| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
6. ආරාමවග්‌ගො
6. Ārāmavaggo
236. ජානං සභික්‌ඛුකං ආරාමං අනාපුච්‌ඡා පවිසන්‌තී ද්‌වෙ ආපත්‌තියො ආපජ්‌ජති. පඨමං පාදං පරික්‌ඛෙපං අතික්‌කාමෙති, ආපත්‌ති දුක්‌කටස්‌ස; දුතියං පාදං අතික්‌කාමෙති, ආපත්‌ති පාචිත්‌තියස්‌ස.
236. Jānaṃ sabhikkhukaṃ ārāmaṃ anāpucchā pavisantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
භික්‌ඛුං අක්‌කොසන්‌තී පරිභාසන්‌තී ද්‌වෙ ආපත්‌තියො ආපජ්‌ජති. අක්‌කොසති, පයොගෙ දුක්‌කටං; අක්‌කොසිතෙ, ආපත්‌ති පාචිත්‌තියස්‌ස.
Bhikkhuṃ akkosantī paribhāsantī dve āpattiyo āpajjati. Akkosati, payoge dukkaṭaṃ; akkosite, āpatti pācittiyassa.
චණ්‌ඩීකතා ගණං පරිභාසන්‌තී ද්‌වෙ ආපත්‌තියො ආපජ්‌ජති. පරිභාසති, පයොගෙ දුක්‌කටං; පරිභාසිතෙ, ආපත්‌ති පාචිත්‌තියස්‌ස.
Caṇḍīkatā gaṇaṃ paribhāsantī dve āpattiyo āpajjati. Paribhāsati, payoge dukkaṭaṃ; paribhāsite, āpatti pācittiyassa.
නිමන්‌තිතා වා පවාරිතා වා ඛාදනීයං වා භොජනීයං වා භුඤ්‌ජන්‌තී ද්‌වෙ ආපත්‌තියො ආපජ්‌ජති. ‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති දුක්‌කටස්‌ස; අජ්‌ඣොහාරෙ අජ්‌ඣොහාරෙ ආපත්‌ති පාචිත්‌තියස්‌ස.
Nimantitā vā pavāritā vā khādanīyaṃ vā bhojanīyaṃ vā bhuñjantī dve āpattiyo āpajjati. ‘‘Khādissāmi bhuñjissāmī’’ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
කුලං මච්‌ඡරායන්‌තී ද්‌වෙ ආපත්‌තියො ආපජ්‌ජති. මච්‌ඡරායති, පයොගෙ දුක්‌කටං; මච්‌ඡරිතෙ, ආපත්‌ති පාචිත්‌තියස්‌ස.
Kulaṃ maccharāyantī dve āpattiyo āpajjati. Maccharāyati, payoge dukkaṭaṃ; maccharite, āpatti pācittiyassa.
අභික්‌ඛුකෙ ආවාසෙ වස්‌සං වසන්‌තී ද්‌වෙ ආපත්‌තියො ආපජ්‌ජති. ‘‘වස්‌සං වසිස්‌සාමී’’ති සෙනාසනං පඤ්‌ඤපෙති පානීයං පරිභොජනීයං උපට්‌ඨපෙති පරිවෙණං සම්‌මජ්‌ජති, ආපත්‌ති දුක්‌කටස්‌ස; සහ අරුණුග්‌ගමනා ආපත්‌ති පාචිත්‌තියස්‌ස.
Abhikkhuke āvāse vassaṃ vasantī dve āpattiyo āpajjati. ‘‘Vassaṃ vasissāmī’’ti senāsanaṃ paññapeti pānīyaṃ paribhojanīyaṃ upaṭṭhapeti pariveṇaṃ sammajjati, āpatti dukkaṭassa; saha aruṇuggamanā āpatti pācittiyassa.
වස්‌සංවුට්‌ඨා භික්‌ඛුනී උභතොසඞ්‌ඝෙ තීහි ඨානෙහි න පවාරෙන්‌තී එකං ආපත්‌තිං ආපජ්‌ජති. පාචිත්‌තියං.
Vassaṃvuṭṭhā bhikkhunī ubhatosaṅghe tīhi ṭhānehi na pavārentī ekaṃ āpattiṃ āpajjati. Pācittiyaṃ.
ඔවාදාය වා සංවාසාය වා න ගච්‌ඡන්‌තී එකං ආපත්‌තිං ආපජ්‌ජති. පාචිත්‌තියං.
Ovādāya vā saṃvāsāya vā na gacchantī ekaṃ āpattiṃ āpajjati. Pācittiyaṃ.
උපොසථම්‌පි න පුච්‌ඡන්‌තී ඔවාදම්‌පි න යාචන්‌තී එකං ආපත්‌තිං ආපජ්‌ජති. පාචිත්‌තියං.
Uposathampi na pucchantī ovādampi na yācantī ekaṃ āpattiṃ āpajjati. Pācittiyaṃ.
පසාඛෙ ජාතං ගණ්‌ඩං වා රුධිතං වා අනපලොකෙත්‌වා සඞ්‌ඝං වා ගණං වා පුරිසෙන සද්‌ධිං එකෙනෙකා භෙදාපෙන්‌තී ද්‌වෙ ආපත්‌තියො ආපජ්‌ජති. භෙදාපෙති, පයොගෙ දුක්‌කටං; භින්‌නෙ, ආපත්‌ති පාචිත්‌තියස්‌ස.
Pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpentī dve āpattiyo āpajjati. Bhedāpeti, payoge dukkaṭaṃ; bhinne, āpatti pācittiyassa.
ආරාමවග්‌ගො ඡට්‌ඨො.
Ārāmavaggo chaṭṭho.
