| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. ආරක්‌ඛසුත්‌තං
7. Ārakkhasuttaṃ
117. ‘‘චතූසු, භික්‌ඛවෙ, ඨානෙසු අත්‌තරූපෙන අප්‌පමාදො සති චෙතසො ආරක්‌ඛො කරණීයො. කතමෙසු චතූසු? ‘මා මෙ රජනීයෙසු ධම්‌මෙසු චිත්‌තං රජ්‌ජී’ති අත්‌තරූපෙන අප්‌පමාදො සති චෙතසො ආරක්‌ඛො කරණීයො; ‘මා මෙ දොසනීයෙසු ධම්‌මෙසු චිත්‌තං දුස්‌සී’ති අත්‌තරූපෙන අප්‌පමාදො සති චෙතසො ආරක්‌ඛො කරණීයො; ‘මා මෙ මොහනීයෙසු ධම්‌මෙසු චිත්‌තං මුය්‌හී’ති අත්‌තරූපෙන අප්‌පමාදො සති චෙතසො ආරක්‌ඛො කරණීයො; ‘මා මෙ මදනීයෙසු ධම්‌මෙසු චිත්‌තං මජ්‌ජී’ති අත්‌තරූපෙන අප්‌පමාදො සති චෙතසො ආරක්‌ඛො කරණීයො.
117. ‘‘Catūsu, bhikkhave, ṭhānesu attarūpena appamādo sati cetaso ārakkho karaṇīyo. Katamesu catūsu? ‘Mā me rajanīyesu dhammesu cittaṃ rajjī’ti attarūpena appamādo sati cetaso ārakkho karaṇīyo; ‘mā me dosanīyesu dhammesu cittaṃ dussī’ti attarūpena appamādo sati cetaso ārakkho karaṇīyo; ‘mā me mohanīyesu dhammesu cittaṃ muyhī’ti attarūpena appamādo sati cetaso ārakkho karaṇīyo; ‘mā me madanīyesu dhammesu cittaṃ majjī’ti attarūpena appamādo sati cetaso ārakkho karaṇīyo.
‘‘යතො ඛො, භික්‌ඛවෙ, භික්‌ඛුනො රජනීයෙසු ධම්‌මෙසු චිත්‌තං න රජ්‌ජති වීතරාගත්‌තා, දොසනීයෙසු ධම්‌මෙසු චිත්‌තං න දුස්‌සති වීතදොසත්‌තා, මොහනීයෙසු ධම්‌මෙසු චිත්‌තං න මුය්‌හති වීතමොහත්‌තා, මදනීයෙසු ධම්‌මෙසු චිත්‌තං න මජ්‌ජති වීතමදත්‌තා, සො න ඡම්‌භති න කම්‌පති න වෙධති න සන්‌තාසං ආපජ්‌ජති, න ච පන සමණවචනහෙතුපි ගච්‌ඡතී’’ති. සත්‌තමං.
‘‘Yato kho, bhikkhave, bhikkhuno rajanīyesu dhammesu cittaṃ na rajjati vītarāgattā, dosanīyesu dhammesu cittaṃ na dussati vītadosattā, mohanīyesu dhammesu cittaṃ na muyhati vītamohattā, madanīyesu dhammesu cittaṃ na majjati vītamadattā, so na chambhati na kampati na vedhati na santāsaṃ āpajjati, na ca pana samaṇavacanahetupi gacchatī’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. ආරක්‌ඛසුත්‌තවණ්‌ණනා • 7. Ārakkhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. කෙසිසුත්‌තාදිවණ්‌ණනා • 1-7. Kesisuttādivaṇṇanā
