| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๖. อารามวโคฺค
6. Ārāmavaggo
๒๓๖. ชานํ สภิกฺขุกํ อารามํ อนาปุจฺฉา ปวิสนฺตี เทฺว อาปตฺติโย อาปชฺชติฯ ปฐมํ ปาทํ ปริเกฺขปํ อติกฺกาเมติ, อาปตฺติ ทุกฺกฎสฺส; ทุติยํ ปาทํ อติกฺกาเมติ, อาปตฺติ ปาจิตฺติยสฺสฯ
236. Jānaṃ sabhikkhukaṃ ārāmaṃ anāpucchā pavisantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
ภิกฺขุํ อโกฺกสนฺตี ปริภาสนฺตี เทฺว อาปตฺติโย อาปชฺชติฯ อโกฺกสติ, ปโยเค ทุกฺกฎํ; อโกฺกสิเต, อาปตฺติ ปาจิตฺติยสฺสฯ
Bhikkhuṃ akkosantī paribhāsantī dve āpattiyo āpajjati. Akkosati, payoge dukkaṭaṃ; akkosite, āpatti pācittiyassa.
จณฺฑีกตา คณํ ปริภาสนฺตี เทฺว อาปตฺติโย อาปชฺชติฯ ปริภาสติ, ปโยเค ทุกฺกฎํ; ปริภาสิเต, อาปตฺติ ปาจิตฺติยสฺสฯ
Caṇḍīkatā gaṇaṃ paribhāsantī dve āpattiyo āpajjati. Paribhāsati, payoge dukkaṭaṃ; paribhāsite, āpatti pācittiyassa.
นิมนฺติตา วา ปวาริตา วา ขาทนียํ วา โภชนียํ วา ภุญฺชนฺตี เทฺว อาปตฺติโย อาปชฺชติฯ ‘‘ขาทิสฺสามิ ภุญฺชิสฺสามี’’ติ ปฎิคฺคณฺหาติ, อาปตฺติ ทุกฺกฎสฺส; อโชฺฌหาเร อโชฺฌหาเร อาปตฺติ ปาจิตฺติยสฺสฯ
Nimantitā vā pavāritā vā khādanīyaṃ vā bhojanīyaṃ vā bhuñjantī dve āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
กุลํ มจฺฉรายนฺตี เทฺว อาปตฺติโย อาปชฺชติฯ มจฺฉรายติ, ปโยเค ทุกฺกฎํ; มจฺฉริเต, อาปตฺติ ปาจิตฺติยสฺสฯ
Kulaṃ maccharāyantī dve āpattiyo āpajjati. Maccharāyati, payoge dukkaṭaṃ; maccharite, āpatti pācittiyassa.
อภิกฺขุเก อาวาเส วสฺสํ วสนฺตี เทฺว อาปตฺติโย อาปชฺชติฯ ‘‘วสฺสํ วสิสฺสามี’’ติ เสนาสนํ ปญฺญเปติ ปานียํ ปริโภชนียํ อุปฎฺฐเปติ ปริเวณํ สมฺมชฺชติ, อาปตฺติ ทุกฺกฎสฺส; สห อรุณุคฺคมนา อาปตฺติ ปาจิตฺติยสฺสฯ
Abhikkhuke āvāse vassaṃ vasantī dve āpattiyo āpajjati. ‘‘Vassaṃ vasissāmī’’ti senāsanaṃ paññapeti pānīyaṃ paribhojanīyaṃ upaṭṭhapeti pariveṇaṃ sammajjati, āpatti dukkaṭassa; saha aruṇuggamanā āpatti pācittiyassa.
วสฺสํวุฎฺฐา ภิกฺขุนี อุภโตสเงฺฆ ตีหิ ฐาเนหิ น ปวาเรนฺตี เอกํ อาปตฺติํ อาปชฺชติฯ ปาจิตฺติยํฯ
Vassaṃvuṭṭhā bhikkhunī ubhatosaṅghe tīhi ṭhānehi na pavārentī ekaṃ āpattiṃ āpajjati. Pācittiyaṃ.
โอวาทาย วา สํวาสาย วา น คจฺฉนฺตี เอกํ อาปตฺติํ อาปชฺชติฯ ปาจิตฺติยํฯ
Ovādāya vā saṃvāsāya vā na gacchantī ekaṃ āpattiṃ āpajjati. Pācittiyaṃ.
อุโปสถมฺปิ น ปุจฺฉนฺตี โอวาทมฺปิ น ยาจนฺตี เอกํ อาปตฺติํ อาปชฺชติฯ ปาจิตฺติยํฯ
Uposathampi na pucchantī ovādampi na yācantī ekaṃ āpattiṃ āpajjati. Pācittiyaṃ.
ปสาเข ชาตํ คณฺฑํ วา รุธิตํ วา อนปโลเกตฺวา สงฺฆํ วา คณํ วา ปุริเสน สทฺธิํ เอเกเนกา เภทาเปนฺตี เทฺว อาปตฺติโย อาปชฺชติฯ เภทาเปติ, ปโยเค ทุกฺกฎํ; ภิเนฺน, อาปตฺติ ปาจิตฺติยสฺสฯ
Pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpentī dve āpattiyo āpajjati. Bhedāpeti, payoge dukkaṭaṃ; bhinne, āpatti pācittiyassa.
อารามวโคฺค ฉโฎฺฐฯ
Ārāmavaggo chaṭṭho.
