| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੨. ਆਰਮ੍ਮਣਪਚ੍ਚਯਨਿਦ੍ਦੇਸવਣ੍ਣਨਾ
2. Ārammaṇapaccayaniddesavaṇṇanā
੨. ਆਰਮ੍ਮਣਪਚ੍ਚਯਨਿਦ੍ਦੇਸੇ ਰੂਪਾਯਤਨਨ੍ਤਿ ਰੂਪਸਙ੍ਖਾਤਂ ਆਯਤਨਂ। ਸੇਸੇਸੁਪਿ ਏਸੇવ ਨਯੋ। ਚਕ੍ਖੁવਿਞ੍ਞਾਣਧਾਤੁਯਾਤਿ ਚਕ੍ਖੁવਿਞ੍ਞਾਣਸਙ੍ਖਾਤਾਯ ਧਾਤੁਯਾ। ਸੇਸਪਦੇਸੁਪਿ ਏਸੇવ ਨਯੋ। ਤਂਸਮ੍ਪਯੁਤ੍ਤਕਾਨਨ੍ਤਿ ਤਾਯ ਚਕ੍ਖੁવਿਞ੍ਞਾਣਧਾਤੁਯਾ ਸਮ੍ਪਯੁਤ੍ਤਕਾਨਂ ਤਿਣ੍ਣਂ ਖਨ੍ਧਾਨਂ, ਸਬ੍ਬੇਸਮ੍ਪਿ ਚਕ੍ਖੁਪਸਾਦવਤ੍ਥੁਕਾਨਂ ਚਤੁਨ੍ਨਂ ਖਨ੍ਧਾਨਂ ਰੂਪਾਯਤਨਂ ਆਰਮ੍ਮਣਪਚ੍ਚਯੇਨ ਪਚ੍ਚਯੋਤਿ ਅਤ੍ਥੋ। ਇਤੋ ਪਰੇਸੁਪਿ ਏਸੇવ ਨਯੋ। ਮਨੋਧਾਤੁਯਾਤਿ ਸਸਮ੍ਪਯੁਤ੍ਤਧਮ੍ਮਾਯ ਤਿવਿਧਾਯਪਿ ਮਨੋਧਾਤੁਯਾ ਰੂਪਾਯਤਨਾਦੀਨਿ ਪਞ੍ਚ ਆਰਮ੍ਮਣਪਚ੍ਚਯੇਨ ਪਚ੍ਚਯੋ, ਨੋ ਚ ਖੋ ਏਕਕ੍ਖਣੇ। ਸਬ੍ਬੇ ਧਮ੍ਮਾਤਿ ਏਤਾਨਿ ਚ ਰੂਪਾਯਤਨਾਦੀਨਿ ਪਞ੍ਚ ਅવਸੇਸਾ ਚ ਸਬ੍ਬੇਪਿ ਞੇਯ੍ਯਧਮ੍ਮਾ ਇਮਾ ਛ ਧਾਤੁਯੋ ਠਪੇਤ੍વਾ ਸੇਸਾਯ ਸਸਮ੍ਪਯੁਤ੍ਤਧਮ੍ਮਾਯ ਮਨੋવਿਞ੍ਞਾਣਧਾਤੁਯਾ ਆਰਮ੍ਮਣਪਚ੍ਚਯੇਨ ਪਚ੍ਚਯੋਤਿ ਅਤ੍ਥੋ। ਯਂ ਯਂ ਧਮ੍ਮਂ ਆਰਬ੍ਭਾਤਿ ਇਮਿਨਾ ਯੇ ਏਤੇ ਏਤਾਸਂ ਸਤ੍ਤਨ੍ਨਂ વਿਞ੍ਞਾਣਧਾਤੂਨਂ ਆਰਮ੍ਮਣਧਮ੍ਮਾ વੁਤ੍ਤਾ, ਤੇ ਤਾਸਂ ਧਾਤੂਨਂ ਆਰਮ੍ਮਣਂ ਕਤ੍વਾ ਉਪ੍ਪਜ੍ਜਨਕ੍ਖਣੇਯੇવ ਆਰਮ੍ਮਣਪਚ੍ਚਯੋ ਹੋਨ੍ਤੀਤਿ ਦੀਪੇਤਿ। ਏવਂ ਹੋਨ੍ਤਾਪਿ ਚ ਨ ਏਕਤੋ ਹੋਨ੍ਤਿ, ਯਂ ਯਂ ਆਰਬ੍ਭ ਯੇ ਯੇ ਉਪ੍ਪਜ੍ਜਨ੍ਤਿ, ਤੇਸਂ ਤੇਸਂ ਤੇ ਤੇ વਿਸੁਂ વਿਸੁਂ ਆਰਮ੍ਮਣਪਚ੍ਚਯੋ ਹੋਨ੍ਤੀਤਿਪਿ ਦੀਪੇਤਿ। ਉਪ੍ਪਜ੍ਜਨ੍ਤੀਤਿ ਇਦਂ ਯਥਾ ਨਜ੍ਜੋ ਸਨ੍ਦਨ੍ਤਿ, ਪਬ੍ਬਤਾ ਤਿਟ੍ਠਨ੍ਤੀਤਿ ਸਬ੍ਬਕਾਲਸਙ੍ਗਹવਸੇਨ, ਏવਂ વੁਤ੍ਤਨ੍ਤਿ વੇਦਿਤਬ੍ਬਂ। ਤੇਨ ਯੇਪਿ ਆਰਬ੍ਭ ਯੇ ਉਪ੍ਪਜ੍ਜਿਂਸੁ, ਯੇਪਿ ਉਪ੍ਪਜ੍ਜਿਸ੍ਸਨ੍ਤਿ, ਤੇ ਸਬ੍ਬੇ ਆਰਮ੍ਮਣਪਚ੍ਚਯੇਨੇવ ਉਪ੍ਪਜ੍ਜਿਂਸੁ ਚ ਉਪ੍ਪਜ੍ਜਿਸ੍ਸਨ੍ਤਿ ਚਾਤਿ ਸਿਦ੍ਧਂ ਹੋਤਿ। ਚਿਤ੍ਤਚੇਤਸਿਕਾ ਧਮ੍ਮਾਤਿ ਇਦਂ ‘‘ਯੇ ਯੇ ਧਮ੍ਮਾ’’ਤਿ વੁਤ੍ਤਾਨਂ ਸਰੂਪਤੋ ਨਿਦਸ੍ਸਨਂ। ਤੇ ਤੇ ਧਮ੍ਮਾਤਿ ਤੇ ਤੇ ਆਰਮ੍ਮਣਧਮ੍ਮਾ। ਤੇਸਂ ਤੇਸਨ੍ਤਿ ਤੇਸਂ ਤੇਸਂ ਚਿਤ੍ਤਚੇਤਸਿਕਧਮ੍ਮਾਨਂ। ਅਯਂ ਤਾવੇਤ੍ਥ ਪਾਲ਼ਿવਣ੍ਣਨਾ।
2. Ārammaṇapaccayaniddese rūpāyatananti rūpasaṅkhātaṃ āyatanaṃ. Sesesupi eseva nayo. Cakkhuviññāṇadhātuyāti cakkhuviññāṇasaṅkhātāya dhātuyā. Sesapadesupi eseva nayo. Taṃsampayuttakānanti tāya cakkhuviññāṇadhātuyā sampayuttakānaṃ tiṇṇaṃ khandhānaṃ, sabbesampi cakkhupasādavatthukānaṃ catunnaṃ khandhānaṃ rūpāyatanaṃ ārammaṇapaccayena paccayoti attho. Ito paresupi eseva nayo. Manodhātuyāti sasampayuttadhammāya tividhāyapi manodhātuyā rūpāyatanādīni pañca ārammaṇapaccayena paccayo, no ca kho ekakkhaṇe. Sabbe dhammāti etāni ca rūpāyatanādīni pañca avasesā ca sabbepi ñeyyadhammā imā cha dhātuyo ṭhapetvā sesāya sasampayuttadhammāya manoviññāṇadhātuyā ārammaṇapaccayena paccayoti attho. Yaṃ yaṃ dhammaṃ ārabbhāti iminā ye ete etāsaṃ sattannaṃ viññāṇadhātūnaṃ ārammaṇadhammā vuttā, te tāsaṃ dhātūnaṃ ārammaṇaṃ katvā uppajjanakkhaṇeyeva ārammaṇapaccayo hontīti dīpeti. Evaṃ hontāpi ca na ekato honti, yaṃ yaṃ ārabbha ye ye uppajjanti, tesaṃ tesaṃ te te visuṃ visuṃ ārammaṇapaccayo hontītipi dīpeti. Uppajjantīti idaṃ yathā najjo sandanti, pabbatā tiṭṭhantīti sabbakālasaṅgahavasena, evaṃ vuttanti veditabbaṃ. Tena yepi ārabbha ye uppajjiṃsu, yepi uppajjissanti, te sabbe ārammaṇapaccayeneva uppajjiṃsu ca uppajjissanti cāti siddhaṃ hoti. Cittacetasikā dhammāti idaṃ ‘‘ye ye dhammā’’ti vuttānaṃ sarūpato nidassanaṃ. Te te dhammāti te te ārammaṇadhammā. Tesaṃ tesanti tesaṃ tesaṃ cittacetasikadhammānaṃ. Ayaṃ tāvettha pāḷivaṇṇanā.
ਇਦਂ ਪਨ ਆਰਮ੍ਮਣਂ ਨਾਮ ਰੂਪਾਰਮ੍ਮਣਂ ਸਦ੍ਦਗਨ੍ਧਰਸਫੋਟ੍ਠਬ੍ਬਧਮ੍ਮਾਰਮ੍ਮਣਨ੍ਤਿ ਕੋਟ੍ਠਾਸਤੋ ਛਬ੍ਬਿਧਂ ਹੋਤਿ। ਤਤ੍ਥ ਠਪੇਤ੍વਾ ਪਞ੍ਞਤ੍ਤਿਂ ਅવਸੇਸਂ ਭੂਮਿਤੋ ਕਾਮਾવਚਰਂ…ਪੇ॰… ਅਪਰਿਯਾਪਨ੍ਨਨ੍ਤਿ ਚਤੁਬ੍ਬਿਧਂ ਹੋਤਿ। ਤਤ੍ਥ ਕਾਮਾવਚਰਂ ਕੁਸਲਾਕੁਸਲવਿਪਾਕਕਿਰਿਯਰੂਪਭੇਦਤੋ ਪਞ੍ਚવਿਧਂ; ਰੂਪਾવਚਰਂ ਕੁਸਲવਿਪਾਕਕਿਰਿਯਤੋ ਤਿવਿਧਂ, ਤਥਾ ਅਰੂਪਾવਚਰਂ, ਅਪਰਿਯਾਪਨ੍ਨਂ ਕੁਸਲવਿਪਾਕਨਿਬ੍ਬਾਨવਸੇਨ ਤਿવਿਧਂ ਹੋਤਿ। ਸਬ੍ਬਮੇવ વਾ ਏਤਂ ਕੁਸਲਾਕੁਸਲવਿਪਾਕਕਿਰਿਯਰੂਪਨਿਬ੍ਬਾਨਪਞ੍ਞਤ੍ਤਿਭੇਦਤੋ ਸਤ੍ਤવਿਧਂ ਹੋਤਿ। ਤਤ੍ਥ ਕੁਸਲਂ ਭੂਮਿਭੇਦਤੋ ਚਤੁਬ੍ਬਿਧਂ ਹੋਤਿ, ਅਕੁਸਲਂ ਕਾਮਾવਚਰਮੇવ, વਿਪਾਕਂ ਚਤੁਭੂਮਕਂ, ਕਿਰਿਯਂ ਤਿਭੂਮਕਂ, ਰੂਪਂ ਏਕਭੂਮਕਂ ਕਾਮਾવਚਰਮੇવ, ਨਿਬ੍ਬਾਨਮ੍ਪਿ ਏਕਭੂਮਕਂ ਅਪਰਿਯਾਪਨ੍ਨਮੇવ, ਪਞ੍ਞਤ੍ਤਿ ਭੂਮਿવਿਨਿਮੁਤ੍ਤਾਤਿ ਏવਮੇਤ੍ਥ ਨਾਨਪ੍ਪਕਾਰਭੇਦਤੋ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Idaṃ pana ārammaṇaṃ nāma rūpārammaṇaṃ saddagandharasaphoṭṭhabbadhammārammaṇanti koṭṭhāsato chabbidhaṃ hoti. Tattha ṭhapetvā paññattiṃ avasesaṃ bhūmito kāmāvacaraṃ…pe… apariyāpannanti catubbidhaṃ hoti. Tattha kāmāvacaraṃ kusalākusalavipākakiriyarūpabhedato pañcavidhaṃ; rūpāvacaraṃ kusalavipākakiriyato tividhaṃ, tathā arūpāvacaraṃ, apariyāpannaṃ kusalavipākanibbānavasena tividhaṃ hoti. Sabbameva vā etaṃ kusalākusalavipākakiriyarūpanibbānapaññattibhedato sattavidhaṃ hoti. Tattha kusalaṃ bhūmibhedato catubbidhaṃ hoti, akusalaṃ kāmāvacarameva, vipākaṃ catubhūmakaṃ, kiriyaṃ tibhūmakaṃ, rūpaṃ ekabhūmakaṃ kāmāvacarameva, nibbānampi ekabhūmakaṃ apariyāpannameva, paññatti bhūmivinimuttāti evamettha nānappakārabhedato viññātabbo vinicchayo.
ਏવਂ ਭਿਨ੍ਨੇ ਪਨੇਤਸ੍ਮਿਂ ਆਰਮ੍ਮਣੇ ਕਾਮਾવਚਰਕੁਸਲਾਰਮ੍ਮਣਂ ਕਾਮਾવਚਰਕੁਸਲਸ੍ਸ, ਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਕਾਮਾવਚਰવਿਪਾਕਸ੍ਸ, ਕਾਮਾવਚਰਕਿਰਿਯਸ੍ਸ, ਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਰੂਪਾવਚਰਕੁਸਲਾਰਮ੍ਮਣਂ ਤੇਸੁ ਛਸੁ ਰਾਸੀਸੁ ਕਾਮਾવਚਰવਿਪਾਕવਜ੍ਜਾਨਂ ਪਞ੍ਚਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਅਰੂਪਾવਚਰਕੁਸਲਾਰਮ੍ਮਣਂ ਕਾਮਾવਚਰਕੁਸਲਸ੍ਸ, ਰੂਪਾવਚਰਕੁਸਲਸ੍ਸ, ਅਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਅਰੂਪਾવਰਚਰવਿਪਾਕਸ੍ਸ, ਕਾਮਾવਚਰਕਿਰਿਯਸ੍ਸ, ਰੂਪਾવਚਰਕਿਰਿਯਸ੍ਸ, ਅਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਅਟ੍ਠਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਅਪਰਿਯਾਪਨ੍ਨਕੁਸਲਾਰਮ੍ਮਣਂ ਕਾਮਾવਚਰਰੂਪਾવਚਰਤੋ ਕੁਸਲਕਿਰਿਯਾਨਮੇવ ਆਰਮ੍ਮਣਪਚ੍ਚਯੋ ਹੋਤਿ। ਅਕੁਸਲਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਕਾਮਾવਚਰવਿਪਾਕਸ੍ਸ, ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ।
Evaṃ bhinne panetasmiṃ ārammaṇe kāmāvacarakusalārammaṇaṃ kāmāvacarakusalassa, rūpāvacarakusalassa, akusalassa, kāmāvacaravipākassa, kāmāvacarakiriyassa, rūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalārammaṇaṃ tesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakusalārammaṇaṃ kāmāvacarakusalassa, rūpāvacarakusalassa, arūpāvacarakusalassa, akusalassa, arūpāvaracaravipākassa, kāmāvacarakiriyassa, rūpāvacarakiriyassa, arūpāvacarakiriyassa cāti imesaṃ aṭṭhannaṃ rāsīnaṃ ārammaṇapaccayo hoti. Apariyāpannakusalārammaṇaṃ kāmāvacararūpāvacarato kusalakiriyānameva ārammaṇapaccayo hoti. Akusalārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti.
ਕਾਮਾવਚਰવਿਪਾਕਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਕਾਮਾવਚਰવਿਪਾਕਸ੍ਸ, ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਰੂਪਾવਚਰવਿਪਾਕਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਪਞ੍ਚਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਅਰੂਪਾવਚਰવਿਪਾਕਾਰਮ੍ਮਣਮ੍ਪਿ ਇਮੇਸਂਯੇવ ਪਞ੍ਚਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਅਪਰਿਯਾਪਨ੍ਨવਿਪਾਕਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਕਿਰਿਯਾਨਞ੍ਞੇવ ਆਰਮ੍ਮਣਪਚ੍ਚਯੋ ਹੋਤਿ।
Kāmāvacaravipākārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacaravipākārammaṇaṃ kāmāvacararūpāvacarakusalassa, akusalassa, kāmāvacararūpāvacarakiriyassa cāti imesaṃ pañcannaṃ rāsīnaṃ ārammaṇapaccayo hoti. Arūpāvacaravipākārammaṇampi imesaṃyeva pañcannaṃ rāsīnaṃ ārammaṇapaccayo hoti. Apariyāpannavipākārammaṇaṃ kāmāvacararūpāvacarakusalakiriyānaññeva ārammaṇapaccayo hoti.
ਕਾਮਾવਚਰਕਿਰਿਯਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ, ਅਕੁਸਲਸ੍ਸ, ਕਾਮਾવਚਰવਿਪਾਕਸ੍ਸ, ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਰੂਪਾવਚਰਕਿਰਿਯਾਰਮ੍ਮਣਂ ਇਮੇਸੁ ਛਸੁ ਰਾਸੀਸੁ ਕਾਮਾવਚਰવਿਪਾਕવਜ੍ਜਾਨਂ ਪਞ੍ਚਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਅਰੂਪਾવਚਰਕਿਰਿਯਾਰਮ੍ਮਣਂ ਤੇਸਂ ਪਞ੍ਚਨ੍ਨਂ ਅਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਚਤੁਸਮੁਟ੍ਠਾਨਂ ਰੂਪਕ੍ਖਨ੍ਧਸਙ੍ਖਾਤਂ ਰੂਪਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ ਅਕੁਸਲਸ੍ਸ ਕਾਮਾવਚਰવਿਪਾਕਸ੍ਸ ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਨਿਬ੍ਬਾਨਾਰਮ੍ਮਣਂ ਕਾਮਾવਚਰਰੂਪਾવਚਰਕੁਸਲਸ੍ਸ, ਅਪਰਿਯਾਪਨ੍ਨਤੋ ਕੁਸਲવਿਪਾਕਸ੍ਸ, ਕਾਮਾવਚਰਰੂਪਾવਚਰਕਿਰਿਯਸ੍ਸ ਚਾਤਿ ਇਮੇਸਂ ਛਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਰੂਪਾવਚਰਕੁਸਲਕਿਰਿਯਾਨਂ ਕੇਚਿ ਨਿਚ੍ਛਨ੍ਤਿ, ਤਂ ਯੁਤ੍ਤਿਤੋ ਉਪਧਾਰੇਤਬ੍ਬਂ। ਨਾਨਪ੍ਪਕਾਰਕਂ ਪਨ ਪਞ੍ਞਤ੍ਤਿਆਰਮ੍ਮਣਂ ਤੇਭੂਮਕਕੁਸਲਸ੍ਸ, ਅਕੁਸਲਸ੍ਸ, ਰੂਪਾવਚਰવਿਪਾਕਸ੍ਸ, ਅਰੂਪਾવਚਰવਿਪਾਕਸ੍ਸ, ਤੇਭੂਮਕਕਿਰਿਯਸ੍ਸ ਚਾਤਿ ਇਮੇਸਂ ਨવਨ੍ਨਂ ਰਾਸੀਨਂ ਆਰਮ੍ਮਣਪਚ੍ਚਯੋ ਹੋਤਿ। ਤਤ੍ਥ ਯਂ ਯਂ ਆਰਮ੍ਮਣਂ ਯੇਸਂ ਯੇਸਂ ਪਚ੍ਚਯੋ, ਤੇ ਤੇ ਤਂਤਂਪਚ੍ਚਯੁਪ੍ਪਨ੍ਨਾ ਨਾਮ ਹੋਨ੍ਤੀਤਿ ਏવਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋਤਿ।
Kāmāvacarakiriyārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakiriyārammaṇaṃ imesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakiriyārammaṇaṃ tesaṃ pañcannaṃ arūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Catusamuṭṭhānaṃ rūpakkhandhasaṅkhātaṃ rūpārammaṇaṃ kāmāvacararūpāvacarakusalassa akusalassa kāmāvacaravipākassa kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Nibbānārammaṇaṃ kāmāvacararūpāvacarakusalassa, apariyāpannato kusalavipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalakiriyānaṃ keci nicchanti, taṃ yuttito upadhāretabbaṃ. Nānappakārakaṃ pana paññattiārammaṇaṃ tebhūmakakusalassa, akusalassa, rūpāvacaravipākassa, arūpāvacaravipākassa, tebhūmakakiriyassa cāti imesaṃ navannaṃ rāsīnaṃ ārammaṇapaccayo hoti. Tattha yaṃ yaṃ ārammaṇaṃ yesaṃ yesaṃ paccayo, te te taṃtaṃpaccayuppannā nāma hontīti evamettha paccayuppannatopi viññātabbo vinicchayoti.
ਆਰਮ੍ਮਣਪਚ੍ਚਯਨਿਦ੍ਦੇਸવਣ੍ਣਨਾ।
Ārammaṇapaccayaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / (੨) ਪਚ੍ਚਯਨਿਦ੍ਦੇਸੋ • (2) Paccayaniddeso
