| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
32. ආරක්‌ඛදායකවග්‌ගො
32. Ārakkhadāyakavaggo
1-10. ආරක්‌ඛදායකත්‌ථෙරඅපදානාදිවණ්‌ණනා
1-10. Ārakkhadāyakattheraapadānādivaṇṇanā
බාත්‌තිංසතිමවග්‌ගෙ පඨමදුතියතතියාපදානානි සුවිඤ්‌ඤෙය්‍යානෙව.
Bāttiṃsatimavagge paṭhamadutiyatatiyāpadānāni suviññeyyāneva.
16. චතුත්‌ථාපදානෙ ජලජග්‌ගෙහි ඔකිරින්‌ති ජලජෙහි උත්‌තමෙහි උප්‌පලපදුමාදීහි පුප්‌ඵෙහි ඔකිරිං පූජෙසින්‌ති අත්‌ථො.
16. Catutthāpadāne jalajaggehi okirinti jalajehi uttamehi uppalapadumādīhi pupphehi okiriṃ pūjesinti attho.
පඤ්‌චමාපදානං උත්‌තානමෙව.
Pañcamāpadānaṃ uttānameva.
26-27. ඡට්‌ඨාපදානෙ චෙතියං උත්‌තමං නාම, සිඛිනො ලොකබන්‌ධුනොති සකලලොකත්‌තයස්‌ස බන්‌ධුනො ඤාතකස්‌ස සිඛිස්‌ස භගවතො උත්‌තමං චෙතියං. ඉරීණෙ ජනසඤ්‌චරවිරහිතෙ වනෙ මනුස්‌සානං කොලාහලවිරහිතෙ මහාඅරඤ්‌ඤෙ අහොසීති සම්‌බන්‌ධො. අන්‌ධාහිණ්‌ඩාමහං තදාති තස්‌මිං කාලෙ වනෙ මග්‌ගමූළ්‌හභාවෙන අන්‌ධො, න චක්‌ඛුනා අන්‌ධො, අහං ආහිණ්‌ඩාමි මග්‌ගං පරියෙසාමීති අත්‌ථො. පවනා නික්‌ඛමන්‌තෙනාති මහාවනතො නික්‌ඛමන්‌තෙන මයා සීහාසනං උත්‌තමාසනං, සීහස්‌ස වා භගවතො ආසනං දිට්‌ඨන්‌ති අත්‌ථො. එකංසං අඤ්‌ජලිං කත්‌වාති එකංසං උත්‌තරාසඞ්‌ගං කත්‌වා සිරසි අඤ්‌ජලිං ඨපෙත්‌වාති අත්‌ථො. සන්‌ථවිං ලොකනායකන්‌ති සකලලොකත්‌තයනයං තං නිබ්‌බානං පාපෙන්‌තං ථොමිතං ථුතිං අකාසින්‌ති අත්‌ථො.
26-27. Chaṭṭhāpadāne cetiyaṃ uttamaṃ nāma, sikhino lokabandhunoti sakalalokattayassa bandhuno ñātakassa sikhissa bhagavato uttamaṃ cetiyaṃ. Irīṇe janasañcaravirahite vane manussānaṃ kolāhalavirahite mahāaraññe ahosīti sambandho. Andhāhiṇḍāmahaṃ tadāti tasmiṃ kāle vane maggamūḷhabhāvena andho, na cakkhunā andho, ahaṃ āhiṇḍāmi maggaṃ pariyesāmīti attho. Pavanā nikkhamantenāti mahāvanato nikkhamantena mayā sīhāsanaṃ uttamāsanaṃ, sīhassa vā bhagavato āsanaṃ diṭṭhanti attho. Ekaṃsaṃ añjaliṃ katvāti ekaṃsaṃ uttarāsaṅgaṃ katvā sirasi añjaliṃ ṭhapetvāti attho. Santhaviṃ lokanāyakanti sakalalokattayanayaṃ taṃ nibbānaṃ pāpentaṃ thomitaṃ thutiṃ akāsinti attho.
34. සත්‌තමාපදානෙ සුදස්‌සනො මහාවීරොති සුන්‌දරදස්‌සනො ද්‌වත්‌තිංසමහාපුරිසලක්‌ඛණසම්‌පන්‌නසරීරත්‌තා මනොහරදස්‌සනො මහාවීරියො සිද්‌ධත්‌ථො භගවාති සම්‌බන්‌ධො. වසතිඝරමුත්‌තමෙති උත්‌තමෙ විහාරෙ වසතීති අත්‌ථො.
34. Sattamāpadāne sudassano mahāvīroti sundaradassano dvattiṃsamahāpurisalakkhaṇasampannasarīrattā manoharadassano mahāvīriyo siddhattho bhagavāti sambandho. Vasatigharamuttameti uttame vihāre vasatīti attho.
අට්‌ඨමනවමදසමාපදානානි උත්‌තානානෙවාති.
Aṭṭhamanavamadasamāpadānāni uttānānevāti.
බාත්‌තිංසතිමවග්‌ගවණ්‌ණනා සමත්‌තා.
Bāttiṃsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
4. සත්‌තපදුමියත්‌ථෙරඅපදානං • 4. Sattapadumiyattheraapadānaṃ
6. ආසනසන්‌ථවිකත්‌ථෙරඅපදානං • 6. Āsanasanthavikattheraapadānaṃ
7. සද්‌දසඤ්‌ඤකත්‌ථෙරඅපදානං • 7. Saddasaññakattheraapadānaṃ
