| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. ཨརཀྑེཡྻསུཏྟཾ
5. Arakkheyyasuttaṃ
༥༨. ‘‘ཙཏྟཱརིམཱནི, བྷིཀྑཝེ, ཏཐཱགཏསྶ ཨརཀྑེཡྻཱནི, ཏཱིཧི ཙ ཨནུཔཝཛྫོ། ཀཏམཱནི ཙཏྟཱརི ཏཐཱགཏསྶ ཨརཀྑེཡྻཱནི? པརིསུདྡྷཀཱཡསམཱཙཱརོ, བྷིཀྑཝེ, ཏཐཱགཏོ; ནཏྠི ཏཐཱགཏསྶ ཀཱཡདུཙྩརིཏཾ ཡཾ ཏཐཱགཏོ རཀྑེཡྻ – ‘མཱ མེ ཨིདཾ པརོ ཨཉྙཱསཱི’ཏི། པརིསུདྡྷཝཙཱིསམཱཙཱརོ, བྷིཀྑཝེ, ཏཐཱགཏོ; ནཏྠི ཏཐཱགཏསྶ ཝཙཱིདུཙྩརིཏཾ ཡཾ ཏཐཱགཏོ རཀྑེཡྻ – ‘མཱ མེ ཨིདཾ པརོ ཨཉྙཱསཱི’ཏི། པརིསུདྡྷམནོསམཱཙཱརོ, བྷིཀྑཝེ, ཏཐཱགཏོ; ནཏྠི ཏཐཱགཏསྶ མནོདུཙྩརིཏཾ ཡཾ ཏཐཱགཏོ རཀྑེཡྻ – ‘མཱ མེ ཨིདཾ པརོ ཨཉྙཱསཱི’ཏི། པརིསུདྡྷཱཛཱིཝོ, བྷིཀྑཝེ, ཏཐཱགཏོ; ནཏྠི ཏཐཱགཏསྶ མིཙྪཱཨཱཛཱིཝོ ཡཾ ཏཐཱགཏོ རཀྑེཡྻ – ‘མཱ མེ ཨིདཾ པརོ ཨཉྙཱསཱི’ཏི། ཨིམཱནི ཙཏྟཱརི ཏཐཱགཏསྶ ཨརཀྑེཡྻཱནི།
58. ‘‘Cattārimāni, bhikkhave, tathāgatassa arakkheyyāni, tīhi ca anupavajjo. Katamāni cattāri tathāgatassa arakkheyyāni? Parisuddhakāyasamācāro, bhikkhave, tathāgato; natthi tathāgatassa kāyaduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhavacīsamācāro, bhikkhave, tathāgato; natthi tathāgatassa vacīduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhamanosamācāro, bhikkhave, tathāgato; natthi tathāgatassa manoduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhājīvo, bhikkhave, tathāgato; natthi tathāgatassa micchāājīvo yaṃ tathāgato rakkheyya – ‘mā me idaṃ paro aññāsī’ti. Imāni cattāri tathāgatassa arakkheyyāni.
‘‘ཀཏམེཧི ཏཱིཧི ཨནུཔཝཛྫོ? སྭཱཀྑཱཏདྷམྨོ , བྷིཀྑཝེ, ཏཐཱགཏོ། ཏཏྲ ཝཏ མཾ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ སཧདྷམྨེན པཊིཙོདེསྶཏི – ‘ཨིཏིཔི ཏྭཾ ན སྭཱཀྑཱཏདྷམྨོ’ཏི། ནིམིཏྟམེཏཾ, བྷིཀྑཝེ, ན སམནུཔསྶཱམི། ཨེཏམཧཾ 1, བྷིཀྑཝེ , ནིམིཏྟཾ ཨསམནུཔསྶནྟོ ཁེམཔྤཏྟོ ཨབྷཡཔྤཏྟོ ཝེསཱརཛྫཔྤཏྟོ ཝིཧརཱམི།
‘‘Katamehi tīhi anupavajjo? Svākkhātadhammo , bhikkhave, tathāgato. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi tvaṃ na svākkhātadhammo’ti. Nimittametaṃ, bhikkhave, na samanupassāmi. Etamahaṃ 2, bhikkhave , nimittaṃ asamanupassanto khemappatto abhayappatto vesārajjappatto viharāmi.
‘‘སུཔཉྙཏྟཱ ཁོ པན མེ, བྷིཀྑཝེ, སཱཝཀཱནཾ ནིབྦཱནགཱམིནཱི པཊིཔདཱ། ཡཐཱཔཊིཔནྣཱ མམ སཱཝཀཱ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརནྟི། ཏཏྲ ཝཏ མཾ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ སཧདྷམྨེན པཊིཙོདེསྶཏི – ‘ཨིཏིཔི ཏེ ན སུཔཉྙཏྟཱ སཱཝཀཱནཾ ནིབྦཱནགཱམིནཱི པཊིཔདཱ། ཡཐཱཔཊིཔནྣཱ ཏཝ སཱཝཀཱ ཨཱསཝཱནཾ ཁཡཱ…པེ॰… སཙྪིཀཏྭཱ ཨུཔསམྤཛྫ ཝིཧརནྟཱི’ཏི། ནིམིཏྟམེཏཾ, བྷིཀྑཝེ, ན སམནུཔསྶཱམི ། ཨེཏམཧཾ, བྷིཀྑཝེ, ནིམིཏྟཾ ཨསམནུཔསྶནྟོ ཁེམཔྤཏྟོ ཨབྷཡཔྤཏྟོ ཝེསཱརཛྫཔྤཏྟོ ཝིཧརཱམི།
‘‘Supaññattā kho pana me, bhikkhave, sāvakānaṃ nibbānagāminī paṭipadā. Yathāpaṭipannā mama sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na supaññattā sāvakānaṃ nibbānagāminī paṭipadā. Yathāpaṭipannā tava sāvakā āsavānaṃ khayā…pe… sacchikatvā upasampajja viharantī’ti. Nimittametaṃ, bhikkhave, na samanupassāmi . Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi.
‘‘ཨནེཀསཏཱ ཁོ པན མེ, བྷིཀྑཝེ, སཱཝཀཔརིསཱ ཨཱསཝཱནཾ ཁཡཱ…པེ॰… སཙྪིཀཏྭཱ ཨུཔསམྤཛྫ ཝིཧརནྟི། ཏཏྲ ཝཏ མཾ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ སཧདྷམྨེན པཊིཙོདེསྶཏི – ‘ཨིཏིཔི ཏེ ན ཨནེཀསཏཱ སཱཝཀཔརིསཱ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརནྟཱི’ཏི། ནིམིཏྟམེཏཾ, བྷིཀྑཝེ, ན སམནུཔསྶཱམི། ཨེཏམཧཾ, བྷིཀྑཝེ, ནིམིཏྟཾ ཨསམནུཔསྶནྟོ ཁེམཔྤཏྟོ ཨབྷཡཔྤཏྟོ ཝེསཱརཛྫཔྤཏྟོ ཝིཧརཱམི། ཨིམེཧི ཏཱིཧི ཨནུཔཝཛྫོ།
‘‘Anekasatā kho pana me, bhikkhave, sāvakaparisā āsavānaṃ khayā…pe… sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na anekasatā sāvakaparisā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharantī’ti. Nimittametaṃ, bhikkhave, na samanupassāmi. Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi. Imehi tīhi anupavajjo.
‘‘ཨིམཱནི ཁོ, བྷིཀྑཝེ, ཙཏྟཱརི ཏཐཱགཏསྶ ཨརཀྑེཡྻཱནི, ཨིམེཧི ཙ ཏཱིཧི ཨནུཔཝཛྫོ’’ཏི། པཉྩམཾ།
‘‘Imāni kho, bhikkhave, cattāri tathāgatassa arakkheyyāni, imehi ca tīhi anupavajjo’’ti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. ཨརཀྑེཡྻསུཏྟཝཎྞནཱ • 5. Arakkheyyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༧. སཱིཧསེནཱཔཏིསུཏྟཱདིཝཎྞནཱ • 4-7. Sīhasenāpatisuttādivaṇṇanā
