| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១១. អរណសុត្តវណ្ណនា
11. Araṇasuttavaṇṇanā
៨១. រណន្តិ កន្ទន្តិ ឯតេហីតិ រណា, រាគាទយោ។ តេហិ អភិភូតតាយ ហិ សត្តា នានប្បការំ កន្ទន្តិ បរិទេវន្តិ។ តេ បន សព្ពសោ នត្ថិ ឯតេសំ រណាតិ អរណា។ និក្កិលេសា ខីណាសវា។ វុសិតវាសោតិ វុសិតព្រហ្មចរិយវាសោ។ ភោជិស្សិយន្តិ ភុជិស្សភាវោ។ តេនាហ ‘‘អទាសភាវោ’’តិ។ សមណាតិ សមិតបាបសមណាតិ អាហ ‘‘ខីណាសវសមណា’’តិ។ បុថុជ្ជនកល្យាណកាលេ លោកិយបរិញ្ញាយ, សេក្ខា បុព្ពភាគេ លោកិយបរិញ្ញាយ, បច្ចវេក្ខណេ លោកិយលោកុត្តរាយ បរិញ្ញាយ បរិញ្ញេយ្យំ តេភូមកំ ខន្ធបញ្ចកំ បរិជានន្តិ បរិច្ឆិជ្ជន្តិ។ ខីណាសវា បន បរិញ្ញាតបរិញ្ញេយ្យា ហោន្តិ។ តថា ហិ តេ សាមី ហុត្វា បរិភុញ្ជន្តិ។ វន្ទន្តិ នំ បតិដ្ឋិតន្តិ វុត្តំ, វន្ទនីយភាវោ ច សីលសម្បន្នតាយាតិ អាហ ‘‘បតិដ្ឋិតន្តិ សីលេ បតិដ្ឋិត’’ន្តិ។ ឥធាតិ ឥមស្មិំ លោកេ។ ខត្តិយាតិ លក្ខណវចនន្តិ អាហ ‘‘ន កេវលំ ខត្តិយាវា’’តិអាទិ។
81. Raṇanti kandanti etehīti raṇā, rāgādayo. Tehi abhibhūtatāya hi sattā nānappakāraṃ kandanti paridevanti. Te pana sabbaso natthi etesaṃ raṇāti araṇā. Nikkilesā khīṇāsavā. Vusitavāsoti vusitabrahmacariyavāso. Bhojissiyanti bhujissabhāvo. Tenāha ‘‘adāsabhāvo’’ti. Samaṇāti samitapāpasamaṇāti āha ‘‘khīṇāsavasamaṇā’’ti. Puthujjanakalyāṇakāle lokiyapariññāya, sekkhā pubbabhāge lokiyapariññāya, paccavekkhaṇe lokiyalokuttarāya pariññāya pariññeyyaṃ tebhūmakaṃ khandhapañcakaṃ parijānanti paricchijjanti. Khīṇāsavā pana pariññātapariññeyyā honti. Tathā hi te sāmī hutvā paribhuñjanti. Vandanti naṃ patiṭṭhitanti vuttaṃ, vandanīyabhāvo ca sīlasampannatāyāti āha ‘‘patiṭṭhitanti sīle patiṭṭhita’’nti. Idhāti imasmiṃ loke. Khattiyāti lakkhaṇavacananti āha ‘‘na kevalaṃ khattiyāvā’’tiādi.
អរណសុត្តវណ្ណនា និដ្ឋិតា។
Araṇasuttavaṇṇanā niṭṭhitā.
ឆេត្វាវគ្គវណ្ណនា និដ្ឋិតា។
Chetvāvaggavaṇṇanā niṭṭhitā.
សារត្ថប្បកាសិនិយា សំយុត្តនិកាយ-អដ្ឋកថាយ
Sāratthappakāsiniyā saṃyuttanikāya-aṭṭhakathāya
ទេវតាសំយុត្តវណ្ណនាយ លីនត្ថប្បកាសនា សមត្តា។
Devatāsaṃyuttavaṇṇanāya līnatthappakāsanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១១. អរណសុត្តំ • 11. Araṇasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១១. អរណសុត្តវណ្ណនា • 11. Araṇasuttavaṇṇanā
