ‘‘নত্থি অরহতো পুঞ্ঞূপচযো’’তি।
Arahā cīvaraṃ dadeyya…pe… piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyya… khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 4 kareyyāti? Āmantā. Hañci arahā cetiyaṃ abhidakkhiṇaṃ kareyya, no ca vata re vattabbe – ‘‘natthi arahato puññūpacayo’’ti.
অত্থি অরহতো পুঞ্ঞূপচযোতিকথা নিট্ঠিতা।
Atthi arahato puññūpacayotikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. অত্থি অরহতো পুঞ্ঞূপচযকথাৰণ্ণনা • 1. Atthi arahato puññūpacayakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. অত্থিঅরহতোপুঞ্ঞূপচযকথাৰণ্ণনা • 1. Atthiarahatopuññūpacayakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. অত্থিঅরহতোপুঞ্ঞূপচযকথাৰণ্ণনা • 1. Atthiarahatopuññūpacayakathāvaṇṇanā
