| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. අරක්‌ඛෙය්‍යසුත්‌තං
5. Arakkheyyasuttaṃ
58. ‘‘චත්‌තාරිමානි, භික්‌ඛවෙ, තථාගතස්‌ස අරක්‌ඛෙය්‍යානි, තීහි ච අනුපවජ්‌ජො. කතමානි චත්‌තාරි තථාගතස්‌ස අරක්‌ඛෙය්‍යානි? පරිසුද්‌ධකායසමාචාරො, භික්‌ඛවෙ, තථාගතො; නත්‌ථි තථාගතස්‌ස කායදුච්‌චරිතං යං තථාගතො රක්‌ඛෙය්‍ය – ‘මා මෙ ඉදං පරො අඤ්‌ඤාසී’ති. පරිසුද්‌ධවචීසමාචාරො, භික්‌ඛවෙ, තථාගතො; නත්‌ථි තථාගතස්‌ස වචීදුච්‌චරිතං යං තථාගතො රක්‌ඛෙය්‍ය – ‘මා මෙ ඉදං පරො අඤ්‌ඤාසී’ති. පරිසුද්‌ධමනොසමාචාරො, භික්‌ඛවෙ, තථාගතො; නත්‌ථි තථාගතස්‌ස මනොදුච්‌චරිතං යං තථාගතො රක්‌ඛෙය්‍ය – ‘මා මෙ ඉදං පරො අඤ්‌ඤාසී’ති. පරිසුද්‌ධාජීවො, භික්‌ඛවෙ, තථාගතො; නත්‌ථි තථාගතස්‌ස මිච්‌ඡාආජීවො යං තථාගතො රක්‌ඛෙය්‍ය – ‘මා මෙ ඉදං පරො අඤ්‌ඤාසී’ති. ඉමානි චත්‌තාරි තථාගතස්‌ස අරක්‌ඛෙය්‍යානි.
58. ‘‘Cattārimāni, bhikkhave, tathāgatassa arakkheyyāni, tīhi ca anupavajjo. Katamāni cattāri tathāgatassa arakkheyyāni? Parisuddhakāyasamācāro, bhikkhave, tathāgato; natthi tathāgatassa kāyaduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhavacīsamācāro, bhikkhave, tathāgato; natthi tathāgatassa vacīduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhamanosamācāro, bhikkhave, tathāgato; natthi tathāgatassa manoduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhājīvo, bhikkhave, tathāgato; natthi tathāgatassa micchāājīvo yaṃ tathāgato rakkheyya – ‘mā me idaṃ paro aññāsī’ti. Imāni cattāri tathāgatassa arakkheyyāni.
‘‘කතමෙහි තීහි අනුපවජ්‌ජො? ස්‌වාක්‌ඛාතධම්‌මො , භික්‌ඛවෙ, තථාගතො. තත්‍ර වත මං සමණො වා බ්‍රාහ්‌මණො වා දෙවො වා මාරො වා බ්‍රහ්‌මා වා කොචි වා ලොකස්‌මිං සහධම්‌මෙන පටිචොදෙස්‌සති – ‘ඉතිපි ත්‌වං න ස්‌වාක්‌ඛාතධම්‌මො’ති. නිමිත්‌තමෙතං, භික්‌ඛවෙ, න සමනුපස්‌සාමි. එතමහං 1, භික්‌ඛවෙ , නිමිත්‌තං අසමනුපස්‌සන්‌තො ඛෙමප්‌පත්‌තො අභයප්‌පත්‌තො වෙසාරජ්‌ජප්‌පත්‌තො විහරාමි.
‘‘Katamehi tīhi anupavajjo? Svākkhātadhammo , bhikkhave, tathāgato. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi tvaṃ na svākkhātadhammo’ti. Nimittametaṃ, bhikkhave, na samanupassāmi. Etamahaṃ 2, bhikkhave , nimittaṃ asamanupassanto khemappatto abhayappatto vesārajjappatto viharāmi.
‘‘සුපඤ්‌ඤත්‌තා ඛො පන මෙ, භික්‌ඛවෙ, සාවකානං නිබ්‌බානගාමිනී පටිපදා. යථාපටිපන්‌නා මම සාවකා ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌ති. තත්‍ර වත මං සමණො වා බ්‍රාහ්‌මණො වා දෙවො වා මාරො වා බ්‍රහ්‌මා වා කොචි වා ලොකස්‌මිං සහධම්‌මෙන පටිචොදෙස්‌සති – ‘ඉතිපි තෙ න සුපඤ්‌ඤත්‌තා සාවකානං නිබ්‌බානගාමිනී පටිපදා. යථාපටිපන්‌නා තව සාවකා ආසවානං ඛයා…පෙ.… සච්‌ඡිකත්‌වා උපසම්‌පජ්‌ජ විහරන්‌තී’ති. නිමිත්‌තමෙතං, භික්‌ඛවෙ, න සමනුපස්‌සාමි . එතමහං, භික්‌ඛවෙ, නිමිත්‌තං අසමනුපස්‌සන්‌තො ඛෙමප්‌පත්‌තො අභයප්‌පත්‌තො වෙසාරජ්‌ජප්‌පත්‌තො විහරාමි.
‘‘Supaññattā kho pana me, bhikkhave, sāvakānaṃ nibbānagāminī paṭipadā. Yathāpaṭipannā mama sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na supaññattā sāvakānaṃ nibbānagāminī paṭipadā. Yathāpaṭipannā tava sāvakā āsavānaṃ khayā…pe… sacchikatvā upasampajja viharantī’ti. Nimittametaṃ, bhikkhave, na samanupassāmi . Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi.
‘‘අනෙකසතා ඛො පන මෙ, භික්‌ඛවෙ, සාවකපරිසා ආසවානං ඛයා…පෙ.… සච්‌ඡිකත්‌වා උපසම්‌පජ්‌ජ විහරන්‌ති. තත්‍ර වත මං සමණො වා බ්‍රාහ්‌මණො වා දෙවො වා මාරො වා බ්‍රහ්‌මා වා කොචි වා ලොකස්‌මිං සහධම්‌මෙන පටිචොදෙස්‌සති – ‘ඉතිපි තෙ න අනෙකසතා සාවකපරිසා ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌තී’ති. නිමිත්‌තමෙතං, භික්‌ඛවෙ, න සමනුපස්‌සාමි. එතමහං, භික්‌ඛවෙ, නිමිත්‌තං අසමනුපස්‌සන්‌තො ඛෙමප්‌පත්‌තො අභයප්‌පත්‌තො වෙසාරජ්‌ජප්‌පත්‌තො විහරාමි. ඉමෙහි තීහි අනුපවජ්‌ජො.
‘‘Anekasatā kho pana me, bhikkhave, sāvakaparisā āsavānaṃ khayā…pe… sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na anekasatā sāvakaparisā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharantī’ti. Nimittametaṃ, bhikkhave, na samanupassāmi. Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi. Imehi tīhi anupavajjo.
‘‘ඉමානි ඛො, භික්‌ඛවෙ, චත්‌තාරි තථාගතස්‌ස අරක්‌ඛෙය්‍යානි, ඉමෙහි ච තීහි අනුපවජ්‌ජො’’ති. පඤ්‌චමං.
‘‘Imāni kho, bhikkhave, cattāri tathāgatassa arakkheyyāni, imehi ca tīhi anupavajjo’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. අරක්‌ඛෙය්‍යසුත්‌තවණ්‌ණනා • 5. Arakkheyyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-7. සීහසෙනාපතිසුත්‌තාදිවණ්‌ණනා • 4-7. Sīhasenāpatisuttādivaṇṇanā
