| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. အရဟတ္တပဉ္ဟာသုတ္တံ
2. Arahattapañhāsuttaṃ
၃၁၅. ‘‘‘အရဟတ္တံ, အရဟတ္တ’န္တိ, အာဝုသော သာရိပုတ္တ, ဝုစ္စတိ။ ကတမံ နု ခော, အာဝုသော , အရဟတ္တ’’န္တိ? ‘‘ယော ခော, အာဝုသော, ရာဂက္ခယော ဒောသက္ခယော မောဟက္ခယော – ဣဒံ ဝုစ္စတိ အရဟတ္တ’’န္တိ။ ‘‘အတ္ထိ ပနာဝုသော, မဂ္ဂော အတ္ထိ ပဋိပဒာ ဧတသ္သ အရဟတ္တသ္သ သစ္ဆိကိရိယာယာ’’တိ? ‘‘အတ္ထိ ခော, အာဝုသော, မဂ္ဂော အတ္ထိ ပဋိပဒာ ဧတသ္သ အရဟတ္တသ္သ သစ္ဆိကိရိယာယာ’’တိ။ ‘‘ကတမော ပနာဝုသော, မဂ္ဂော ကတမာ ပဋိပဒာ ဧတသ္သ အရဟတ္တသ္သ သစ္ဆိကိရိယာယာ’’တိ? ‘‘အယမေဝ ခော, အာဝုသော, အရိယော အဋ္ဌင္ဂိကော မဂ္ဂော ဧတသ္သ အရဟတ္တသ္သ သစ္ဆိကိရိယာယ, သေယ္ယထိဒံ – သမ္မာဒိဋ္ဌိ သမ္မာသင္ကပ္ပော သမ္မာဝာစာ သမ္မာကမ္မန္တော သမ္မာအာဇီဝော သမ္မာဝာယာမော သမ္မာသတိ သမ္မာသမာဓိ။ အယံ ခော အာဝုသော, မဂ္ဂော, အယံ ပဋိပဒာ ဧတသ္သ အရဟတ္တသ္သ သစ္ဆိကိရိယာယာ’’တိ။ ‘‘ဘဒ္ဒကော, အာဝုသော, မဂ္ဂော ဘဒ္ဒိကာ ပဋိပဒာ ဧတသ္သ အရဟတ္တသ္သ သစ္ဆိကိရိယာယ။ အလဉ္စ ပနာဝုသော သာရိပုတ္တ, အပ္ပမာဒာယာ’’တိ။ ဒုတိယံ။
315. ‘‘‘Arahattaṃ, arahatta’nti, āvuso sāriputta, vuccati. Katamaṃ nu kho, āvuso , arahatta’’nti? ‘‘Yo kho, āvuso, rāgakkhayo dosakkhayo mohakkhayo – idaṃ vuccati arahatta’’nti. ‘‘Atthi panāvuso, maggo atthi paṭipadā etassa arahattassa sacchikiriyāyā’’ti? ‘‘Atthi kho, āvuso, maggo atthi paṭipadā etassa arahattassa sacchikiriyāyā’’ti. ‘‘Katamo panāvuso, maggo katamā paṭipadā etassa arahattassa sacchikiriyāyā’’ti? ‘‘Ayameva kho, āvuso, ariyo aṭṭhaṅgiko maggo etassa arahattassa sacchikiriyāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho āvuso, maggo, ayaṃ paṭipadā etassa arahattassa sacchikiriyāyā’’ti. ‘‘Bhaddako, āvuso, maggo bhaddikā paṭipadā etassa arahattassa sacchikiriyāya. Alañca panāvuso sāriputta, appamādāyā’’ti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. အရဟတ္တပဉ္ဟာသုတ္တဝဏ္ဏနာ • 2. Arahattapañhāsuttavaṇṇanā
