| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
အာရမ္မဏစတုက္ကံ
Ārammaṇacatukkaṃ
၁၈၁. ဣဒာနိ ယသ္မာ ဧတံ ဈာနံ နာမ ယထာ ပဋိပဒာဘေဒေန ဧဝံ အာရမ္မဏဘေဒေနာပိ စတုဗ္ဗိဓံ ဟောတိ။ တသ္မာသ္သ တံ ပဘေဒံ ဒသ္သေတုံ ပုန ကတမေ ဓမ္မာ ကုသလာတိအာဒိ အာရဒ္ဓံ။ တတ္ထ ပရိတ္တံ ပရိတ္တာရမ္မဏန္တိအာဒီသု ယံ အပ္ပဂုဏံ ဟောတိ, ဥပရိဇ္ဈာနသ္သ ပစ္စယော ဘဝိတုံ န သက္ကောတိ, ဣဒံ ပရိတ္တံ နာမ။ ယံ ပန အဝဍ္ဎိတေ သုပ္ပမတ္တေ ဝာ သရာဝမတ္တေ ဝာ အာရမ္မဏေ ပဝတ္တံ, တံ ပရိတ္တံ အာရမ္မဏံ အသ္သာတိ ပရိတ္တာရမ္မဏံ။ ယံ ပဂုဏံ သုဘာဝိတံ ဥပရိဇ္ဈာနသ္သ ပစ္စယော ဘဝိတုံ သက္ကောတိ, ဣဒံ အပ္ပမာဏံ နာမ။ ယံ ဝိပုလေ အာရမ္မဏေ ပဝတ္တံ တံ ဝုဍ္ဎိပ္ပမာဏတ္တာ အပ္ပမာဏံ အာရမ္မဏံ အသ္သာတိ အပ္ပမာဏာရမ္မဏံ။ ဝုတ္တလက္ခဏဝောမိသ္သကတာယ ပန ဝောမိသ္သကနယော ဝေဒိတဗ္ဗော။ ဣတိ အာရမ္မဏဝသေနပိ စတ္တာရော နဝကာ ဝုတ္တာ ဟောန္တိ။ စိတ္တဂဏနာပေတ္ထ ပုရိမသဒိသာ ဧဝာတိ။
181. Idāni yasmā etaṃ jhānaṃ nāma yathā paṭipadābhedena evaṃ ārammaṇabhedenāpi catubbidhaṃ hoti. Tasmāssa taṃ pabhedaṃ dassetuṃ puna katame dhammā kusalātiādi āraddhaṃ. Tattha parittaṃ parittārammaṇantiādīsu yaṃ appaguṇaṃ hoti, uparijjhānassa paccayo bhavituṃ na sakkoti, idaṃ parittaṃ nāma. Yaṃ pana avaḍḍhite suppamatte vā sarāvamatte vā ārammaṇe pavattaṃ, taṃ parittaṃ ārammaṇaṃ assāti parittārammaṇaṃ. Yaṃ paguṇaṃ subhāvitaṃ uparijjhānassa paccayo bhavituṃ sakkoti, idaṃ appamāṇaṃ nāma. Yaṃ vipule ārammaṇe pavattaṃ taṃ vuḍḍhippamāṇattā appamāṇaṃ ārammaṇaṃ assāti appamāṇārammaṇaṃ. Vuttalakkhaṇavomissakatāya pana vomissakanayo veditabbo. Iti ārammaṇavasenapi cattāro navakā vuttā honti. Cittagaṇanāpettha purimasadisā evāti.
အာရမ္မဏစတုက္ကံ။
Ārammaṇacatukkaṃ.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓမ္မသင္ဂဏီပာဠိ • Dhammasaṅgaṇīpāḷi / ရူပာဝစရကုသလံ • Rūpāvacarakusalaṃ
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā / အာရမ္မဏစတုက္ကဝဏ္ဏနာ • Ārammaṇacatukkavaṇṇanā
