| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৬. আরামৰগ্গো
6. Ārāmavaggo
২৩৬. জানং সভিক্খুকং আরামং অনাপুচ্ছা পৰিসন্তী দ্ৰে আপত্তিযো আপজ্জতি। পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স।
236. Jānaṃ sabhikkhukaṃ ārāmaṃ anāpucchā pavisantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
ভিক্খুং অক্কোসন্তী পরিভাসন্তী দ্ৰে আপত্তিযো আপজ্জতি। অক্কোসতি, পযোগে দুক্কটং; অক্কোসিতে, আপত্তি পাচিত্তিযস্স।
Bhikkhuṃ akkosantī paribhāsantī dve āpattiyo āpajjati. Akkosati, payoge dukkaṭaṃ; akkosite, āpatti pācittiyassa.
চণ্ডীকতা গণং পরিভাসন্তী দ্ৰে আপত্তিযো আপজ্জতি। পরিভাসতি, পযোগে দুক্কটং; পরিভাসিতে, আপত্তি পাচিত্তিযস্স।
Caṇḍīkatā gaṇaṃ paribhāsantī dve āpattiyo āpajjati. Paribhāsati, payoge dukkaṭaṃ; paribhāsite, āpatti pācittiyassa.
নিমন্তিতা ৰা পৰারিতা ৰা খাদনীযং ৰা ভোজনীযং ৰা ভুঞ্জন্তী দ্ৰে আপত্তিযো আপজ্জতি। ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স।
Nimantitā vā pavāritā vā khādanīyaṃ vā bhojanīyaṃ vā bhuñjantī dve āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
কুলং মচ্ছরাযন্তী দ্ৰে আপত্তিযো আপজ্জতি। মচ্ছরাযতি, পযোগে দুক্কটং; মচ্ছরিতে, আপত্তি পাচিত্তিযস্স।
Kulaṃ maccharāyantī dve āpattiyo āpajjati. Maccharāyati, payoge dukkaṭaṃ; maccharite, āpatti pācittiyassa.
অভিক্খুকে আৰাসে ৰস্সং ৰসন্তী দ্ৰে আপত্তিযো আপজ্জতি। ‘‘ৰস্সং ৰসিস্সামী’’তি সেনাসনং পঞ্ঞপেতি পানীযং পরিভোজনীযং উপট্ঠপেতি পরিৰেণং সম্মজ্জতি, আপত্তি দুক্কটস্স; সহ অরুণুগ্গমনা আপত্তি পাচিত্তিযস্স।
Abhikkhuke āvāse vassaṃ vasantī dve āpattiyo āpajjati. ‘‘Vassaṃ vasissāmī’’ti senāsanaṃ paññapeti pānīyaṃ paribhojanīyaṃ upaṭṭhapeti pariveṇaṃ sammajjati, āpatti dukkaṭassa; saha aruṇuggamanā āpatti pācittiyassa.
ৰস্সংৰুট্ঠা ভিক্খুনী উভতোসঙ্ঘে তীহি ঠানেহি ন পৰারেন্তী একং আপত্তিং আপজ্জতি। পাচিত্তিযং।
Vassaṃvuṭṭhā bhikkhunī ubhatosaṅghe tīhi ṭhānehi na pavārentī ekaṃ āpattiṃ āpajjati. Pācittiyaṃ.
ওৰাদায ৰা সংৰাসায ৰা ন গচ্ছন্তী একং আপত্তিং আপজ্জতি। পাচিত্তিযং।
Ovādāya vā saṃvāsāya vā na gacchantī ekaṃ āpattiṃ āpajjati. Pācittiyaṃ.
উপোসথম্পি ন পুচ্ছন্তী ওৰাদম্পি ন যাচন্তী একং আপত্তিং আপজ্জতি। পাচিত্তিযং।
Uposathampi na pucchantī ovādampi na yācantī ekaṃ āpattiṃ āpajjati. Pācittiyaṃ.
পসাখে জাতং গণ্ডং ৰা রুধিতং ৰা অনপলোকেত্ৰা সঙ্ঘং ৰা গণং ৰা পুরিসেন সদ্ধিং একেনেকা ভেদাপেন্তী দ্ৰে আপত্তিযো আপজ্জতি। ভেদাপেতি, পযোগে দুক্কটং; ভিন্নে, আপত্তি পাচিত্তিযস্স।
Pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpentī dve āpattiyo āpajjati. Bhedāpeti, payoge dukkaṭaṃ; bhinne, āpatti pācittiyassa.
আরামৰগ্গো ছট্ঠো।
Ārāmavaggo chaṭṭho.
