| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩২. আরক্খদাযকৰগ্গো
32. Ārakkhadāyakavaggo
১-১০. আরক্খদাযকত্থেরঅপদানাদিৰণ্ণনা
1-10. Ārakkhadāyakattheraapadānādivaṇṇanā
বাত্তিংসতিমৰগ্গে পঠমদুতিযততিযাপদানানি সুৰিঞ্ঞেয্যানেৰ।
Bāttiṃsatimavagge paṭhamadutiyatatiyāpadānāni suviññeyyāneva.
১৬. চতুত্থাপদানে জলজগ্গেহি ওকিরিন্তি জলজেহি উত্তমেহি উপ্পলপদুমাদীহি পুপ্ফেহি ওকিরিং পূজেসিন্তি অত্থো।
16. Catutthāpadāne jalajaggehi okirinti jalajehi uttamehi uppalapadumādīhi pupphehi okiriṃ pūjesinti attho.
পঞ্চমাপদানং উত্তানমেৰ।
Pañcamāpadānaṃ uttānameva.
২৬-২৭. ছট্ঠাপদানে চেতিযং উত্তমং নাম, সিখিনো লোকবন্ধুনোতি সকললোকত্তযস্স বন্ধুনো ঞাতকস্স সিখিস্স ভগৰতো উত্তমং চেতিযং। ইরীণে জনসঞ্চরৰিরহিতে ৰনে মনুস্সানং কোলাহলৰিরহিতে মহাঅরঞ্ঞে অহোসীতি সম্বন্ধো। অন্ধাহিণ্ডামহং তদাতি তস্মিং কালে ৰনে মগ্গমূল়্হভাৰেন অন্ধো, ন চক্খুনা অন্ধো, অহং আহিণ্ডামি মগ্গং পরিযেসামীতি অত্থো। পৰনা নিক্খমন্তেনাতি মহাৰনতো নিক্খমন্তেন মযা সীহাসনং উত্তমাসনং, সীহস্স ৰা ভগৰতো আসনং দিট্ঠন্তি অত্থো। একংসং অঞ্জলিং কত্ৰাতি একংসং উত্তরাসঙ্গং কত্ৰা সিরসি অঞ্জলিং ঠপেত্ৰাতি অত্থো। সন্থৰিং লোকনাযকন্তি সকললোকত্তযনযং তং নিব্বানং পাপেন্তং থোমিতং থুতিং অকাসিন্তি অত্থো।
26-27. Chaṭṭhāpadāne cetiyaṃ uttamaṃ nāma, sikhino lokabandhunoti sakalalokattayassa bandhuno ñātakassa sikhissa bhagavato uttamaṃ cetiyaṃ. Irīṇe janasañcaravirahite vane manussānaṃ kolāhalavirahite mahāaraññe ahosīti sambandho. Andhāhiṇḍāmahaṃ tadāti tasmiṃ kāle vane maggamūḷhabhāvena andho, na cakkhunā andho, ahaṃ āhiṇḍāmi maggaṃ pariyesāmīti attho. Pavanā nikkhamantenāti mahāvanato nikkhamantena mayā sīhāsanaṃ uttamāsanaṃ, sīhassa vā bhagavato āsanaṃ diṭṭhanti attho. Ekaṃsaṃ añjaliṃ katvāti ekaṃsaṃ uttarāsaṅgaṃ katvā sirasi añjaliṃ ṭhapetvāti attho. Santhaviṃ lokanāyakanti sakalalokattayanayaṃ taṃ nibbānaṃ pāpentaṃ thomitaṃ thutiṃ akāsinti attho.
৩৪. সত্তমাপদানে সুদস্সনো মহাৰীরোতি সুন্দরদস্সনো দ্ৰত্তিংসমহাপুরিসলক্খণসম্পন্নসরীরত্তা মনোহরদস্সনো মহাৰীরিযো সিদ্ধত্থো ভগৰাতি সম্বন্ধো। ৰসতিঘরমুত্তমেতি উত্তমে ৰিহারে ৰসতীতি অত্থো।
34. Sattamāpadāne sudassano mahāvīroti sundaradassano dvattiṃsamahāpurisalakkhaṇasampannasarīrattā manoharadassano mahāvīriyo siddhattho bhagavāti sambandho. Vasatigharamuttameti uttame vihāre vasatīti attho.
অট্ঠমনৰমদসমাপদানানি উত্তানানেৰাতি।
Aṭṭhamanavamadasamāpadānāni uttānānevāti.
বাত্তিংসতিমৰগ্গৰণ্ণনা সমত্তা।
Bāttiṃsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
৪. সত্তপদুমিযত্থেরঅপদানং • 4. Sattapadumiyattheraapadānaṃ
৬. আসনসন্থৰিকত্থেরঅপদানং • 6. Āsanasanthavikattheraapadānaṃ
৭. সদ্দসঞ্ঞকত্থেরঅপদানং • 7. Saddasaññakattheraapadānaṃ
