| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஆராமட்ட²கதா²வண்ணனா
Ārāmaṭṭhakathāvaṇṇanā
102. ஆராமட்ட²கதா²யங் ஆராமங் அபி⁴யுஞ்ஜதீதி இத³ங் அபி⁴யோக³கரணங் பரேஸங் பூ⁴மட்ட²ப⁴ண்டா³தீ³ஸுபி காதுங் வட்டதியேவ. ஆராமாதி³தா²வரேஸு பன யேபு⁴ய்யேன அபி⁴யோக³வஸேனேவ க³ஹணஸம்ப⁴வதோ எத்தே²வ பாளியங் அபி⁴யோகோ³ வுத்தோ, இதி இமினா நயேன ஸப்³ப³த்தா²பி ஸக்கா ஞாதுந்தி க³ஹேதப்³ப³ங். அதி³ன்னாதா³னஸ்ஸ பயோக³த்தாதி ஸஹபயோக³மாஹ. வத்து²ம்ஹியேவ கதபயோக³த்தா ஸஹபயோக³வஸேன ஹேதங் து³க்கடங். ஸயம்பீதி அபி⁴யுஞ்ஜகோபி. ‘‘கிங் கரோமி கிங் கரோமீ’’தி ஏவங் கிங்காரமேவ படிஸ்ஸுணந்தோ விய சரதீதி கிங்காரபடிஸ்ஸாவீ, தஸ்ஸ பா⁴வோ கிங்காரபடிஸ்ஸாவிபா⁴வோ, தஸ்மிங், அத்தனோ வஸவத்திபா⁴வேதி வுத்தங் ஹோதி. உக்கோசந்தி லஞ்ஜங். ஸப்³பே³ஸங் பாராஜிகந்தி கூடவினிச்ச²யிகாதீ³னங். அயங் வத்து²ஸாமீதிஆதி³கஸ்ஸ உபி⁴ன்னங் து⁴ரனிக்கே²பகரணஹேதுனோ பயோக³ஸ்ஸ கரணக்க²ணேவ பாராஜிகங் ஹோதீதி வேதி³தப்³ப³ங். ஸசே பன ஸாமிகஸ்ஸ விமதி ச து⁴ரனிக்கே²போ ச கமேன உப்பஜ்ஜந்தி, பயோக³ஸமுட்டா²பகசித்தக்க²ணே பாராஜிகமேவ ஹோதி, ந து²ல்லச்சயங். யதி³ விமதியேவ உப்பஜ்ஜதி, ததா³ து²ல்லச்சயமேவாதி வேதி³தப்³ப³ங், அயங் நயோ ஸப்³ப³த்த² யதா²னுரூபங் க³ஹேதப்³போ³. து⁴ரனிக்கே²பவஸேனேவ பராஜயோதி ஸாமிகோ ‘‘அஹங் ந முச்சாமீ’’தி து⁴ரங் அனிக்கி²பந்தோ அட்டோ பராஜிதோ நாம ந ஹோதீதி த³ஸ்ஸேதி.
102. Ārāmaṭṭhakathāyaṃ ārāmaṃ abhiyuñjatīti idaṃ abhiyogakaraṇaṃ paresaṃ bhūmaṭṭhabhaṇḍādīsupi kātuṃ vaṭṭatiyeva. Ārāmādithāvaresu pana yebhuyyena abhiyogavaseneva gahaṇasambhavato ettheva pāḷiyaṃ abhiyogo vutto, iti iminā nayena sabbatthāpi sakkā ñātunti gahetabbaṃ. Adinnādānassa payogattāti sahapayogamāha. Vatthumhiyeva katapayogattā sahapayogavasena hetaṃ dukkaṭaṃ. Sayampīti abhiyuñjakopi. ‘‘Kiṃ karomi kiṃ karomī’’ti evaṃ kiṅkārameva paṭissuṇanto viya caratīti kiṅkārapaṭissāvī, tassa bhāvo kiṅkārapaṭissāvibhāvo, tasmiṃ, attano vasavattibhāveti vuttaṃ hoti. Ukkocanti lañjaṃ. Sabbesaṃ pārājikanti kūṭavinicchayikādīnaṃ. Ayaṃ vatthusāmītiādikassa ubhinnaṃ dhuranikkhepakaraṇahetuno payogassa karaṇakkhaṇeva pārājikaṃ hotīti veditabbaṃ. Sace pana sāmikassa vimati ca dhuranikkhepo ca kamena uppajjanti, payogasamuṭṭhāpakacittakkhaṇe pārājikameva hoti, na thullaccayaṃ. Yadi vimatiyeva uppajjati, tadā thullaccayamevāti veditabbaṃ, ayaṃ nayo sabbattha yathānurūpaṃ gahetabbo. Dhuranikkhepavaseneva parājayoti sāmiko ‘‘ahaṃ na muccāmī’’ti dhuraṃ anikkhipanto aṭṭo parājito nāma na hotīti dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆராமட்ட²கதா²வண்ணனா • Ārāmaṭṭhakathāvaṇṇanā
