| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
32. ஆரக்க²தா³யகவக்³கோ³
32. Ārakkhadāyakavaggo
1-10. ஆரக்க²தா³யகத்தே²ரஅபதா³னாதி³வண்ணனா
1-10. Ārakkhadāyakattheraapadānādivaṇṇanā
பா³த்திங்ஸதிமவக்³கே³ பட²மது³தியததியாபதா³னானி ஸுவிஞ்ஞெய்யானேவ.
Bāttiṃsatimavagge paṭhamadutiyatatiyāpadānāni suviññeyyāneva.
16. சதுத்தா²பதா³னே ஜலஜக்³கே³ஹி ஓகிரிந்தி ஜலஜேஹி உத்தமேஹி உப்பலபது³மாதீ³ஹி புப்பே²ஹி ஓகிரிங் பூஜேஸிந்தி அத்தோ².
16. Catutthāpadāne jalajaggehi okirinti jalajehi uttamehi uppalapadumādīhi pupphehi okiriṃ pūjesinti attho.
பஞ்சமாபதா³னங் உத்தானமேவ.
Pañcamāpadānaṃ uttānameva.
26-27. ச²ட்டா²பதா³னே சேதியங் உத்தமங் நாம, ஸிகி²னோ லோகப³ந்து⁴னோதி ஸகலலோகத்தயஸ்ஸ ப³ந்து⁴னோ ஞாதகஸ்ஸ ஸிகி²ஸ்ஸ ப⁴க³வதோ உத்தமங் சேதியங். இரீணே ஜனஸஞ்சரவிரஹிதே வனே மனுஸ்ஸானங் கோலாஹலவிரஹிதே மஹாஅரஞ்ஞே அஹோஸீதி ஸம்ப³ந்தோ⁴. அந்தா⁴ஹிண்டா³மஹங் ததா³தி தஸ்மிங் காலே வனே மக்³க³மூள்ஹபா⁴வேன அந்தோ⁴, ந சக்கு²னா அந்தோ⁴, அஹங் ஆஹிண்டா³மி மக்³க³ங் பரியேஸாமீதி அத்தோ². பவனா நிக்க²மந்தேனாதி மஹாவனதோ நிக்க²மந்தேன மயா ஸீஹாஸனங் உத்தமாஸனங், ஸீஹஸ்ஸ வா ப⁴க³வதோ ஆஸனங் தி³ட்ட²ந்தி அத்தோ². ஏகங்ஸங் அஞ்ஜலிங் கத்வாதி ஏகங்ஸங் உத்தராஸங்க³ங் கத்வா ஸிரஸி அஞ்ஜலிங் ட²பெத்வாதி அத்தோ². ஸந்த²விங் லோகனாயகந்தி ஸகலலோகத்தயனயங் தங் நிப்³பா³னங் பாபெந்தங் தோ²மிதங் து²திங் அகாஸிந்தி அத்தோ².
26-27. Chaṭṭhāpadāne cetiyaṃ uttamaṃ nāma, sikhino lokabandhunoti sakalalokattayassa bandhuno ñātakassa sikhissa bhagavato uttamaṃ cetiyaṃ. Irīṇe janasañcaravirahite vane manussānaṃ kolāhalavirahite mahāaraññe ahosīti sambandho. Andhāhiṇḍāmahaṃ tadāti tasmiṃ kāle vane maggamūḷhabhāvena andho, na cakkhunā andho, ahaṃ āhiṇḍāmi maggaṃ pariyesāmīti attho. Pavanā nikkhamantenāti mahāvanato nikkhamantena mayā sīhāsanaṃ uttamāsanaṃ, sīhassa vā bhagavato āsanaṃ diṭṭhanti attho. Ekaṃsaṃ añjaliṃ katvāti ekaṃsaṃ uttarāsaṅgaṃ katvā sirasi añjaliṃ ṭhapetvāti attho. Santhaviṃ lokanāyakanti sakalalokattayanayaṃ taṃ nibbānaṃ pāpentaṃ thomitaṃ thutiṃ akāsinti attho.
34. ஸத்தமாபதா³னே ஸுத³ஸ்ஸனோ மஹாவீரோதி ஸுந்த³ரத³ஸ்ஸனோ த்³வத்திங்ஸமஹாபுரிஸலக்க²ணஸம்பன்னஸரீரத்தா மனோஹரத³ஸ்ஸனோ மஹாவீரியோ ஸித்³த⁴த்தோ² ப⁴க³வாதி ஸம்ப³ந்தோ⁴. வஸதிக⁴ரமுத்தமேதி உத்தமே விஹாரே வஸதீதி அத்தோ².
34. Sattamāpadāne sudassano mahāvīroti sundaradassano dvattiṃsamahāpurisalakkhaṇasampannasarīrattā manoharadassano mahāvīriyo siddhattho bhagavāti sambandho. Vasatigharamuttameti uttame vihāre vasatīti attho.
அட்ட²மனவமத³ஸமாபதா³னானி உத்தானானேவாதி.
Aṭṭhamanavamadasamāpadānāni uttānānevāti.
பா³த்திங்ஸதிமவக்³க³வண்ணனா ஸமத்தா.
Bāttiṃsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
4. ஸத்தபது³மியத்தே²ரஅபதா³னங் • 4. Sattapadumiyattheraapadānaṃ
6. ஆஸனஸந்த²விகத்தே²ரஅபதா³னங் • 6. Āsanasanthavikattheraapadānaṃ
7. ஸத்³த³ஸஞ்ஞகத்தே²ரஅபதா³னங் • 7. Saddasaññakattheraapadānaṃ
