| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๓๒. อารกฺขทายกวโคฺค
32. Ārakkhadāyakavaggo
๑-๑๐. อารกฺขทายกเตฺถรอปทานาทิวณฺณนา
1-10. Ārakkhadāyakattheraapadānādivaṇṇanā
พาตฺติํสติมวเคฺค ปฐมทุติยตติยาปทานานิ สุวิเญฺญยฺยาเนวฯ
Bāttiṃsatimavagge paṭhamadutiyatatiyāpadānāni suviññeyyāneva.
๑๖. จตุตฺถาปทาเน ชลชเคฺคหิ โอกิรินฺติ ชลเชหิ อุตฺตเมหิ อุปฺปลปทุมาทีหิ ปุเปฺผหิ โอกิริํ ปูเชสินฺติ อโตฺถฯ
16. Catutthāpadāne jalajaggehi okirinti jalajehi uttamehi uppalapadumādīhi pupphehi okiriṃ pūjesinti attho.
ปญฺจมาปทานํ อุตฺตานเมวฯ
Pañcamāpadānaṃ uttānameva.
๒๖-๒๗. ฉฎฺฐาปทาเน เจติยํ อุตฺตมํ นาม, สิขิโน โลกพนฺธุโนติ สกลโลกตฺตยสฺส พนฺธุโน ญาตกสฺส สิขิสฺส ภควโต อุตฺตมํ เจติยํฯ อิรีเณ ชนสญฺจรวิรหิเต วเน มนุสฺสานํ โกลาหลวิรหิเต มหาอรเญฺญ อโหสีติ สมฺพโนฺธฯ อนฺธาหิณฺฑามหํ ตทาติ ตสฺมิํ กาเล วเน มคฺคมูฬฺหภาเวน อโนฺธ, น จกฺขุนา อโนฺธ, อหํ อาหิณฺฑามิ มคฺคํ ปริเยสามีติ อโตฺถฯ ปวนา นิกฺขมเนฺตนาติ มหาวนโต นิกฺขมเนฺตน มยา สีหาสนํ อุตฺตมาสนํ, สีหสฺส วา ภควโต อาสนํ ทิฎฺฐนฺติ อโตฺถฯ เอกํสํ อญฺชลิํ กตฺวาติ เอกํสํ อุตฺตราสงฺคํ กตฺวา สิรสิ อญฺชลิํ ฐเปตฺวาติ อโตฺถฯ สนฺถวิํ โลกนายกนฺติ สกลโลกตฺตยนยํ ตํ นิพฺพานํ ปาเปนฺตํ โถมิตํ ถุติํ อกาสินฺติ อโตฺถฯ
26-27. Chaṭṭhāpadāne cetiyaṃ uttamaṃ nāma, sikhino lokabandhunoti sakalalokattayassa bandhuno ñātakassa sikhissa bhagavato uttamaṃ cetiyaṃ. Irīṇe janasañcaravirahite vane manussānaṃ kolāhalavirahite mahāaraññe ahosīti sambandho. Andhāhiṇḍāmahaṃ tadāti tasmiṃ kāle vane maggamūḷhabhāvena andho, na cakkhunā andho, ahaṃ āhiṇḍāmi maggaṃ pariyesāmīti attho. Pavanā nikkhamantenāti mahāvanato nikkhamantena mayā sīhāsanaṃ uttamāsanaṃ, sīhassa vā bhagavato āsanaṃ diṭṭhanti attho. Ekaṃsaṃ añjaliṃ katvāti ekaṃsaṃ uttarāsaṅgaṃ katvā sirasi añjaliṃ ṭhapetvāti attho. Santhaviṃ lokanāyakanti sakalalokattayanayaṃ taṃ nibbānaṃ pāpentaṃ thomitaṃ thutiṃ akāsinti attho.
๓๔. สตฺตมาปทาเน สุทสฺสโน มหาวีโรติ สุนฺทรทสฺสโน ทฺวตฺติํสมหาปุริสลกฺขณสมฺปนฺนสรีรตฺตา มโนหรทสฺสโน มหาวีริโย สิทฺธโตฺถ ภควาติ สมฺพโนฺธฯ วสติฆรมุตฺตเมติ อุตฺตเม วิหาเร วสตีติ อโตฺถฯ
34. Sattamāpadāne sudassano mahāvīroti sundaradassano dvattiṃsamahāpurisalakkhaṇasampannasarīrattā manoharadassano mahāvīriyo siddhattho bhagavāti sambandho. Vasatigharamuttameti uttame vihāre vasatīti attho.
อฎฺฐมนวมทสมาปทานานิ อุตฺตานาเนวาติฯ
Aṭṭhamanavamadasamāpadānāni uttānānevāti.
พาตฺติํสติมวคฺควณฺณนา สมตฺตาฯ
Bāttiṃsatimavaggavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi
๔. สตฺตปทุมิยเตฺถรอปทานํ • 4. Sattapadumiyattheraapadānaṃ
๖. อาสนสนฺถวิกเตฺถรอปทานํ • 6. Āsanasanthavikattheraapadānaṃ
๗. สทฺทสญฺญกเตฺถรอปทานํ • 7. Saddasaññakattheraapadānaṃ
