| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஆராமட்ட²கதா²வண்ணனா
Ārāmaṭṭhakathāvaṇṇanā
102. ஆராமட்ட²கதா²யங் ப³ந்த⁴னந்தி புப்பா²னங் வண்டே பதிட்டி²தட்டா²னங். அபி⁴யுஞ்ஜதீதி சோதே³தி அட்³ட³ங் கரோதி. அதி³ன்னாதா³னஸ்ஸ பயோக³த்தாதி ஸஹபயோக³மாஹ வத்து²ம்ஹியேவ கதபயோக³த்தா. ஸஹபயோக³வஸேன ஹேதங் து³க்கடங். வினிச்ச²யப்பஸுதந்தி வினிச்ச²யே நியுத்தங். கக்க²ளோதி தா³ருணோ. து⁴ரங் நிக்கி²பதீதி உஸ்ஸாஹங் ட²பேதி, அத்தனோ ஸந்தககரணே நிருஸ்ஸாஹோ ஹோதீதி அத்தோ². கூடட்³ட³காரகோபி ஸசே து⁴ரங் ந நிக்கி²பதி, நத்தி² அவஹாரோதி ஆஹ ‘‘ஸசே ஸயம்பி கதது⁴ரனிக்கே²போ ஹோதீ’’தி. ஸயம்பீதி அபி⁴யுஞ்ஜகோபி. கதது⁴ரனிக்கே²போதி ‘‘ந தா³னி நங் இமஸ்ஸ த³ஸ்ஸாமீ’’தி ஏவங் தஸ்ஸ தா³னே கதது⁴ரனிக்கே²போ. கிங்காரப்படிஸ்ஸாவிபா⁴வேதி ‘‘கிங் கரோமி கிங் கரோமீ’’தி ஏவங் கிங்காரமேவ படிஸ்ஸுணந்தோ விசரதீதி கிங்காரபடிஸ்ஸாவீ, தஸ்ஸ பா⁴வோ கிங்காரபடிஸ்ஸாவிபா⁴வோ, தஸ்மிங், அத்தனோ வஸவத்திபா⁴வேதி வுத்தங் ஹோதி.
102. Ārāmaṭṭhakathāyaṃ bandhananti pupphānaṃ vaṇṭe patiṭṭhitaṭṭhānaṃ. Abhiyuñjatīti codeti aḍḍaṃ karoti. Adinnādānassa payogattāti sahapayogamāha vatthumhiyeva katapayogattā. Sahapayogavasena hetaṃ dukkaṭaṃ. Vinicchayappasutanti vinicchaye niyuttaṃ. Kakkhaḷoti dāruṇo. Dhuraṃ nikkhipatīti ussāhaṃ ṭhapeti, attano santakakaraṇe nirussāho hotīti attho. Kūṭaḍḍakārakopi sace dhuraṃ na nikkhipati, natthi avahāroti āha ‘‘sace sayampi katadhuranikkhepo hotī’’ti. Sayampīti abhiyuñjakopi. Katadhuranikkhepoti ‘‘na dāni naṃ imassa dassāmī’’ti evaṃ tassa dāne katadhuranikkhepo. Kiṅkārappaṭissāvibhāveti ‘‘kiṃ karomi kiṃ karomī’’ti evaṃ kiṅkārameva paṭissuṇanto vicaratīti kiṅkārapaṭissāvī, tassa bhāvo kiṅkārapaṭissāvibhāvo, tasmiṃ, attano vasavattibhāveti vuttaṃ hoti.
உக்கோசங் த³த்வாதி லஞ்ஜங் த³த்வா. கூடவினிச்ச²யிகானந்தி கூடவினிச்ச²யே நியுத்தானங் வினயத⁴ரானங். ‘‘க³ண்ஹா’’தி அவத்வா ‘‘அஸாமிகஸ்ஸ ஸாமிகோ அய’’ந்திஆதி³னா பரியாயேன வுத்தேபி தஸ்ஸ ஸந்தகபா⁴வங் பரிச்சி²ந்தி³த்வா பவத்தவசனத்தா கூடவினிச்ச²யங் கரொந்தானங் கூடஸக்கீ²னஞ்ச பாராஜிகமேவ. அஸதிபி செத்த² டா²னாசாவனே உபி⁴ன்னங் து⁴ரனிக்கே²போயேவ டா²னாசாவனட்டா²னே திட்ட²தி. இமஸ்மிங் து⁴ரனிக்கே²பே பாராஜிகே ஸாமிகஸ்ஸ விமதுப்பாத³னபயோகே³ கதே து²ல்லச்சயங், தஸ்ஸேவ து⁴ரனிக்கே²பபயோகே³ நிப்பா²தி³தே பாராஜிகங். ஸயங் பராஜயங் பாபுணாதீதி கூடட்³ட³காரகோ பராஜயங் பாபுணாதி.
Ukkocaṃ datvāti lañjaṃ datvā. Kūṭavinicchayikānanti kūṭavinicchaye niyuttānaṃ vinayadharānaṃ. ‘‘Gaṇhā’’ti avatvā ‘‘asāmikassa sāmiko aya’’ntiādinā pariyāyena vuttepi tassa santakabhāvaṃ paricchinditvā pavattavacanattā kūṭavinicchayaṃ karontānaṃ kūṭasakkhīnañca pārājikameva. Asatipi cettha ṭhānācāvane ubhinnaṃ dhuranikkhepoyeva ṭhānācāvanaṭṭhāne tiṭṭhati. Imasmiṃ dhuranikkhepe pārājike sāmikassa vimatuppādanapayoge kate thullaccayaṃ, tasseva dhuranikkhepapayoge nipphādite pārājikaṃ. Sayaṃ parājayaṃ pāpuṇātīti kūṭaḍḍakārako parājayaṃ pāpuṇāti.
ஆராமட்ட²கதா²வண்ணனா நிட்டி²தா.
Ārāmaṭṭhakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆராமட்ட²கதா²வண்ணனா • Ārāmaṭṭhakathāvaṇṇanā
