| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๗. สตฺตรสมวโคฺค
17. Sattarasamavaggo
(๑๖๖) ๑. อรหโต ปุญฺญูปจยกถา
(166) 1. Arahato puññūpacayakathā
๗๗๖. อตฺถิ อรหโต ปุญฺญูปจโยติ? อามนฺตาฯ อตฺถิ อรหโต อปุญฺญูปจโยติ? น เหวํ วตฺตเพฺพ…เป.… นตฺถิ อรหโต อปุญฺญูปจโยติ? อามนฺตาฯ นตฺถิ อรหโต ปุญฺญูปจโยติ? น เหวํ วตฺตเพฺพ…เป.…ฯ
776. Atthi arahato puññūpacayoti? Āmantā. Atthi arahato apuññūpacayoti? Na hevaṃ vattabbe…pe… natthi arahato apuññūpacayoti? Āmantā. Natthi arahato puññūpacayoti? Na hevaṃ vattabbe…pe….
๗๗๗. อตฺถิ อรหโต ปุญฺญูปจโยติ? อามนฺตาฯ อรหา ปุญฺญาภิสงฺขารํ อภิสงฺขโรติ, อาเนญฺชาภิสงฺขารํ อภิสงฺขโรติ, คติสํวตฺตนิยํ กมฺมํ กโรติ, ภวสํวตฺตนิยํ กมฺมํ กโรติ, อิสฺสริยสํวตฺตนิยํ กมฺมํ กโรติ, อธิปจฺจสํวตฺตนิยํ 1 กมฺมํ กโรติ, มหาโภคสํวตฺตนิยํ กมฺมํ กโรติ, มหาปริวารสํวตฺตนิยํ กมฺมํ กโรติ, เทวโสภคฺยสํวตฺตนิยํ กมฺมํ กโรติ, มนุสฺสโสภคฺยสํวตฺตนิยํ กมฺมํ กโรตีติ? น เหวํ วตฺตเพฺพ…เป.…ฯ
777. Atthi arahato puññūpacayoti? Āmantā. Arahā puññābhisaṅkhāraṃ abhisaṅkharoti, āneñjābhisaṅkhāraṃ abhisaṅkharoti, gatisaṃvattaniyaṃ kammaṃ karoti, bhavasaṃvattaniyaṃ kammaṃ karoti, issariyasaṃvattaniyaṃ kammaṃ karoti, adhipaccasaṃvattaniyaṃ 2 kammaṃ karoti, mahābhogasaṃvattaniyaṃ kammaṃ karoti, mahāparivārasaṃvattaniyaṃ kammaṃ karoti, devasobhagyasaṃvattaniyaṃ kammaṃ karoti, manussasobhagyasaṃvattaniyaṃ kammaṃ karotīti? Na hevaṃ vattabbe…pe….
๗๗๘. อตฺถิ อรหโต ปุญฺญูปจโยติ? อามนฺตาฯ อรหา อาจินาตีติ? น เหวํ วตฺตเพฺพ…เป.… อรหา อปจินาตีติ? น เหวํ วตฺตเพฺพ …เป.… อรหา ปชหตีติ…เป.… อรหา อุปาทิยตีติ…เป.… อรหา วิสิเนตีติ…เป.… อรหา อุสฺสิเนตีติ…เป.… อรหา วิธูเปตีติ …เป.… อรหา สนฺธูเปตีติ? น เหวํ วตฺตเพฺพ…เป.… นนุ อรหา เนวาจินาติ น อปจินาติ อปจินิตฺวา ฐิโตติ? อามนฺตาฯ หญฺจิ อรหา เนวาจินาติ นาปจินาติ อปจินิตฺวา ฐิโต, โน จ วต เร วตฺตเพฺพ – ‘‘อตฺถิ อรหโต ปุญฺญูปจโย’’ติฯ
778. Atthi arahato puññūpacayoti? Āmantā. Arahā ācinātīti? Na hevaṃ vattabbe…pe… arahā apacinātīti? Na hevaṃ vattabbe …pe… arahā pajahatīti…pe… arahā upādiyatīti…pe… arahā visinetīti…pe… arahā ussinetīti…pe… arahā vidhūpetīti …pe… arahā sandhūpetīti? Na hevaṃ vattabbe…pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti nāpacināti apacinitvā ṭhito, no ca vata re vattabbe – ‘‘atthi arahato puññūpacayo’’ti.
นนุ อรหา เนว ปชหติ น อุปาทิยติ ปชหิตฺวา ฐิโต, เนว วิสิเนติ น อุสฺสิเนติ วิสิเนตฺวา ฐิโต, เนว วิธูเปติ น สนฺธูเปติ วิธูเปตฺวา ฐิโตติ? อามนฺตาฯ หญฺจิ อรหา เนว วิธูเปติ น สนฺธูเปติ วิธูเปตฺวา ฐิโต, โน จ วต เร วตฺตเพฺพ – ‘‘อตฺถิ อรหโต ปุญฺญูปจโย’’ติฯ
Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito, neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘atthi arahato puññūpacayo’’ti.
๗๗๙. นตฺถิ อรหโต ปุญฺญูปจโยติ? อามนฺตาฯ อรหา ทานํ ทเทยฺยาติ? อามนฺตา ฯ หญฺจิ อรหา ทานํ ทเทยฺย, โน จ วต เร วตฺตเพฺพ – ‘‘นตฺถิ อรหโต ปุญฺญูปจโย’’ติฯ
779. Natthi arahato puññūpacayoti? Āmantā. Arahā dānaṃ dadeyyāti? Āmantā . Hañci arahā dānaṃ dadeyya, no ca vata re vattabbe – ‘‘natthi arahato puññūpacayo’’ti.
อรหา จีวรํ ทเทยฺย…เป.… ปิณฺฑปาตํ ทเทยฺย… เสนาสนํ ทเทยฺย… คิลานปจฺจยเภสชฺชปริกฺขารํ ทเทยฺย… ขาทนียํ ทเทยฺย… โภชนียํ ทเทยฺย… ปานียํ ทเทยฺย… เจติยํ วเนฺทยฺย… เจติเย มาลํ อาโรเปยฺย… คนฺธํ อาโรเปยฺย… วิเลปนํ อาโรเปยฺย…เป.… เจติยํ อภิทกฺขิณํ 3 กเรยฺยาติ? อามนฺตาฯ หญฺจิ อรหา เจติยํ อภิทกฺขิณํ กเรยฺย, โน จ วต เร วตฺตเพฺพ – ‘‘นตฺถิ อรหโต ปุญฺญูปจโย’’ติฯ
Arahā cīvaraṃ dadeyya…pe… piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyya… khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 4 kareyyāti? Āmantā. Hañci arahā cetiyaṃ abhidakkhiṇaṃ kareyya, no ca vata re vattabbe – ‘‘natthi arahato puññūpacayo’’ti.
อตฺถิ อรหโต ปุญฺญูปจโยติกถา นิฎฺฐิตาฯ
Atthi arahato puññūpacayotikathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๑. อตฺถิ อรหโต ปุญฺญูปจยกถาวณฺณนา • 1. Atthi arahato puññūpacayakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๑. อตฺถิอรหโตปุญฺญูปจยกถาวณฺณนา • 1. Atthiarahatopuññūpacayakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๑. อตฺถิอรหโตปุญฺญูปจยกถาวณฺณนา • 1. Atthiarahatopuññūpacayakathāvaṇṇanā
