| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༧. ཨཱརཀྑསུཏྟཾ
7. Ārakkhasuttaṃ
༡༡༧. ‘‘ཙཏཱུསུ, བྷིཀྑཝེ, ཋཱནེསུ ཨཏྟརཱུཔེན ཨཔྤམཱདོ སཏི ཙེཏསོ ཨཱརཀྑོ ཀརཎཱིཡོ། ཀཏམེསུ ཙཏཱུསུ? ‘མཱ མེ རཛནཱིཡེསུ དྷམྨེསུ ཙིཏྟཾ རཛྫཱི’ཏི ཨཏྟརཱུཔེན ཨཔྤམཱདོ སཏི ཙེཏསོ ཨཱརཀྑོ ཀརཎཱིཡོ; ‘མཱ མེ དོསནཱིཡེསུ དྷམྨེསུ ཙིཏྟཾ དུསྶཱི’ཏི ཨཏྟརཱུཔེན ཨཔྤམཱདོ སཏི ཙེཏསོ ཨཱརཀྑོ ཀརཎཱིཡོ; ‘མཱ མེ མོཧནཱིཡེསུ དྷམྨེསུ ཙིཏྟཾ མུཡ྄ཧཱི’ཏི ཨཏྟརཱུཔེན ཨཔྤམཱདོ སཏི ཙེཏསོ ཨཱརཀྑོ ཀརཎཱིཡོ; ‘མཱ མེ མདནཱིཡེསུ དྷམྨེསུ ཙིཏྟཾ མཛྫཱི’ཏི ཨཏྟརཱུཔེན ཨཔྤམཱདོ སཏི ཙེཏསོ ཨཱརཀྑོ ཀརཎཱིཡོ།
117. ‘‘Catūsu, bhikkhave, ṭhānesu attarūpena appamādo sati cetaso ārakkho karaṇīyo. Katamesu catūsu? ‘Mā me rajanīyesu dhammesu cittaṃ rajjī’ti attarūpena appamādo sati cetaso ārakkho karaṇīyo; ‘mā me dosanīyesu dhammesu cittaṃ dussī’ti attarūpena appamādo sati cetaso ārakkho karaṇīyo; ‘mā me mohanīyesu dhammesu cittaṃ muyhī’ti attarūpena appamādo sati cetaso ārakkho karaṇīyo; ‘mā me madanīyesu dhammesu cittaṃ majjī’ti attarūpena appamādo sati cetaso ārakkho karaṇīyo.
‘‘ཡཏོ ཁོ, བྷིཀྑཝེ, བྷིཀྑུནོ རཛནཱིཡེསུ དྷམྨེསུ ཙིཏྟཾ ན རཛྫཏི ཝཱིཏརཱགཏྟཱ, དོསནཱིཡེསུ དྷམྨེསུ ཙིཏྟཾ ན དུསྶཏི ཝཱིཏདོསཏྟཱ, མོཧནཱིཡེསུ དྷམྨེསུ ཙིཏྟཾ ན མུཡ྄ཧཏི ཝཱིཏམོཧཏྟཱ, མདནཱིཡེསུ དྷམྨེསུ ཙིཏྟཾ ན མཛྫཏི ཝཱིཏམདཏྟཱ, སོ ན ཚམྦྷཏི ན ཀམྤཏི ན ཝེདྷཏི ན སནྟཱསཾ ཨཱཔཛྫཏི, ན ཙ པན སམཎཝཙནཧེཏུཔི གཙྪཏཱི’’ཏི། སཏྟམཾ།
‘‘Yato kho, bhikkhave, bhikkhuno rajanīyesu dhammesu cittaṃ na rajjati vītarāgattā, dosanīyesu dhammesu cittaṃ na dussati vītadosattā, mohanīyesu dhammesu cittaṃ na muyhati vītamohattā, madanīyesu dhammesu cittaṃ na majjati vītamadattā, so na chambhati na kampati na vedhati na santāsaṃ āpajjati, na ca pana samaṇavacanahetupi gacchatī’’ti. Sattamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༧. ཨཱརཀྑསུཏྟཝཎྞནཱ • 7. Ārakkhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༧. ཀེསིསུཏྟཱདིཝཎྞནཱ • 1-7. Kesisuttādivaṇṇanā
