Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi

    ၁၇. သတ္တရသမဝဂ္ဂော

    17. Sattarasamavaggo

    (၁၆၆) ၁. အရဟတော ပုညူပစယကထာ

    (166) 1. Arahato puññūpacayakathā

    ၇၇၆. အတ္ထိ အရဟတော ပုညူပစယောတိ? အာမန္တာ။ အတ္ထိ အရဟတော အပုညူပစယောတိ? န ဟေဝံ ဝတ္တဗ္ဗေ။ပေ.။ နတ္ထိ အရဟတော အပုညူပစယောတိ? အာမန္တာ။ နတ္ထိ အရဟတော ပုညူပစယောတိ? န ဟေဝံ ဝတ္တဗ္ဗေ။ပေ.။။

    776. Atthi arahato puññūpacayoti? Āmantā. Atthi arahato apuññūpacayoti? Na hevaṃ vattabbe…pe… natthi arahato apuññūpacayoti? Āmantā. Natthi arahato puññūpacayoti? Na hevaṃ vattabbe…pe….

    ၇၇၇. အတ္ထိ အရဟတော ပုညူပစယောတိ? အာမန္တာ။ အရဟာ ပုညာဘိသင္ခာရံ အဘိသင္ခရောတိ, အာနေဉ္ဇာဘိသင္ခာရံ အဘိသင္ခရောတိ, ဂတိသံဝတ္တနိယံ ကမ္မံ ကရောတိ, ဘဝသံဝတ္တနိယံ ကမ္မံ ကရောတိ, ဣသ္သရိယသံဝတ္တနိယံ ကမ္မံ ကရောတိ, အဓိပစ္စသံဝတ္တနိယံ 1 ကမ္မံ ကရောတိ, မဟာဘောဂသံဝတ္တနိယံ ကမ္မံ ကရောတိ, မဟာပရိဝာရသံဝတ္တနိယံ ကမ္မံ ကရောတိ, ဒေဝသောဘဂ္ယသံဝတ္တနိယံ ကမ္မံ ကရောတိ, မနုသ္သသောဘဂ္ယသံဝတ္တနိယံ ကမ္မံ ကရောတီတိ? န ဟေဝံ ဝတ္တဗ္ဗေ။ပေ.။။

    777. Atthi arahato puññūpacayoti? Āmantā. Arahā puññābhisaṅkhāraṃ abhisaṅkharoti, āneñjābhisaṅkhāraṃ abhisaṅkharoti, gatisaṃvattaniyaṃ kammaṃ karoti, bhavasaṃvattaniyaṃ kammaṃ karoti, issariyasaṃvattaniyaṃ kammaṃ karoti, adhipaccasaṃvattaniyaṃ 2 kammaṃ karoti, mahābhogasaṃvattaniyaṃ kammaṃ karoti, mahāparivārasaṃvattaniyaṃ kammaṃ karoti, devasobhagyasaṃvattaniyaṃ kammaṃ karoti, manussasobhagyasaṃvattaniyaṃ kammaṃ karotīti? Na hevaṃ vattabbe…pe….

    ၇၇၈. အတ္ထိ အရဟတော ပုညူပစယောတိ? အာမန္တာ။ အရဟာ အာစိနာတီတိ? န ဟေဝံ ဝတ္တဗ္ဗေ။ပေ.။ အရဟာ အပစိနာတီတိ? န ဟေဝံ ဝတ္တဗ္ဗေ ။ပေ.။ အရဟာ ပဇဟတီတိ။ပေ.။ အရဟာ ဥပာဒိယတီတိ။ပေ.။ အရဟာ ဝိသိနေတီတိ။ပေ.။ အရဟာ ဥသ္သိနေတီတိ။ပေ.။ အရဟာ ဝိဓူပေတီတိ ။ပေ.။ အရဟာ သန္ဓူပေတီတိ? န ဟေဝံ ဝတ္တဗ္ဗေ။ပေ.။ နနု အရဟာ နေဝာစိနာတိ န အပစိနာတိ အပစိနိတ္ဝာ ဌိတောတိ? အာမန္တာ။ ဟဉ္စိ အရဟာ နေဝာစိနာတိ နာပစိနာတိ အပစိနိတ္ဝာ ဌိတော, နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပုညူပစယော’’တိ။

    778. Atthi arahato puññūpacayoti? Āmantā. Arahā ācinātīti? Na hevaṃ vattabbe…pe… arahā apacinātīti? Na hevaṃ vattabbe …pe… arahā pajahatīti…pe… arahā upādiyatīti…pe… arahā visinetīti…pe… arahā ussinetīti…pe… arahā vidhūpetīti …pe… arahā sandhūpetīti? Na hevaṃ vattabbe…pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti nāpacināti apacinitvā ṭhito, no ca vata re vattabbe – ‘‘atthi arahato puññūpacayo’’ti.

    နနု အရဟာ နေဝ ပဇဟတိ န ဥပာဒိယတိ ပဇဟိတ္ဝာ ဌိတော, နေဝ ဝိသိနေတိ န ဥသ္သိနေတိ ဝိသိနေတ္ဝာ ဌိတော, နေဝ ဝိဓူပေတိ န သန္ဓူပေတိ ဝိဓူပေတ္ဝာ ဌိတောတိ? အာမန္တာ။ ဟဉ္စိ အရဟာ နေဝ ဝိဓူပေတိ န သန္ဓူပေတိ ဝိဓူပေတ္ဝာ ဌိတော, နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပုညူပစယော’’တိ။

    Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito, neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘atthi arahato puññūpacayo’’ti.

    ၇၇၉. နတ္ထိ အရဟတော ပုညူပစယောတိ? အာမန္တာ။ အရဟာ ဒာနံ ဒဒေယ္ယာတိ? အာမန္တာ ။ ဟဉ္စိ အရဟာ ဒာနံ ဒဒေယ္ယ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော ပုညူပစယော’’တိ။

    779. Natthi arahato puññūpacayoti? Āmantā. Arahā dānaṃ dadeyyāti? Āmantā . Hañci arahā dānaṃ dadeyya, no ca vata re vattabbe – ‘‘natthi arahato puññūpacayo’’ti.

    အရဟာ စီဝရံ ဒဒေယ္ယ။ပေ.။ ပိဏ္ဍပာတံ ဒဒေယ္ယ။ သေနာသနံ ဒဒေယ္ယ။ ဂိလာနပစ္စယဘေသဇ္ဇပရိက္ခာရံ ဒဒေယ္ယ။ ခာဒနီယံ ဒဒေယ္ယ။ ဘောဇနီယံ ဒဒေယ္ယ။ ပာနီယံ ဒဒေယ္ယ။ စေတိယံ ဝန္ဒေယ္ယ။ စေတိယေ မာလံ အာရောပေယ္ယ။ ဂန္ဓံ အာရောပေယ္ယ။ ဝိလေပနံ အာရောပေယ္ယ။ပေ.။ စေတိယံ အဘိဒက္ခိဏံ 3 ကရေယ္ယာတိ? အာမန္တာ။ ဟဉ္စိ အရဟာ စေတိယံ အဘိဒက္ခိဏံ ကရေယ္ယ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော ပုညူပစယော’’တိ။

    Arahā cīvaraṃ dadeyya…pe… piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyya… khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 4 kareyyāti? Āmantā. Hañci arahā cetiyaṃ abhidakkhiṇaṃ kareyya, no ca vata re vattabbe – ‘‘natthi arahato puññūpacayo’’ti.

    အတ္ထိ အရဟတော ပုညူပစယောတိကထာ နိဋ္ဌိတာ။

    Atthi arahato puññūpacayotikathā niṭṭhitā.







    Footnotes:
    1. အာဓိပစ္စသံဝတ္တနိကံ (?)
    2. ādhipaccasaṃvattanikaṃ (?)
    3. ပဒက္ခိဏံ (?)
    4. padakkhiṇaṃ (?)



    Related texts:



    အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁. အတ္ထိ အရဟတော ပုညူပစယကထာဝဏ္ဏနာ • 1. Atthi arahato puññūpacayakathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. အတ္ထိအရဟတောပုညူပစယကထာဝဏ္ဏနာ • 1. Atthiarahatopuññūpacayakathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. အတ္ထိအရဟတောပုညူပစယကထာဝဏ္ဏနာ • 1. Atthiarahatopuññūpacayakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact