| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
११. अरणसुत्तवण्णना
11. Araṇasuttavaṇṇanā
८१. रणन्ति कन्दन्ति एतेहीति रणा, रागादयो। तेहि अभिभूतताय हि सत्ता नानप्पकारं कन्दन्ति परिदेवन्ति। ते पन सब्बसो नत्थि एतेसं रणाति अरणा। निक्किलेसा खीणासवा। वुसितवासोति वुसितब्रह्मचरियवासो। भोजिस्सियन्ति भुजिस्सभावो। तेनाह ‘‘अदासभावो’’ति। समणाति समितपापसमणाति आह ‘‘खीणासवसमणा’’ति। पुथुज्जनकल्याणकाले लोकियपरिञ्ञाय, सेक्खा पुब्बभागे लोकियपरिञ्ञाय, पच्चवेक्खणे लोकियलोकुत्तराय परिञ्ञाय परिञ्ञेय्यं तेभूमकं खन्धपञ्चकं परिजानन्ति परिच्छिज्जन्ति। खीणासवा पन परिञ्ञातपरिञ्ञेय्या होन्ति। तथा हि ते सामी हुत्वा परिभुञ्जन्ति। वन्दन्ति नं पतिट्ठितन्ति वुत्तं, वन्दनीयभावो च सीलसम्पन्नतायाति आह ‘‘पतिट्ठितन्ति सीले पतिट्ठित’’न्ति। इधाति इमस्मिं लोके। खत्तियाति लक्खणवचनन्ति आह ‘‘न केवलं खत्तियावा’’तिआदि।
81. Raṇanti kandanti etehīti raṇā, rāgādayo. Tehi abhibhūtatāya hi sattā nānappakāraṃ kandanti paridevanti. Te pana sabbaso natthi etesaṃ raṇāti araṇā. Nikkilesā khīṇāsavā. Vusitavāsoti vusitabrahmacariyavāso. Bhojissiyanti bhujissabhāvo. Tenāha ‘‘adāsabhāvo’’ti. Samaṇāti samitapāpasamaṇāti āha ‘‘khīṇāsavasamaṇā’’ti. Puthujjanakalyāṇakāle lokiyapariññāya, sekkhā pubbabhāge lokiyapariññāya, paccavekkhaṇe lokiyalokuttarāya pariññāya pariññeyyaṃ tebhūmakaṃ khandhapañcakaṃ parijānanti paricchijjanti. Khīṇāsavā pana pariññātapariññeyyā honti. Tathā hi te sāmī hutvā paribhuñjanti. Vandanti naṃ patiṭṭhitanti vuttaṃ, vandanīyabhāvo ca sīlasampannatāyāti āha ‘‘patiṭṭhitanti sīle patiṭṭhita’’nti. Idhāti imasmiṃ loke. Khattiyāti lakkhaṇavacananti āha ‘‘na kevalaṃ khattiyāvā’’tiādi.
अरणसुत्तवण्णना निट्ठिता।
Araṇasuttavaṇṇanā niṭṭhitā.
छेत्वावग्गवण्णना निट्ठिता।
Chetvāvaggavaṇṇanā niṭṭhitā.
सारत्थप्पकासिनिया संयुत्तनिकाय-अट्ठकथाय
Sāratthappakāsiniyā saṃyuttanikāya-aṭṭhakathāya
देवतासंयुत्तवण्णनाय लीनत्थप्पकासना समत्ता।
Devatāsaṃyuttavaṇṇanāya līnatthappakāsanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ११. अरणसुत्तं • 11. Araṇasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ११. अरणसुत्तवण्णना • 11. Araṇasuttavaṇṇanā
