| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
২. আরম্মণপচ্চযনিদ্দেসৰণ্ণনা
2. Ārammaṇapaccayaniddesavaṇṇanā
২. আরম্মণপচ্চযনিদ্দেসে রূপাযতনন্তি রূপসঙ্খাতং আযতনং। সেসেসুপি এসেৰ নযো। চক্খুৰিঞ্ঞাণধাতুযাতি চক্খুৰিঞ্ঞাণসঙ্খাতায ধাতুযা। সেসপদেসুপি এসেৰ নযো। তংসম্পযুত্তকানন্তি তায চক্খুৰিঞ্ঞাণধাতুযা সম্পযুত্তকানং তিণ্ণং খন্ধানং, সব্বেসম্পি চক্খুপসাদৰত্থুকানং চতুন্নং খন্ধানং রূপাযতনং আরম্মণপচ্চযেন পচ্চযোতি অত্থো। ইতো পরেসুপি এসেৰ নযো। মনোধাতুযাতি সসম্পযুত্তধম্মায তিৰিধাযপি মনোধাতুযা রূপাযতনাদীনি পঞ্চ আরম্মণপচ্চযেন পচ্চযো, নো চ খো একক্খণে। সব্বে ধম্মাতি এতানি চ রূপাযতনাদীনি পঞ্চ অৰসেসা চ সব্বেপি ঞেয্যধম্মা ইমা ছ ধাতুযো ঠপেত্ৰা সেসায সসম্পযুত্তধম্মায মনোৰিঞ্ঞাণধাতুযা আরম্মণপচ্চযেন পচ্চযোতি অত্থো। যং যং ধম্মং আরব্ভাতি ইমিনা যে এতে এতাসং সত্তন্নং ৰিঞ্ঞাণধাতূনং আরম্মণধম্মা ৰুত্তা, তে তাসং ধাতূনং আরম্মণং কত্ৰা উপ্পজ্জনক্খণেযেৰ আরম্মণপচ্চযো হোন্তীতি দীপেতি। এৰং হোন্তাপি চ ন একতো হোন্তি, যং যং আরব্ভ যে যে উপ্পজ্জন্তি, তেসং তেসং তে তে ৰিসুং ৰিসুং আরম্মণপচ্চযো হোন্তীতিপি দীপেতি। উপ্পজ্জন্তীতি ইদং যথা নজ্জো সন্দন্তি, পব্বতা তিট্ঠন্তীতি সব্বকালসঙ্গহৰসেন, এৰং ৰুত্তন্তি ৰেদিতব্বং। তেন যেপি আরব্ভ যে উপ্পজ্জিংসু, যেপি উপ্পজ্জিস্সন্তি, তে সব্বে আরম্মণপচ্চযেনেৰ উপ্পজ্জিংসু চ উপ্পজ্জিস্সন্তি চাতি সিদ্ধং হোতি। চিত্তচেতসিকা ধম্মাতি ইদং ‘‘যে যে ধম্মা’’তি ৰুত্তানং সরূপতো নিদস্সনং। তে তে ধম্মাতি তে তে আরম্মণধম্মা। তেসং তেসন্তি তেসং তেসং চিত্তচেতসিকধম্মানং। অযং তাৰেত্থ পাল়িৰণ্ণনা।
2. Ārammaṇapaccayaniddese rūpāyatananti rūpasaṅkhātaṃ āyatanaṃ. Sesesupi eseva nayo. Cakkhuviññāṇadhātuyāti cakkhuviññāṇasaṅkhātāya dhātuyā. Sesapadesupi eseva nayo. Taṃsampayuttakānanti tāya cakkhuviññāṇadhātuyā sampayuttakānaṃ tiṇṇaṃ khandhānaṃ, sabbesampi cakkhupasādavatthukānaṃ catunnaṃ khandhānaṃ rūpāyatanaṃ ārammaṇapaccayena paccayoti attho. Ito paresupi eseva nayo. Manodhātuyāti sasampayuttadhammāya tividhāyapi manodhātuyā rūpāyatanādīni pañca ārammaṇapaccayena paccayo, no ca kho ekakkhaṇe. Sabbe dhammāti etāni ca rūpāyatanādīni pañca avasesā ca sabbepi ñeyyadhammā imā cha dhātuyo ṭhapetvā sesāya sasampayuttadhammāya manoviññāṇadhātuyā ārammaṇapaccayena paccayoti attho. Yaṃ yaṃ dhammaṃ ārabbhāti iminā ye ete etāsaṃ sattannaṃ viññāṇadhātūnaṃ ārammaṇadhammā vuttā, te tāsaṃ dhātūnaṃ ārammaṇaṃ katvā uppajjanakkhaṇeyeva ārammaṇapaccayo hontīti dīpeti. Evaṃ hontāpi ca na ekato honti, yaṃ yaṃ ārabbha ye ye uppajjanti, tesaṃ tesaṃ te te visuṃ visuṃ ārammaṇapaccayo hontītipi dīpeti. Uppajjantīti idaṃ yathā najjo sandanti, pabbatā tiṭṭhantīti sabbakālasaṅgahavasena, evaṃ vuttanti veditabbaṃ. Tena yepi ārabbha ye uppajjiṃsu, yepi uppajjissanti, te sabbe ārammaṇapaccayeneva uppajjiṃsu ca uppajjissanti cāti siddhaṃ hoti. Cittacetasikā dhammāti idaṃ ‘‘ye ye dhammā’’ti vuttānaṃ sarūpato nidassanaṃ. Te te dhammāti te te ārammaṇadhammā. Tesaṃ tesanti tesaṃ tesaṃ cittacetasikadhammānaṃ. Ayaṃ tāvettha pāḷivaṇṇanā.
ইদং পন আরম্মণং নাম রূপারম্মণং সদ্দগন্ধরসফোট্ঠব্বধম্মারম্মণন্তি কোট্ঠাসতো ছব্বিধং হোতি। তত্থ ঠপেত্ৰা পঞ্ঞত্তিং অৰসেসং ভূমিতো কামাৰচরং…পে॰… অপরিযাপন্নন্তি চতুব্বিধং হোতি। তত্থ কামাৰচরং কুসলাকুসলৰিপাককিরিযরূপভেদতো পঞ্চৰিধং; রূপাৰচরং কুসলৰিপাককিরিযতো তিৰিধং, তথা অরূপাৰচরং, অপরিযাপন্নং কুসলৰিপাকনিব্বানৰসেন তিৰিধং হোতি। সব্বমেৰ ৰা এতং কুসলাকুসলৰিপাককিরিযরূপনিব্বানপঞ্ঞত্তিভেদতো সত্তৰিধং হোতি। তত্থ কুসলং ভূমিভেদতো চতুব্বিধং হোতি, অকুসলং কামাৰচরমেৰ, ৰিপাকং চতুভূমকং, কিরিযং তিভূমকং, রূপং একভূমকং কামাৰচরমেৰ, নিব্বানম্পি একভূমকং অপরিযাপন্নমেৰ, পঞ্ঞত্তি ভূমিৰিনিমুত্তাতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো।
Idaṃ pana ārammaṇaṃ nāma rūpārammaṇaṃ saddagandharasaphoṭṭhabbadhammārammaṇanti koṭṭhāsato chabbidhaṃ hoti. Tattha ṭhapetvā paññattiṃ avasesaṃ bhūmito kāmāvacaraṃ…pe… apariyāpannanti catubbidhaṃ hoti. Tattha kāmāvacaraṃ kusalākusalavipākakiriyarūpabhedato pañcavidhaṃ; rūpāvacaraṃ kusalavipākakiriyato tividhaṃ, tathā arūpāvacaraṃ, apariyāpannaṃ kusalavipākanibbānavasena tividhaṃ hoti. Sabbameva vā etaṃ kusalākusalavipākakiriyarūpanibbānapaññattibhedato sattavidhaṃ hoti. Tattha kusalaṃ bhūmibhedato catubbidhaṃ hoti, akusalaṃ kāmāvacarameva, vipākaṃ catubhūmakaṃ, kiriyaṃ tibhūmakaṃ, rūpaṃ ekabhūmakaṃ kāmāvacarameva, nibbānampi ekabhūmakaṃ apariyāpannameva, paññatti bhūmivinimuttāti evamettha nānappakārabhedato viññātabbo vinicchayo.
এৰং ভিন্নে পনেতস্মিং আরম্মণে কামাৰচরকুসলারম্মণং কামাৰচরকুসলস্স, রূপাৰচরকুসলস্স, অকুসলস্স, কামাৰচরৰিপাকস্স, কামাৰচরকিরিযস্স, রূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। রূপাৰচরকুসলারম্মণং তেসু ছসু রাসীসু কামাৰচরৰিপাকৰজ্জানং পঞ্চন্নং রাসীনং আরম্মণপচ্চযো হোতি। অরূপাৰচরকুসলারম্মণং কামাৰচরকুসলস্স, রূপাৰচরকুসলস্স, অরূপাৰচরকুসলস্স, অকুসলস্স, অরূপাৰরচরৰিপাকস্স, কামাৰচরকিরিযস্স, রূপাৰচরকিরিযস্স, অরূপাৰচরকিরিযস্স চাতি ইমেসং অট্ঠন্নং রাসীনং আরম্মণপচ্চযো হোতি। অপরিযাপন্নকুসলারম্মণং কামাৰচররূপাৰচরতো কুসলকিরিযানমেৰ আরম্মণপচ্চযো হোতি। অকুসলারম্মণং কামাৰচররূপাৰচরকুসলস্স, অকুসলস্স, কামাৰচরৰিপাকস্স, কামাৰচররূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি।
Evaṃ bhinne panetasmiṃ ārammaṇe kāmāvacarakusalārammaṇaṃ kāmāvacarakusalassa, rūpāvacarakusalassa, akusalassa, kāmāvacaravipākassa, kāmāvacarakiriyassa, rūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalārammaṇaṃ tesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakusalārammaṇaṃ kāmāvacarakusalassa, rūpāvacarakusalassa, arūpāvacarakusalassa, akusalassa, arūpāvaracaravipākassa, kāmāvacarakiriyassa, rūpāvacarakiriyassa, arūpāvacarakiriyassa cāti imesaṃ aṭṭhannaṃ rāsīnaṃ ārammaṇapaccayo hoti. Apariyāpannakusalārammaṇaṃ kāmāvacararūpāvacarato kusalakiriyānameva ārammaṇapaccayo hoti. Akusalārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti.
কামাৰচরৰিপাকারম্মণং কামাৰচররূপাৰচরকুসলস্স, অকুসলস্স, কামাৰচরৰিপাকস্স, কামাৰচররূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। রূপাৰচরৰিপাকারম্মণং কামাৰচররূপাৰচরকুসলস্স, অকুসলস্স, কামাৰচররূপাৰচরকিরিযস্স চাতি ইমেসং পঞ্চন্নং রাসীনং আরম্মণপচ্চযো হোতি। অরূপাৰচরৰিপাকারম্মণম্পি ইমেসংযেৰ পঞ্চন্নং রাসীনং আরম্মণপচ্চযো হোতি। অপরিযাপন্নৰিপাকারম্মণং কামাৰচররূপাৰচরকুসলকিরিযানঞ্ঞেৰ আরম্মণপচ্চযো হোতি।
Kāmāvacaravipākārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacaravipākārammaṇaṃ kāmāvacararūpāvacarakusalassa, akusalassa, kāmāvacararūpāvacarakiriyassa cāti imesaṃ pañcannaṃ rāsīnaṃ ārammaṇapaccayo hoti. Arūpāvacaravipākārammaṇampi imesaṃyeva pañcannaṃ rāsīnaṃ ārammaṇapaccayo hoti. Apariyāpannavipākārammaṇaṃ kāmāvacararūpāvacarakusalakiriyānaññeva ārammaṇapaccayo hoti.
কামাৰচরকিরিযারম্মণং কামাৰচররূপাৰচরকুসলস্স, অকুসলস্স, কামাৰচরৰিপাকস্স, কামাৰচররূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। রূপাৰচরকিরিযারম্মণং ইমেসু ছসু রাসীসু কামাৰচরৰিপাকৰজ্জানং পঞ্চন্নং রাসীনং আরম্মণপচ্চযো হোতি। অরূপাৰচরকিরিযারম্মণং তেসং পঞ্চন্নং অরূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। চতুসমুট্ঠানং রূপক্খন্ধসঙ্খাতং রূপারম্মণং কামাৰচররূপাৰচরকুসলস্স অকুসলস্স কামাৰচরৰিপাকস্স কামাৰচররূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। নিব্বানারম্মণং কামাৰচররূপাৰচরকুসলস্স, অপরিযাপন্নতো কুসলৰিপাকস্স, কামাৰচররূপাৰচরকিরিযস্স চাতি ইমেসং ছন্নং রাসীনং আরম্মণপচ্চযো হোতি। রূপাৰচরকুসলকিরিযানং কেচি নিচ্ছন্তি, তং যুত্তিতো উপধারেতব্বং। নানপ্পকারকং পন পঞ্ঞত্তিআরম্মণং তেভূমককুসলস্স, অকুসলস্স, রূপাৰচরৰিপাকস্স, অরূপাৰচরৰিপাকস্স, তেভূমককিরিযস্স চাতি ইমেসং নৰন্নং রাসীনং আরম্মণপচ্চযো হোতি। তত্থ যং যং আরম্মণং যেসং যেসং পচ্চযো, তে তে তংতংপচ্চযুপ্পন্না নাম হোন্তীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি।
Kāmāvacarakiriyārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakiriyārammaṇaṃ imesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakiriyārammaṇaṃ tesaṃ pañcannaṃ arūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Catusamuṭṭhānaṃ rūpakkhandhasaṅkhātaṃ rūpārammaṇaṃ kāmāvacararūpāvacarakusalassa akusalassa kāmāvacaravipākassa kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Nibbānārammaṇaṃ kāmāvacararūpāvacarakusalassa, apariyāpannato kusalavipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalakiriyānaṃ keci nicchanti, taṃ yuttito upadhāretabbaṃ. Nānappakārakaṃ pana paññattiārammaṇaṃ tebhūmakakusalassa, akusalassa, rūpāvacaravipākassa, arūpāvacaravipākassa, tebhūmakakiriyassa cāti imesaṃ navannaṃ rāsīnaṃ ārammaṇapaccayo hoti. Tattha yaṃ yaṃ ārammaṇaṃ yesaṃ yesaṃ paccayo, te te taṃtaṃpaccayuppannā nāma hontīti evamettha paccayuppannatopi viññātabbo vinicchayoti.
আরম্মণপচ্চযনিদ্দেসৰণ্ণনা।
Ārammaṇapaccayaniddesavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / (২) পচ্চযনিদ্দেসো • (2) Paccayaniddeso
